ଗୁଜରାଟ ଝୁଲାପୋଲ ଭୁଶୁଡ଼ିବା ଘଟଣାରେ ସୁପ୍ରିମକୋର୍ଟଙ୍କ ଅଧୀନରେ ନ୍ୟାୟିକ କମିଶନ ନିଯୁକ୍ତି ଦାବି କଲେ ମମତା

ଡେସ୍କ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯେ ଗୁଜରାଟ ଝୁଲାପୋଲ ଭୁଶୁଡ଼ିବା ଘଟଣାରେ ସୁପ୍ରିମକୋର୍ଟଙ୍କ ଅଧୀନରେ ନ୍ୟାୟିକ କମିଶନ ଗଠନ ହେବା ଉଚିତ। ଏହି ଘଟଣାରେ ଅତି କମରେ ୧୩୦ ଜଣଙ୍କର ମୃତ୍ୟୁ ଘଟିଛି। ସେ ଆହୁରି ମଧ୍ୟ ପ୍ରଶ୍ନ କରିଛନ୍ତି ଯେ ସିବିଆଇ ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟ ପରି କେନ୍ଦ୍ରୀୟ ଏଜେନ୍ସି ଏହି ଦୁଖଦଃ ଘଟଣା ପାଇଁ ଦାୟୀ ଲୋକଙ୍କୁ କାହିଁକି ଗିରଫ କରୁନାହାଁନ୍ତି?

ସେ ଅଭିଯୋଗ କରିଛନ୍ତି ଯେ ଗୁଜରାଟ ସରକାର ଆଗାମୀ ରାଜ୍ୟ ନିର୍ବାଚନ ପାଇଁ ​​ବ୍ୟସ୍ତ ଥିବାରୁ ମୃତ ପରିବାର ସଦସ୍ୟଙ୍କୁ ସାହାଯ୍ୟ କରିବାରେ ବିଫଳ ହୋଇଛନ୍ତି। ଏହି ଘଟଣା ନେଇ ମମତା ଆଶ୍ଚର୍ଯ୍ୟ ପ୍ରକାଶ କରିଛନ୍ତି। ଯେଉଁମାନେ ଜୀବନ ହରାଇଛନ୍ତି ସେମାନଙ୍କ ପରିବାର ସଦସ୍ୟଙ୍କୁ ସେ ସମବେଦନା ଜଣାଇଛନ୍ତି।

ଚେନ୍ନାଇ ଯିବା ପୂର୍ବରୁ କୋଲକାତା ବିମାନବନ୍ଦରରେ ମମତା ଗଣମାଧ୍ୟମକୁ କହିଛନ୍ତି, ଯେଉଁମାନେ ସେହି ଝୁଲାପୋଲର ମରାମତି ପାଇଁ କାର୍ଯ୍ୟ କରିଛନ୍ତି ସେମାନେ ଦାୟୀ ରହିବେ।