ସମାଜ ଡିଜିଟାଲ ଡେସ୍କ: ମହାରାଷ୍ଟ୍ରର କୋହ୍ଲାପୁରରେ ଚାଞ୍ଚଲ୍ୟ । ଲିଭ୍-ଇନ୍ ରେ ରହୁଥିବା ଜଣେ ୨୩ବର୍ଷୀୟା ଯୁବତୀଙ୍କୁ ନିର୍ମମ ଭାବେ ହତ୍ୟା କରିଛି ପ୍ରମିକ । କୋହ୍ଲାପୁରର ସରନୋବତୱାଡି ଅଞ୍ଚଳରେ ଏହି ଘଟଣା ଘଟିଛି । ମୃତ ଯୁବତୀଙ୍କ ନାମ ସମୀକ୍ଷା ଭରତ ନରସିଂହେ, ସେ କସବା ବାଭଡାର ବାସିନ୍ଦା ବୋଲି ଜଣାପଡିଛି । ପୁଲିସ କହିଛି ଯେ ମୃତ ସମୀକ୍ଷା ଏବଂ ଅଭିଯୁକ୍ତ ସତୀଶ ଯାଦବ କୋହ୍ଲାପୁରର ଶିବାଜୀ ପୀଠ ଅଞ୍ଚଳର ବାସିନ୍ଦା ଏବଂ ଉଭୟେ ଗୋଟିଏ ସ୍ଥାନରେ କାମ କରୁଥିଲେ । ଉଭୟ ଗତ କିଛି ମାସ ଧରି ସରନୋବତୱାଡି ଅଞ୍ଚଳରେ ରହୁଥିଲେ । ଗତ ୮ଦିନ ଧରି ସେମାନଙ୍କ ମଧ୍ୟରେ ବିବାହକୁ ନେଇ କଳହ ଲାଗି ରହିଥିଲା । ସୂଚନା ଅନୁଯାୟୀ ସତୀଶ ବିବାହ ପାଇଁ ସମୀକ୍ଷାଙ୍କ ଉପରେ ଚାପ ପକାଉଥିଲେ । ହେଲେ ସମୀକ୍ଷା ଏଥିପାଇଁ ପ୍ରସ୍ତୁତ ନଥିଲେ ।
ପୁଲିସ ସୂଚନା ଅନୁସାରେ ଘଟଣା ଦିନ ସମୀକ୍ଷା ତାଙ୍କର ଜଣେ ବନ୍ଧୁଙ୍କୁ ନେଇ ରୁମ୍ କୁ ଆସିଥିଲେ । ତେବେ ସତୀଶ ରାଗିଯାଇ ସେଠାରେ ପହଞ୍ଚି ଯୁକ୍ତିତର୍କ କରିବା ସହ ଧାରୁଆ ଛୁରୀରେ ତାଙ୍କୁ ଆକ୍ରମଣ କରିଥିଲେ । ଛୁରୀ ସମୀକ୍ଷାଙ୍କ ପଞ୍ଜରାରେ ଲାଗିଯିବାରୁ ଗୁରୁତର ହୋଇଥିଲେ ସମୀକ୍ଷା । ସାଙ୍ଗେ ସାଙ୍ଗେ ସ୍ଥାନୀୟ ଲୋକଙ୍କ ସହାୟତାରେ ସମୀକ୍ଷା ବନ୍ଧୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଇଥିଲେ । ହେଲେ ସେତେବେଳକୁ ସମୀକ୍ଷାଙ୍କ ମୃତ୍ୟୁ ହୋଇସାରିଥିଲା । ଏନେଇ ଗାନ୍ଧୀନଗର ଥାନାରେ ମାମଲା ରୁଜୁ ହୋଇଥିବା ବେଳେ ପୁଲିସ ଅଭିଯୁକ୍ତକୁ ଗିରଫ କରିଛି ।
