ମୁମ୍ବାଇ : ‘କାନ୍ତାରା ୨’ ଫିଲ୍ମର ସୁଟିଂ ଚାଲିଛି । ଖୁବ୍ ଶୀଘ୍ର ନିର୍ମାତା ସିନେମାକୁ ନେଇ ଆସିବେ । କିନ୍ତୁ ଏହା ମଧ୍ୟରେ ସିନେମାକୁ ନେଇ ଏକ ଖରାପ ଖବର ସାମ୍ନାକୁ ଆସିଛି । ଋଷଭ ସେଟ୍ଟୀଙ୍କ ଫିଲ୍ମ କାନ୍ତାରର ସିକ୍ବେଲର ୬ ଜୁନିୟର କଳାକାର ଆହତ ହୋଇଛନ୍ତି । ଏକ ବସ୍ ଦୁର୍ଘଟଣାରେ ୬ ଜଣ ଅଳ୍ପକେ ରକ୍ଷା ପାଇଯାଇଛନ୍ତି ।
କର୍ଣ୍ଣାଟକର ଉଡ୍ଡୁପି ଜିଲାରେ ଏକ ବସ୍ ଓଲଟି ପଡିବାରୁ ସେଥିରେ ଥିବା କନ୍ନଡ ଫିଲ୍ମ ‘କାନ୍ତାରା’ର ୬ ଜୁନିୟର କଳାକାର ଆହତ ହୋଇଛନ୍ତି । ମୁଦୁରରେ ସୁଟିଂ ସାରି କୋଲ୍ଲୁର ଫେରିବା ସମୟରେ ମିନି ବସରେ ୨୦ ଜଣ କଳାକାର ଥିଲେ । ଆହତଙ୍କୁ କୁନ୍ଦାପୁର ହସ୍ପିଟାଲରେ ଭର୍ତ୍ତି କରାଯାଇଛି । କୋଲ୍ଲୁର ପୁଲିସ ପହଞ୍ଚି ଘଟଣାର ଯାଞ୍ଚ କରୁଛି । ସୂଚନାଯୋଗ୍ୟ କାନ୍ତାରାର ଆଗାମୀ ପାର୍ଟ ଉପରେ କାମ ଚାଲିଛି। ଋଷଭ ସେଟ୍ଟୀ ଏଥିରେ ଅଭିନୟ କରିବା ସହ ଏହାର ନିର୍ଦ୍ଦେଶନା ଦେଉଛନ୍ତି । ଫିଲ୍ମ ୨୦୨୫ରେ ମୁକ୍ତିଲାଭ କରିବ ।
