କଲ୍ୟାଣସିଂହପୁର: କାଳବୈଶାଖୀର ତାଣ୍ଡବରେ ରାୟଗଡା ଜିଲା କଲ୍ୟାଣସିଂହପୁର ବ୍ଲକ ପୂଜାରିଗୁଡା ପଞ୍ଚାୟତର ରେଖାଲଗୁଡା ଗ୍ରାମରେ ଗଛ ପଡି ଦୁଇ ଘର ଭାଙ୍ଗିବା ସହ ତିନି ଗୋରୁର ମୃତ୍ୟୁ ହୋଇଥିବା ଜଣାପଡିଛି । ଆଜି ଅପରାହ୍ନ ୨ସମୟର କାଳବୈଶାଖୀର ପ୍ରଭାବରେ ବର୍ଷା ସାଙ୍ଗକୁ ଜୋରରେ ପବନ ବହିବାରୁ ରେଖାଲଗୁଡା ଗାଁ ବିଦ୍ୟାଳୟ ନିକଟରେ ଥିବା ପୁରୁଣା ବଡ଼ ତେନ୍ତୁଳି ଗଛ ଦୁଇଟି ଘର ଓ ତିନୋଟି ଗୋରୁ ଉପରେ ପଡିଯାଇଥିଲା। ଯାହା ଫଳରେ ତୁଳସୀ ଦଳାଇ, କୌଶଲ୍ୟା ଦଳେଇଙ୍କ ଘରଭାଙ୍ଗି ଯାଇଥିଲା। ସେହିପରି ଏହି ଗଛ ପଡିଯିବାରୁ ସୁନୀଲ ହୁଈକା, ଲୋକିନାଥ ହୁଈକା, ନଟ ହୁଈକାଙ୍କ ଗୋଟିଏ ଗାଈ ଓ ଦୁଇଟି ବଳଦଙ୍କ ମୃତ୍ୟୁ ହୋଇଥିଲା । ଏହି ଗୋରୁଙ୍କ ମୂଲ୍ୟ ପ୍ରାୟ ୧ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି ।
ଗ୍ରାମବାସୀ ଅଗ୍ନିଶମ ବିଭାଗକୁ ସୂଚନା ଦେବାରୁ ଦମକଳ ଗାଡି ଘଟଣାସ୍ଥଳରେ ପହଞ୍ଚି ଗଛ କାଟି ସଫା କରିଥିଲେ ।ଉକ୍ତ ଖବର ପାଇ ପଶୁ ଚିକିତ୍ସକ, ରାଜସ୍ୱ ନିରୀକ୍ଷକ ରାମ ଆଚାର୍ଯ୍ୟ, ସରପଞ୍ଚ ଅମିତା କାଡ୍ରାକା ,ସମିତି ସଭ୍ୟ ଘଟଣା ସ୍ଥଳରେ ପହଞ୍ଚି ତଦନ୍ତ ଚଳାଇଛନ୍ତି । ଉକ୍ତ ବିଷୟରେ ତହସିଲଦାର ରଞ୍ଜନ କୁମାର ମାନସେଠ ଙ୍କ ପଚାରିବାରୁ ସେ କହିଲେ ରାଜସ୍ୱ ନିରୀକ୍ଷକ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛନ୍ତି । ସରକାରଙ୍କ ନିୟମ ଅନୁଯାୟୀ ଯାହା ରହିଛି ଦିଆଯିବ ବୋଲି କହିଛନ୍ତି ।
Comments are closed.