କଲମପୁର: କଳାହାଣ୍ଡି ଜିଲ୍ଲା ଆଦିବାସୀ ଅଧ୍ୟୁଷିତ ଥୁଆମୂଳ ରାମପୁର ବ୍ଲକର ନାକରୁଣ୍ଡି ଗ୍ରାମ ପଞ୍ଚାୟତ ଅଧିନ ଦୁର୍ଗମ ଗ୍ରାମ ଭାବେ ପରିଚିତ କେଲୁଆ ଗାଁ।ଚଳିତ ତ୍ରିସ୍ତରୀୟ ନିର୍ବାଚନରେ ନିଜ ଗ୍ରାମରୁ ମତଦାନ କେନ୍ଦ୍ର ପରିବର୍ତ୍ତନ ହୋଇଥିବା ଯୋଗୁଁ ଗ୍ରାମବାସୀ କ୍ଷୋଭ ପ୍ରକାଶ କରିଛନ୍ତି। ବିଗତ ତ୍ରିସ୍ତରୀୟ ନିର୍ବାଚନ ସମୟରେ ନିଜ ଗାଁରେ ମତଦାନ କେନ୍ଦ୍ର ହେଉଥିବା ବେଳେ ସାଧାରଣ ନିର୍ବାଚନ ସମୟରେ ଅନ୍ୟତ୍ର ହେଉଥିଲା। ଚଳିତ ତ୍ରିସ୍ତରୀୟ ନିର୍ବାଚନରେ ୬ କିଲୋମିଟର ଦୂର ପାହାଡ ତଳ ଟୁରିଭେଜିଗୁଡାକୁ ମତଦାନ କେନ୍ଦ୍ର ପରିବର୍ତ୍ତନ କରାଯାଇଛି।
ଗ୍ରାମର ଚତୁଃପାଶ୍ୱର୍ରେ ଖଣିଜ ସମ୍ପଦପୂର୍ଣ୍ଣ ବଡବଡ ସୁଉଚ୍ଚ ଜଙ୍ଗଲିଆ ପାହାଡ। ଏହି ଗାଁକୁ ଗମନାଗମନ ପାଇଁ ବିପଦ ସଙ୍କୁଳ ପାଦଚଲା ପାହାଡିଆ ରାସ୍ତା ହିଁ ଭରସା। ଏପରି ସ୍ଥଳେ ପରିବର୍ତ୍ତିତ ଟୁରିଭେଜିଗୁଡାର ମତଦାନ କେନ୍ଦ୍ରକୁ କିଭଳି ଅସହାୟ ବୃଦ୍ଧ ବୃଦ୍ଧା, ମହିଳା ତଥା ଭିନ୍ନକ୍ଷମ ଭୋଟର୍ ମତଦାନ ପାଇଁ ଯିବେ ଏହାକୁ ଧ୍ୟାନରେ ରଖି ଏଭଳି ନିଷ୍ପତ୍ତି ନେଇଥିବା ଜଣାପଡିଛି। ଯଦି ମତଦାନ କେନ୍ଦ୍ର ନିଜ ଗାଁରେ ନହୁଏ ତେବେ ଭୋଟ ବର୍ଜନ କରାଯିବ ବୋଲି ଥୁଆମୂଳ ରାମପୁର ଗୋଷ୍ଠୀ ଉନ୍ନୟନ ଅଧିକାରୀ ସୁଭକାନ୍ତ ନାୟକଙ୍କୁ ଗ୍ରାମବାସୀଙ୍କ ଦସ୍ତଖତ ଥିବା ଏକ ଅଭିଯୋଗ ପତ୍ର ପ୍ରଦାନ କରିଛନ୍ତି। ଏହି ଗ୍ରାମର ୧୬୩ ଭୋଟର୍ ନିଜ ଅଧିକାର ସାବ୍ୟସ୍ତ କରିବାରୁ ବଞ୍ଚିତ ହେବେ।ପ୍ରଶାସନ ଏଥିପ୍ରତି ପୁନଃ ବିଚାର କରିବାକୁ ସାଧାରଣରେ ମତ ପ୍ରକାଶ ପାଇଛି।
