ତୁମୁଡ଼ିବନ୍ଧ: କନ୍ଧମାଳ ଜିଲାର କ.ନୂଆଗାଁ ବ୍ଲକ ମହାସିଙ୍ଗ ପଞ୍ଚାୟତରେ ସରପଞ୍ଚଙ୍କ ବହିଷ୍କାର ଦାବି ନେଇ ପଞ୍ଚାୟତ କାର୍ଯ୍ୟାଳୟରେ ତାଲା ପକାଯାଇଥିବା ଜଣାପଡିଛି। ସୂଚନାମୁତାବକ, ମହାସିଙ୍ଗ କୁଇ କୁଳ ସମିତିର ଶତାଧିକ ମହିଳା ଓ ପୁରୁଷମାନେ ସରପଞ୍ଚଙ୍କ ପ୍ରତି ଅସନ୍ତୋଷ ହୋଇ ଏହି ପଦକ୍ଷେପ ନେଇଛନ୍ତି। ମହିଳା ସରପଞ୍ଚ ନୀଳିମା ମଳିକ ଆଦିବାସୀ ଜାତି ହଡପ କରି ପଞ୍ଚାୟତ ର୍ନିବାଚନରେ ଜିତିଥିବା ଅଭିଯୋଗ କରିଛନ୍ତି। କୁଇ କୁଳ ସମିତି ପଞ୍ଚାୟତ ସଭାପତି ଲୁସିବନ ମଲିକ ଓ ବରିଷ୍ଠ ନେତା ବିପ୍ର ଚରଣ ପ୍ରଧାନ ନିର୍ବାଚନରେ ଜିତିବା ପରଠାରୁ ଜାତି ହଡପ ନେଇ ଜିଲା ପ୍ରଶାସନଠାରୁ ଆରମ୍ଭ କରି ନିର୍ବାଚନ କମିଶନ ସମସ୍ତଙ୍କୁ ଅଭିଯୋଗ ହୋଇଥିଲା। ମାତ୍ର ସରପଞ୍ଚ ନୀଳିମା ମଳିକଙ୍କୁ ବହିଷ୍କାର କରାଯାଇନାହିଁ। ତେଣୁ ଶୁକ୍ରବାର ଶତାଧିକ ମହିଳା ଓ ପୁରୁଷ ଜାଲ କରି ଜାତି ହଡପ କରି ସରପଞ୍ଚ ନିର୍ବାଚନରେ ଜିତିଥିବା ଅଭିଯୋଗ କରିବା ସହ ମହିଳାଙ୍କୁ ତୁରନ୍ତ ପଦବୀରୁ ବହିଷ୍କାର ସହ ଗିରଫ ଦାବି କରି ତାଲା ପକାଇଛନ୍ତି। ଯେତେଦିନ ପର୍ଯ୍ୟନ୍ତ ସରପଞ୍ଚଙ୍କୁ ବହିଷ୍କାର କରାଯାଇ ନଥିବ ସେତେ ଦିନ ପର୍ଯ୍ୟନ୍ତ ତାଲା ଝୁଲିବ ବୋଲି ଉତ୍ତେଜିତ ଲୋକେ ଚେତାବନି ଦେଇଛନ୍ତି। ସେହିଭଳି ସେମାନେ ଆଗାମୀ ଦିନରେ ରାସ୍ତାକୁ ଓହ୍ଲାଇବାକୁ ଚେତାବନି ଦେଇଛନ୍ତି। ଅପରପକ୍ଷେ ସରପଞ୍ଚ ନୀଳିମା ମଳିକ ସମସ୍ତ ପ୍ରକାର ତଦନ୍ତକୁ ସ୍ୱାଗତ କରିବା ସହିତ ସଠିକ ପକ୍ରିୟାରେ ନିର୍ବାଚନ ଜିତିଥିବା ପ୍ରତିକ୍ରିୟାରେ କହିଛନ୍ତି।
