ଖୁଣ୍ଟା ଡିଗ୍ରୀ ମହାବିଦ୍ୟାଳୟର ୨୫ ତମ ପ୍ରତିଷ୍ଠା ଦିବସ ପାଳିତ

ଖୁଣ୍ଟା: ଖୁଣ୍ଟା ଡିଗ୍ରୀ ମହାବିଦ୍ୟାଳୟ ଗୁରୁବାର ନିଜର ୨୫ ତମ ପ୍ରତିଷ୍ଠା ଦିବସ ପାଳନ କରିଛି। ଆକାଶରେ ଉଡୁଥିବା ରଙ୍ଗୀନ ଗୁଡି ସଦୃଶ୍ୟ ଛାତ୍ରଛାତ୍ରୀମାନେ ଶୃଙ୍ଖଳିତ ରହିବାକୁ ନଟେଇ ଧରିଥିବା ମାର୍ଗଦର୍ଶକ ପିତା ମାତା ଅଧ୍ୟାପକ ମାନଙ୍କ ଦିଗ୍ଦର୍ଶନରେ ଅନୁପ୍ରାଣିତ ନହେଲେ ଖୋଲା ଆକାଶରେ ଛିଣ୍ଡି ଯାଇଥିବା ଦିଗ ହୀନ ଗୁଡି କିଛିକ୍ଷଣ ଉଡ଼ିବୁଲି ତଳେ ପଡିବା ଭଳି ପିଲାମାନେ ନିଜ ଲକ୍ଷ୍ୟ ପଥରୁ ବିଚ୍ୟୁତ ହୋଇଯିବେ ବୋଲି ଅତିଥିମାନେ କହିଥିଲେ। ଦୀର୍ଘବର୍ଷ ଧରି ବିଭିନ୍ନ ପରିସ୍ଥିତିରେ ଛାତ୍ରଛାତ୍ରୀଙ୍କୁ ଶିକ୍ଷାଦାନ ଦେଇଆସିଥିବା ଏହି ମହାବିଦ୍ୟାଳୟ ନିଜସ୍ୱ ପରିଚୟ ସୃଷ୍ଟି କରିପାରିଥିବା ବେଳେ ଅଧ୍ୟକ୍ଷ ପ୍ରମୋଦ କୁମାର ମିଶ୍ର ନିଜ ଅଭିଭାଷଣରେ ମହାବିଦ୍ୟାଳୟର ସଫଳତା ବାବଦରେ ଉଲ୍ଲେଖ କରିଥିଲେ। ଅତିଥି ମାନଙ୍କ ମଧ୍ୟରେ ଖୁଣ୍ଟା ବ୍ଳକ ଅଧ୍ୟକ୍ଷା ପୁଷ୍ପଲତା ମାରାଣ୍ଡି, ମହାବିଦ୍ୟାଳୟର ପ୍ରଥମ ଅଧ୍ୟକ୍ଷା ସଞ୍ଜୁଲତା ମହାନ୍ତି, ଦୁଇ ପ୍ରତିଷ୍ଠାତା ସଦସ୍ୟ ପୂର୍ବ ସାଂସଦ ବିରଭଦ୍ର ସିଂ ଓ ମହାବିଦ୍ୟାଳୟର ପ୍ରଥମ ସଭାପତି ପ୍ରତାପ ଚନ୍ଦ୍ର ରଥ, ଅଧ୍ୟାପକ ସରୋଜ ରଞ୍ଜନ ତ୍ରିପାଠୀ ଉପସ୍ଥିତ ରହି ନିଜର ବକ୍ତବ୍ୟ ପ୍ରଦାନ କରିଥିଲେ । ଅଧ୍ୟାପିକା ହୀରଣ୍ମୟୀ ଶତପଥୀ ସ୍ୱାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିଲେ। ୨୫ ବର୍ଷ ଧରି ଉତ୍ଥାନ ପତନ ମଧ୍ୟରେ ଏହି ମହାବିଦ୍ୟାଳୟ ବହୁ ମାନବ ସମ୍ବଳ ସୃଷ୍ଟି କରିପାରିଥିବାରୁ ପ୍ରତିଷ୍ଠାତା ସଦସ୍ୟ, ଅଧ୍ୟାପକ ଅଧ୍ୟାପିକା, ସ୍ଥାନୀୟ ଜନସାଧାରଣ, ଲୋକପ୍ରତିନିଧି ମାନଙ୍କୁ କୃତଜ୍ଞତା ପ୍ରଦାନ କରାଯାଇଥିଲା। ପ୍ରାରମ୍ଭରେ ଦିବଙ୍ଗତ ପ୍ରତିଷ୍ଠାତା ସଦସ୍ୟଙ୍କ ଉଦ୍ଦେଶ୍ୟରେ ନିରବ ପ୍ରାର୍ଥନା କରାଯାଇଥିଲା। ଅଧ୍ୟାପିକା ମଧୁସ୍ମିତା ପାଇନ ଧନ୍ୟବାଦ ଅର୍ପଣ କରିଥିଲେ।