ଚର୍ଚ୍ଚାରେ ମୁସଲମାନ ବାଳିକାଙ୍କ ରାମଭଜନ

ଶ୍ରୀନଗର: ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ଉତ୍ସବ ପାଖେଇ ଆସୁଥିବା ବେଳେ ସମଗ୍ର ଦେଶ ରାମମୟ ହୋଇଯାଇଛି । ଭଗବାନ ଶ୍ରୀରାମଙ୍କୁ ନିଜର ଭକ୍ତି ନୈବେଦ୍ୟ ଅର୍ପଣ ନିମନ୍ତେ ଭକ୍ତମାନେ ଭଜନକୀର୍ତ୍ତନ ଆରମ୍ଭ କରିଛନ୍ତି । ଏଭଳି ସ୍ଥଳେ ଜାମ୍ମୁ-କାଶ୍ମୀର ବାରମୂଳା ଜିଲାର ଜଣେ ମୁସଲମାନ ବାଳିକା ଗାଇଥିବା ରାମ ଭଜନ ଇଣ୍ଟରନେଟରେ ବହୁଳ ପ୍ରସାରିତ ହୋଇଛି । ଭଜନ ଗାଇଥିବା ବାଳିକା ହେଉଛନ୍ତି ସୟଦ ଜେହରା ବାତୁଲ । ଜେହରା ଜଣେ ମହାବିଦ୍ୟାଳୟ ଛାତ୍ରୀ । ଏହି ଭଜନ ଗାଇବା ସହ ପାହାଡି ଭାଷାରେ ରାମ ଭଜନ ଲେଖିଛନ୍ତି । ଯାହା ଇଣ୍ଟରନେଟରେ ବହୁଳ ପ୍ରସାରିତ ହୋଇଛି । ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ଉତ୍ସବରେ ଜାମ୍ମୁ-କାଶ୍ମୀରବାସୀଙ୍କ ଅବଦାନକୁ ଯୋଡିବା ଲାଗି ସେ ଏହି ଭଜନ ଲେଖିଥିବା କହିଛନ୍ତି । ସେ କହିଛନ୍ତି ଯେ ଆମର ଉପରାଜ୍ୟପାଳ ହିନ୍ଦୁ ହେେଏ ମଧ୍ୟ ସେ ମୁସଲମାନଙ୍କ ପ୍ରତି କୌଣସି ପକ୍ଷପାତ କରନ୍ତି ନାହିଁ । ସେହିପରି ଆମର ଇମାମ ଆମକୁ ଦେଶକୁ ଭଲ ପାଇବା ଶିଖାଇଛନ୍ତି । ୟୁଟ୍ୟୁବରେ ଜୁବନି ନୌତିୟାଲଙ୍କ ହିନ୍ଦୀ ଭଜନ ଶୁଣିବା ପରେ ସେ ଏହି ଭଜନ ଲେଖିଥିଲେ । ପ୍ରଥମେ ସେ ହିନ୍ଦୀରେ ଏହାକୁ ଗାଇଥିଲେ । ପରେ ଏହାକୁ ନିଜସ୍ୱ ଭାଷା ପାହାଡିରେ ଗାଇବାକୁ ମନସ୍ଥ କରିଥିଲେ ।