ନୂଆଦିଲ୍ଲୀ: ବିଶ୍ବ ପ୍ରସିଦ୍ଧ ଜୈନ ମୁନି ଆଚାର୍ଯ୍ୟ ବିଦ୍ୟାସାଗର ମହାରାଜ ଦେହତ୍ୟାଗ କରିଛନ୍ତି। ଶନିବାର ବିଳମ୍ବିତ ରାତିରେ ଛତିଶଗଡ଼ ଡୋଙ୍ଗରଗଡ଼ର ଚନ୍ଦ୍ରଗିରିରେ ସେ ଶେଷ ନିଃଶ୍ବାସ ତ୍ୟାଗ କରିଛନ୍ତି। ବିଦ୍ୟାସାଗର ମହାରାଜ ଗତ କିଛି ଦିନ ଧରି ଅସୁସ୍ଥ ଥିଲେ।
ସୂଚନା ଅନୁସାରେ, ୭୭ ବର୍ଷୀୟ ବିଦ୍ୟାସାଗର ମହାରାଜ ଅନ୍ନଜଳ ତ୍ୟାଗ କରିବା ସହିତ ମଉନବ୍ରତ ଅବଲମ୍ବନ କରି ସମାଧିରେ ବସିବାର ୩ ଦିନ ପରେ ରାତି ପ୍ରାୟ ୨.୩୫ରେ ପରଲୋକ ଗମନ କରିଛନ୍ତି। ରବିବାର ଦ୍ବିପ୍ରହର ସମୟରେ ତାଙ୍କ ଅନ୍ତିମ ସଂସ୍କାର କରାଯିବ ବୋଲି ଜଣାପଡ଼ିଛି।
କିଛି ମାସ ପୂର୍ବେ ବିଧାନସଭା ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଡୋଙ୍ଗରଗଡ଼ରେ ପହଞ୍ଚି ଜୈନ ଆଚାର୍ଯ୍ୟ ବିଦ୍ୟାସାଗର ମହାରାଜଙ୍କୁ ସାକ୍ଷାତ କରିଥିଲେ, ଯାହାର ଫଟୋ ସେ ସୋସିଆଲ ମିଡିଆରେ ପୋଷ୍ଟ କରିଥିଲେ।
ଜୈନ ସମ୍ପ୍ରଦାୟର ପ୍ରମୁଖ ଧର୍ମଗୁରୁମାନଙ୍କ ମଧ୍ୟରୁ ଆଚାର୍ଯ୍ୟ ବିଦ୍ୟାସାଗର ମହାରାଜ ଅନ୍ୟତମ। ୧୯୪୬ ମସିହା ଅକ୍ଟୋବର ୧୦ ତାରିଖ ଶରଦ ପୂର୍ଣ୍ଣିମା ଦିନ କର୍ଣ୍ଣାଟକର ସଡ଼ଲଗା ଗାଁ’ରେ ଜନ୍ମ ଗ୍ରହଣ କରିଥିଲେ। ସେ ଥିଲେ ଆଚାର୍ଯ୍ୟ ଜ୍ଞାନସାଗରଙ୍କ ଶିଷ୍ୟ। ଆଚାର୍ଯ୍ୟ ଜ୍ଞାନସାଗର ସମାଧି ନେବା ବେଳେ ଆଚାର୍ଯ୍ୟ ପଦବୀକୁ ମୁନି ବିଦ୍ୟାସାଗରଙ୍କୁ ହସ୍ତାନ୍ତର କରିଥିଲେ। ୧୯୭୨ ମସିହା ନଭେମ୍ବର ୨୨ ତାରିଖ ଦିନ ବିଦ୍ୟାସାଗର ମାତ୍ର ୨୬ ବର୍ଷ ବୟସରେ ଆଚାର୍ଯ୍ୟ ହୋଇଥିଲେ।
