କଲ୍ୟାଣସିଂହପୁର: ରାୟଗଡ ଜିଲ୍ଲା କଲ୍ୟାଣସିଂହପୁର ବ୍ଲକ ସଦର ମହକୁମାଠାରୁ ଭୁବନେଶ୍ୱରକୁ ସିଧାସଳଖ ଯୋଗାଯୋଗ ପାଇଁ କିଛି ସାଧନ ନାହିଁ ତେଣୁ ଲୋକମାନେ ଅନେକ ସମୟରେ ରାଜଧାନୀ ଯିବାକୁ ଅସୁବିଧାର ସମ୍ମୁଖିନ ହେଉଛନ୍ତି। ଏପରିକି ଘରୋଇ ବସର ଶୋଷଣର ଶିକାର ହେଉଛନ୍ତି ସାଧାରଣ ଯାତ୍ରୀମାନେ। ରାୟଗଡ ଜିଲ୍ଲା ମୁଖ୍ୟାଳୟକୁ ଯିବାପାଇଁ ଘରୋଇ ବସ ଆବଶ୍ୟକ ଠାରୁ ଅଧିକ ଭଡା ନେବା ସହ ବସରେ ରହିଥିବା ସିଟ ଠାରୁ ଅଧିକ ଯାତ୍ରୀ ନେଇ ଯାଉଥିବା ପ୍ରାୟ ଦେଖିବାକୁ ମିଳୁଛି।ତେଣୁ ଯାତ୍ରୀମାନେ ଅସୁରକ୍ଷିତ ଅବସ୍ଥାରେ ଯାତ୍ରା କରିବାକୁ ବାଧ୍ୟ ହେଉଛନ୍ତି ବୋଲି ଭାରତୀୟ ଜନତା ପାର୍ଟି ସିକରପାଇ ମଣ୍ଡଳର ସଭାପତି ମନୋଜ କୁମାର ସେଠୀ କହିଛନ୍ତି।
କଲ୍ୟାଣସିଂହପୁର ବ୍ଲକ ଗୁଡାରୀ, କାଶୀପୁର, ଚନ୍ଦ୍ରପୁର ମୁନିଗୁଡାଭଳି ଦୁର୍ଗମ ଅଞ୍ଚଳକୁ ସରକାରୀ ବସ ସେବା ଯୋଗାଇ ଦେବା ପାଇଁ ସ୍ୱୀକୃତି ମିଳିଥିବା ବେଳେ କାହିଁକି ଦିଆଯାଉନି ବୋଲି ପାର୍ଟି ପ୍ରଶ୍ନ କରିଛି। ତେଣୁ ଅଞ୍ଚଳର ଆଞ୍ଚଳିକ ସମସ୍ୟାକୁ ଦୃଷ୍ଟିରେ ରଖି ଭାଜପା ତରଫରୁ ଏକ ପ୍ରତିନିଧି ଦଳ ଆଜି ଗୋଷ୍ଠୀ ଉନ୍ନୟନ ଅଧିକାରୀଙ୍କୁ ଯାଇ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି। ଆଜି ଗୋଷ୍ଠୀ ଉନ୍ନୟନ ଅଧିକାରୀ ତାପସ କୁମାର ଭୋଇଙ୍କ ଅନୁପସ୍ଥିତ ଥିବାରୁ ଅତିରିକ୍ତ ଗୋଷ୍ଠୀ ଉନୟନ ଅଧିକାରୀ ବଳରାମ ପାତ୍ରଙ୍କୁ ପ୍ରଦାନ କରାଯାଇଛି। ଏହି ଦାବିପତ୍ରଟି ବ୍ଲକ ଅଧିକାରୀଙ୍କ ଜରିଆରେ ଜିଲ୍ଲାପାଳଙ୍କ ଅବଗତ ନିମନ୍ତେ ପ୍ରେରଣ କରାଯାଇଛି। ଏହି ପ୍ରତିନିଧି ଦଳରେ ମଣ୍ଡଳ ସମ୍ପାଦକ ପୂର୍ଣ୍ଣଚନ୍ଦ୍ର ପଟେଲ, ମହିଳା ମୋର୍ଚ୍ଚା ସଭାପତି ପ୍ରମିଳା ନାୟକ, ନରସିଂହ କୌଶଲ୍ୟା, ଶ୍ୟାମଧର ଗାଁଠା, ୱାର୍ଡ ସଭ୍ୟା ସାଗନ୍ତି କୌଶଲ୍ୟା ଓ ଅନେକ ମହିଳା କର୍ମୀ ଯୋଗ ଦେଇଥିଲେ। ସରକାରୀ ବସ ଜିଲାର ସବୁ ବ୍ଲକକୁ ଯାଉଥିବା ବେଳେ କିନ୍ତୁ କଲ୍ୟାଣସିଂହପୁର ବ୍ଲକରେ ନାହିଁ।
Comments are closed.