ଧାନ ବୋଝେଇ ଟ୍ରକ ଦୁର୍ଘଟଣାଗ୍ରସ୍ତ ; ଅଳ୍ପକେ ବର୍ତିଲେ ଚାଳକ

କଲମପୁର : କଲମପୁର ଜୁନାଗଡ ମୁଖ୍ୟ ରାସ୍ତାର ତାଳପଦର ଛକ ନିକଟରେ ଘଟିଛି ଏକ ଦୁର୍ଘଟଣା। ଏକ ଧାନ ବୋଝେଇ ଟ୍ରକ ତାଳପଦରଛକ ନିକଟରେ ଥିବା ବୁଲାଣିରେ ଓଲଟି ପଡିଛି। ଟ୍ରକ ଚାଳକ ଅଳ୍ପକେ ବର୍ତି ଯାଇଛନ୍ତି।
ସୁଚନା ଅନୁସାରେ ଗତ ବିଳମ୍ବିତ ରାତିରେ ଟ୍ରକ କଲମପୁର ବ୍ଲକ ଅଧିନସ୍ଥ ବରଗାଁ ଧାନ ମଣ୍ଡିରୁ ଧାନ ବୋଝେଇ କରାଯାଇଥିଲା। ଏହି ଧାନ କେସିଙ୍ଗା ବି.ଡି.ଉଦ୍ୟୋଗ ନାମକ ଏକ ରାଇସମିଲକୁ ପରିବହନ କରି ନିଆଯାଉଥିଲା। କିନ୍ତୁ କଲମପୁର ଜୁନାଗଡ ମୁଖ୍ୟ ରାସ୍ତାର ତାଳପଦର ଛକ ନିକଟରେ ଥିବା ବୁଲାଣିରେ ଭାରସାମ୍ୟ ହରାଇ ଟ୍ରକଟି ଓଲଟି ପଡିଥିଲା। ଟ୍ରକ ଚାଳକ ଅଳ୍ପକେ ବର୍ତି ଯାଇଛନ୍ତି। ଟ୍ରକରେ ପରିବହନ କ୍ଷମତାରୁ ଅଧିକ ପରିବହନ କରାଯିବା ଓ ବୁଲାଣି ନିକଟରେ ଅଧିକ ବେଗ ଥିବାରୁ ଟ୍ରକ ଚାଳକ ଟ୍ରକର ଗତିକୁ ନିୟନ୍ତ୍ରଣ କରି ପାରିନଥିଲେ। ଯେଉଁଥିପାଇଁ ଏହି ଦୁର୍ଘଟଣା ଘଟିଥିବା ଆଲୋଚନା ହେଉଛି। ଅନ୍ୟପଟେ ଟ୍ରକର ପଟା ଭାଙ୍ଗି ଯିବାରୁ ଏହି ଦୁର୍ଘଟଣା ଘଟିଥିବାର ମଧ୍ୟ ଆଶଙ୍କା କରାଯାଉଛି।
ସୁଚନାଯୋଗ୍ୟଯେ, କଲମପୁର ଜୁନାଗଡ ର ଦୂରତ୍ୱ ୩୨ କିଲୋମିଟର। କିନ୍ତୁ ଏହି ୩୨ କିଲୋମିଟର ରାସ୍ତା ମଧ୍ୟରେ ୩୦ରୁ ଅଧିକ ବିପଦ ସଂକୁଳ ମୋଡାଣି ରହିଛି। ଯେଉଁଥି ପାଇଁ ଅନେକ ସମୟରେ ବିଭିନ୍ନ ଯାନ ବାହାନ ଦୁର୍ଘଟଣା ଘଟୁଛି। ତେଣୁ ରାସ୍ତା ନିର୍ମାଣ ଦାୟିତ୍ୱରେ ଥିବା ବିଭାଗ ଏଥିପ୍ରତି ଗୁରୁତ୍ୱ ଦେବା ପାଇଁ ସାଧାରଣରେ ଦାବି ହେଉଛି।