ଗୋଲ୍ଡକୋଷ୍ଟ : ବୁଧବାର ଅଷ୍ଟ୍ରେଲିଆର ଗୋଲ୍ଡକୋଷ୍ଟରେ ପହଞ୍ଚିଛନ୍ତି ପାଖାପାଖି ୨୦୦ ଭାରତୀୟ ପ୍ରତିଯୋଗୀ ଓ ଅଫିସିଆଲ। ପୂର୍ବରୁ କିଛି ଦୌଡ଼କୁଦ ପ୍ରତିଯୋଗୀ ଗୋଲ୍ଡକୋଷ୍ଟରେ ପହଞ୍ଚି ସାରିଥିବା ବେଳେ ବୁଧବାର ସର୍ବାଧିକ ଭାରତୀୟ ଏଠାରେ ପହଞ୍ଚିଛନ୍ତି। ଏପ୍ରିଲ ୪ରୁ ୧୫ ପର୍ଯ୍ୟନ୍ତ ଗୋଲ୍ଡକୋଷ୍ଟରେ ରାଜ୍ୟଗୋଷ୍ଠୀ କ୍ରୀଡ଼ା ଆୟୋଜନ ହେଉଛି। ବୁଧବାର ପହଞ୍ଚିଥିବା କ୍ରୀଡ଼ାବିତ୍ଙ୍କ ମଧ୍ୟରେ ପ୍ରମୁଖ କ୍ରୀଡ଼ାବିତ୍ ଆଥ୍ଲେଟିକ୍ସ, ବକ୍ସିଂ, ହକି, ବାସ୍କେଟବଲ୍, ଲନ୍ ବୋଲିଂ ଓ ସୁଟିଂର। ବୁଧବାର ସକାଳୁ ଭାରତୀୟ କ୍ରୀଡ଼ାବିତ୍ ଗୋଲ୍ଡକୋଷ୍ଟରେ ପହଞ୍ଚିବା ପରେ ସିଧା କ୍ରୀଡ଼ାଗ୍ରାମକୁ ଯାଇଥିଲେ। ପରେ ସେମାନଙ୍କ ମଧ୍ୟରୁ କିଛି କ୍ରୀଡ଼ାବିତ୍ ଅଭ୍ୟାସ ପାଇଁ ଉଦ୍ଦିଷ୍ଟ ସ୍ଥାନକୁ ଯାଇଥିଲେ। ଅଷ୍ଟ୍ରେଲିଆର ବାତାବରଣ ସହ ନିଜକୁ ଖାପ୍ ଖୁଆଇବା ଲାଗି ଏହି କ୍ରୀଡ଼ାବିତ୍ ବହୁ ପୂର୍ବରୁ ଗୋଲ୍ଡକୋଷ୍ଟ ଯାଇଛନ୍ତି। ପୁଣି ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତୀୟ ଚିଫ୍-ଡି-ମିଶନ୍ ବିକ୍ରମ ସିଂହ ସିସୋଦିଆ ଏବଂ ଦଳର ମ୍ୟାନେଜର ନାମଦେବ, ଅଜୟ ନାରଙ୍ଗ ଓ ସିୟାଦ୍ କ୍ରୀଡ଼ାଗ୍ରାମରେ ଭାରତୀୟ ଅଲିମ୍ପିକ୍ ଆସୋସିଏସନ୍ର କାର୍ଯ୍ୟାଳୟ ଖୋଲିଛନ୍ତି। ଏହି କାର୍ଯ୍ୟାଳୟ ଜରିଆରେ ଭାରତୀୟ କ୍ରୀଡ଼ାବିତ୍ ସମସ୍ତ ସୂଚନା ପାଇପାରିବେ। ଏଣେ ଭାରତରେ ରହି ଭାରତୀୟ ଅଲିମ୍ପିକ୍ ଆସୋସିଏସନ୍ର ସଭାପତି ନରିନ୍ଦର ବାତ୍ରା ଓ ମହାସମ୍ପାଦକ ରାଜୀବ ମେହେଟ୍ଟା ଗୋଲ୍ଡକୋଷ୍ଟରେ ଥିବା ସିସୋଦିଆଙ୍କ ସହ ସମ୍ପର୍କ ରଖିଛନ୍ତି ଏବଂ ଭାରତୀୟ କ୍ରୀଡ଼ାବିତ୍ ଯେପରି ଅସୁବିଧା ନ ଭୋଗନ୍ତି; ତାହା ନିଶ୍ଚିତ କରିବାକୁ ଚାହାନ୍ତି।
