ମୁମ୍ବଇ : ମହାରାଷ୍ଟ୍ରରେ ମୂଷା ମରା ଦୁର୍ନୀତି ପରେ ଏବେ ଏକ ନୂଆ ଚା’ ପିଆ ଦୁର୍ନୀତି ପଦାକୁ ଆସିଛି । ମହାରାଷ୍ଟ୍ର କଂଗ୍ରେସ ଏହା ଏକ ବୃହତ ଦୁର୍ନୀତି ବୋଲି ଅଭିଯୋଗ କରିଛି । ମୁମ୍ବଇ କଂଗ୍ରେସ ମୁଖ୍ୟ ସଞ୍ଜୟ ନିରୁପମ ଅଭିଯୋଗ କରିଛନ୍ତି ଯେ ମହାରାଷ୍ଟ୍ର ମୁଖ୍ୟମନ୍ତ୍ରୀ କାର୍ଯ୍ୟାଳୟରେ ଚା’ ପିଇବା ଆଶ୍ଚର୍ଯ୍ୟଜନକ ଭାବେ ବୃଦ୍ଧି ପାଇଛି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ପ୍ରତି ଦିନ ହାରାହାରି ୧୮,୫୦୦ କପ୍ ଚା’ ପରଷା ହୋଇଛି । ସୂଚନା ଅଧିକାର ବଳରେ ମିଳିଥିବା ଏକ ତଥ୍ୟକୁ ଆଧାର କରି କଂଗ୍ରେସ ଏପରି ଅଭିଯୋଗ ଆଣିଥିବା କହିଛି । ଏଥିରେ ଉଲ୍ଲେଖ କରାଯାଇଛି ଯେ ଗତ ୩ ବର୍ଷ ଧରି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ଚା’ ଖର୍ଚ୍ଚରେ ଅହେତୁକ ଭାବେ ବୃଦ୍ଧି ଘଟିଛି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ୨୦୧୫-୧୬ରେ ଚା’ ପାଇଁ ୫୭,୯୯,୧୫୦ (ପ୍ରାୟ ୫୮ ଲକ୍ଷ) ଟଙ୍କା ଖର୍ଚ୍ଚ ହୋଇଥିବାବେଳେ ୨୦୧୭-୧୮ରେ ୩,୩୪,୬୪,୯୦୪ (ପ୍ରାୟ ୩.୪) କୋଟି ଟଙ୍କା ଖର୍ଚ୍ଚ ହୋଇଛି । ଅର୍ଥାତ ଚା’ ଖର୍ଚ୍ଚରେ ୫୭୭% ବୃଦ୍ଧି ଘଟିଛି । ଚା’ ଦର ଅନୁସାରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ପ୍ରତିଦିନ ୧୮,୫୯୧ କପ୍ ଚା’ ପରଷା ହୋଇଛି । ଏନେଇ ଟ୍ୱିଟ୍ କରି ସଞ୍ଜୟ ନିରୁପମ ପଚାରିଛନ୍ତି ଯେ ମୁଖ୍ୟମନ୍ତ୍ରୀ ଦେବେନ୍ଦ୍ର ପଡ଼ନାଭିସ୍ କେଉଁ ଚାହା ପିଉଛନ୍ତି ? ଆମେ କେବଳ ଗ୍ରୀନ ଟି’ ଓ ୟଲୋ ଟି’ ନା ଜାଣିଛୁ ।
