କଣ୍ଟାବାଞ୍ଜି: ବଲାଙ୍ଗୀର ଜିଲ୍ଲା ତୁରେକେଲା ଥାନା ବଡବାଙ୍କୀ ପଞ୍ଚାୟତ ସାନବାଙ୍କି ଗ୍ରାମରେ ହାତୀ ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ଘଟିଛି। ଗତ ବୁଧବାର ରାତିରେ ଏହି ଘଟଣା ଘଟିଛି। ମହିଳାଙ୍କୁ ହାତୀ ଦଳିଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ସେ ହେଲେ ଗ୍ରାମର ମନ୍ଦାର ପଟେଲ(୩୫)।
ସୂଚନାଯୋଗ୍ୟ, ଗତ କିଛି ଦିନ ହେଲା ୩୦ଟିକିଆ ହାତୀପଲ ଅଞ୍ଚଳର ଫସଲ ଖାଉଥିବା ବେଳେ ଘର ଦ୍ବାର ଭାଙ୍ଗି ଛାର ଖାର କରିଦେଉଛନ୍ତି । ବନ ବିଭାଗ ଗଜସାଥୀ ସହାୟତାରେ ହାତୀ ଘଉଡ଼ାଇବା ପରିବର୍ତ୍ତେ ଚୁପ ବସିଛି। ରାତିରେ ବିଦ୍ୟୁତ୍ କାଟ ରହୁ ଥିବାରୁ ହାତୀମାନେ ଅନ୍ଧାରରେ ଘର ଦ୍ବାର ଭାଙ୍ଗିବା ସହ ଫସଲ ନଷ୍ଟ କରୁଛନ୍ତି। ମନ୍ଦାର ପଟେଲଙ୍କ ମୃତ୍ୟୁରେ ତୁରେକେଲା ଥାନାରେ ଏକ ଅପମୃତ୍ୟୁ ମାମଲା(୧୧/୨୫) ରୁଜୁ ହୋଇଛି। ପୁଲିସ ଘଟଣାର ତଦନ୍ତ କରୁଥିବା ଥାନା ଅଧିକାରୀ ରାକେଶ କୁମାର ବେହେରା ସୂଚନା ଦେଇଛନ୍ତି। ମନ୍ଦାରଙ୍କ ପରିବାରକୁ ସରକାର କ୍ଷତିପୂରଣ ଯଥାଶୀଘ୍ର ପ୍ରଦାନ କରନ୍ତୁ ବୋଲି ଅଞ୍ଚଳବାସୀ ଦାବି କରିଛନ୍ତି।
