ବିଲରେ ହଳ କରୁଥିବା ବେଳେ ଟଳିପଡିଲେ ଚାଷୀ

ଫୁଲବାଣୀ: ବିଲରେ ହଳ କରୁଥିବା ସମୟରେ ଟଳି ପଡିଲେ ଜଣେ ଚାଷୀ। ମୃତ ଚାଷୀଙ୍କ ବୟସ ୫୯। ଏଭଳି ଏକ ଅଭାବନୀୟ ଘଟଣା ଘଟିଛି କନ୍ଧମାଳ ଜିଲ୍ଲା ଗୋଛାପଡା ଥାନା ପଲାବୁଡି ପଞ୍ଚାୟତର ଆଟାଶ୍ରାମ୍ବୁ ଗାଁରେ। ମୃତକ ଜଣକ ଆଟାଶ୍ରାମ୍ବୁ ଗାଁର ଇତିକ କହଁର ବୋଲି ଜଣାପଡିଛି। ସୂଚନା ଅନୁସାରେ ଚାଷୀ ଜଣକ ରବିବାର ସକାଳୁ ନିଜ ବିଲକୁ ହଳ କରିବାକୁ ଯାଇଥିଲେ। ହଳ କରିବା ସମୟରେ ବିଲରେ ହିଁ ସେ ମୁଣ୍ଡ ବୁଲେଇ ହଠାତ ପଡିଯାଇଥିଲେ। ଖବର ପାଇ ପରିବାର ଲୋକେ ତାଙ୍କୁ ଫିରିଙ୍ଗିଆ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ। କିନ୍ତୁ ମେଡିକାଲ ପହଞ୍ଚିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଘଟଣା ବିଷୟରେ ଖବର ପାଇ ଗୋଛାପଡା ପୋଲିସ ଫିରିଙ୍ଗିଆ ମେଡିକାଲରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ପାଇଁ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠେଇ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଗୋଛାପଡା ଥାନା ଅଧିକାରୀ ପ୍ରଭାତ କୁମାର ବେହେରା ସୂଚନା ଦେଇଛନ୍ତି।