ପ୍ରକାଶ ଯେ ବିଜେପିର ବରିଷ୍ଠ ନେତା ତଥା ମହାରାଷ୍ଟ୍ରର ପୂର୍ବତନ ମନ୍ତ୍ରୀ ଏକନାଥ ଖାଡସେ ମହାରାଷ୍ଟ୍ର ମନ୍ତ୍ରଣାଳୟରେ ମୂଷା ମରା ଦୁର୍ନୀତି ଘଟିଥିବା ଅଭିଯୋଗ କରିଥିଲେ। ସେ ଦର୍ଶାଇଥିଲେ ଯେ ମହାରାଷ୍ଟ୍ର ମନ୍ତ୍ରଣାଳୟରେ ମୂଷାଙ୍କ ଦୌରାତ୍ମ୍ୟ ବୃଦ୍ଧି ପାଇବା ପରେ ମନ୍ତ୍ରଣାଳୟ ପକ୍ଷରୁ ମୂଷା ମରା ପାଇଁ ଏକ କମ୍ପାନୀକୁ ଠିକା ଦିଆଯାଇଥିଲା । ଏହି କମ୍ପାନୀ ମାତ୍ର ଗୋଟିଏ ସପ୍ତାହ ମଧ୍ୟରେ ୩ ଲକ୍ଷ ୧୪ ହଜାର ମୂଷା ମାରିଥିବା ଦାବି କରିଛି । ଯେଉଁ କମ୍ପାନୀକୁ ୩,୧୯,୪୦୦ ମୂଷା ମାରିବା ପାଇଁ ଠିକା ଦିଆଯାଇଥିଲା; ସେ କେମ୍ପାନୀ ମାତ୍ର ୭ ଦିନରେ କେମିତି ୩ ଲକ୍ଷରୁ ଅଧିକ ମୂଷା ମାରିଦେଲା ବୋଲି ସେ ପ୍ରଶ୍ନ କରିଥିଲେ । ମୁମ୍ବଇର ବିଏମ୍ସି ଦୁଇ ବର୍ଷରେ ୬ ଲକ୍ଷ ମୂଷା ମାରିଥିଲା। ଏବେ ମନ୍ତ୍ରଣାଳୟ ମାତ୍ର ୭ ଦିନରେ ୩ ଲକ୍ଷରୁ ଅଧିକ ମୂଷା ମାରିଦେଇଛି । ଏହାସହ ମନ୍ତ୍ରଣାଳୟକୁ ୬ ମାସରେ ଯେଉଁ କାମ କରିବାକୁ ଥିଲା ତାହା ମାତ୍ର ୭ ଦିନରେ କେମିତି ଶେଷ ହୋଇଗଲା ବୋଲି ସେ ପ୍ରଶ୍ନ କରିଥିଲେ । ସେ କହିଥିଲେ ଯେ ମୂଷା ମରା କମ୍ପାନୀର ଦାବି ଅନୁସାରେ ପ୍ରତିଦିନ ୪୫,୬୨୮.୫୭ ମୂଷା ମରାଯାଇଛି । ଅର୍ଥାତ କମ୍ପାନୀ ପ୍ରତି ମିନିଟରେ ୩୧ରୁ ଅଧିକ ମୂଷା ମାରିଛି । ପ୍ରତିଦିନ ମୃତ ମୂଷାଙ୍କ ଓଜନ ହାରାହାରି ୯,୧୨୫.୭୧ କିଲୋ ହେବ । ତେଣୁ ମନ୍ତ୍ରଣାଳୟରୁ ମୂଷାଙ୍କୁ ନେବା ପାଇଁ ପ୍ରତିଦିନ ଟ୍ରକ୍ ଆବଶ୍ୟକ ପଡୁଥିବ । ମୃତ ମୂଷାଙ୍କୁ କେଉଁଠି ଫିଙ୍ଗାଗଲା କି ପୋତାଗଲା କମ୍ପାନୀ ସେ ବିଷୟରେ କିଛି କହିନାହିଁ । ମୂଷା ମରା ପରେ ଚା’ ପିଆ ଦୁର୍ନୀତି ମହାରାଷ୍ଟ୍ରର ବିଜେପି-ଶିବସେନା ମେଣ୍ଟ ସରକାରଙ୍କ ମୁଣ୍ଡ ବିନ୍ଧାର କାରଣ ହୋଇଛି ।
ମହାରାଷ୍ଟ୍ରରେ ‘ମୂଷା ମରା’ ପରେ ‘ଚା ପିଆ’ ଦୁର୍ନୀତି
Popular Categories
Previous article
Next article