ଝାନ୍ସି : ଉତ୍ତର ପ୍ରଦେଶ ରାଜ୍ୟ ସ୍ୱାସ୍ଥ୍ୟ ସେବାରେ ପୁଣି ଏକ ଚରମ ଅବହେଳା ଦେଖିବାକୁ ମିଳିଛି । ଝାନ୍ସିସ୍ଥିତ ମହାରାଣୀ ଲକ୍ଷ୍ମୀବାଇ ମେଡିକାଲ କଲେଜର ଡାକ୍ତରମାନେ ବସ୍ ଦୁର୍ଘଟଣାରେ ଗୁରୁତର ଜଣେ ରୋଗୀର ଗୋଟିଏ ଗୋଡ଼କୁ କାଟିବା ପରେ ତାର ତକିଆ ଭାବେ ବ୍ୟବହାର କରିଥିଲେ । ଅର୍ଥାତ କଟା ଗୋଡ଼କୁ ଡାକ୍ତରମାନେ ରୋଗୀର ମୁଣ୍ଡ ତଳେ ଦେଇଥିବା ଦେଖିବାକୁ ମିଳିଥିଲା । ସ୍ଥାନୀୟ ଏକ ଟିଭି ଚ୍ୟାନେଲରେ ଏହି ଘଟଣା ପ୍ରସାରିତ ହେବା ପରେ ରାଜ୍ୟ ବ୍ୟାପୀ ଚର୍ଚ୍ଚାର ବିଷୟ ହୋଇଛି ।
ସୂଚନା ଅନୁସାରେ ଶନିବାର ଏକ ସ୍କୁଲ ବସ୍ ଦୁର୍ଘଟଣାଗ୍ରସ୍ତ ହେବାରେ ବସ୍ର କ୍ଲିନର ଗୁରୁତର ଭାବେ ଆହତ ହୋଇଥିଲେ । କ୍ଲିନରଙ୍କୁ ସଙ୍ଗେ ସଙ୍ଗେ ଡାକ୍ତରଖାନା ନିଆଯାଇଥିଲା । ସେଠାରେ ଡାକ୍ତରମାନଙ୍କୁ କ୍ଲିନରଙ୍କ ଗୋଡଟିକୁ କାଟିବାକୁ ପଡ଼ିଥିଲା । ଏହାପରେ ତାଙ୍କ କଟା ଗୋଡ଼ଟିକୁ ତାଙ୍କ ମୁଣ୍ଡ ତଳେ ତକିଆ ଭାବେ ଦିଆଯାଇଥିଲା । ପାଖରେ ଥିବା ରୋଗୀ ଓ ତାଙ୍କ ସମ୍ପର୍କୀୟମାନେ ଏହା ଦେଖି ସ୍ତବ୍ଦ ହୋଇଯାଇଥିଲେ ।
ଅପରପକ୍ଷରେ କଟା ଗୋଡକୁ ତକିଆ ଭାବେ ବ୍ୟବହାର କରାଯିବା ଅଭିଯୋଗକୁ ଡାକ୍ତରଖାନା କର୍ତ୍ତୃର୍ପକ୍ଷ ଖଣ୍ଡନ କରିବା ସହ ଘଟଣାର ତଦନ୍ତ ନିର୍ଦେଶ ଦିଆଯାଇଥିବା ସୂଚନା ଦେଇଛନ୍ତି ।
