ସମାଜ ଡିଜିଟାଲ ଡେସ୍କ: ହେଜବୋଲ୍ଲାର ୧୨ଟି ମିଲିଟାରୀ କମାଣ୍ଡ ସେଣ୍ଟର(ସାମରିକ ଆଦେଶ କେନ୍ଦ୍ର)କୁ ଉଡ଼ାଇ ଦେଇଛି ଇସ୍ରାଏଲ। ରବିବାର ଏୟାର ଷ୍ଟ୍ରାଇକ ଜରିଆରେ ଇସ୍ରାଏଲ ପ୍ରତିରକ୍ଷା ବାହିନୀ(ଆଇଡିଏଫ) ଗୋଟି ଗୋଟି କରି ଏହି କେନ୍ଦ୍ରଗୁଡ଼ିକୁ ଚିହ୍ନଟ କରିବା ସହିତ ଆକାଶ ମାର୍ଗରୁ ବୋମା ବର୍ଷଣ କରି ସେଗୁଡ଼ିକୁ ଧ୍ବଂସ କରିଦେଇଛନ୍ତି। ଏସବୁ କମାଣ୍ଡ ସେଣ୍ଟର ବେରୁଟର ଦହିୟେ ଅଞ୍ଚଳରେ ରହିଥିଲା। ହେଜବୋଲ୍ଲାର ଗୁଇନ୍ଦା ଶାଖା ଏସବୁ ସାମରିକ ଆଦେଶ କେନ୍ଦ୍ରକୁ ଇସ୍ରାଏଲରେ ଆତଙ୍କବାଦୀ ଆକ୍ରମଣ ଯୋଜନା ଏବଂ କାର୍ଯ୍ୟକାରିତା ପାଇଁ ବ୍ୟବହାର କରୁଥିଲା ବୋଲି ଆଇଡିଏଫ କହିଛି।
ଆଇଡିଏଫ ଏହି ଅପରେସନ ସମ୍ପର୍କରେ କହିଛି ଯେ, ଏହାର ଯୁଦ୍ଧ ବିମାନଗୁଡ଼ିକ ଦହିୟେରେ ଥିବା ହେଜବୋଲ୍ଲାର ଗୁରୁତ୍ଵପୂର୍ଣ୍ଣ ମୁଖ୍ୟାଳୟଗୁଡ଼ିକୁ ଟାର୍ଗେଟ କରି ସେଗୁଡ଼ିକୁ ଧ୍ବଂସ କରିଦେଇଛନ୍ତି। ଯାହାଫଳରେ ହେଜବୋଲ୍ଲାର ଆକ୍ରମଣ ଦକ୍ଷତାକୁ ଦୁର୍ବଳ କରିଦିଆଯାଇପାରିବ। ବେରୁଟରେ ହେଜବୋଲ୍ଲାର ଅସ୍ତ୍ରାଗାର ଏବଂ ଅସ୍ତ୍ରଶସ୍ତ୍ର ନିର୍ମାଣ ହେଉଥିବା ସ୍ଥଳକୁ ବି ଟାର୍ଗେଟ କରାଯାଇଆସୁଛି। ଆକ୍ରମଣ ପୂର୍ବରୁ ଜନସାଧାରଣକୁ ଯେପରି କୌଣସି ପ୍ରକାର କ୍ଷତି ନ ପହଞ୍ଚିବ ସେଥିଲାଗି ଅନେକ ପଦକ୍ଷେପ ନିଆଯାଉଥିବା ଆଇଡିଏଫ କହିଛି।
