ସମାଜ ଡିଜିଟାଲ ଡେସ୍କ: ଇସ୍ରାଏଲରେ ହମାସ ଆକ୍ରମଣକୁ ସୋମବାର ବର୍ଷେ ପୂରଣ ହୋଇଛି। ଗତବର୍ଷ ଅର୍ଥାତ ୨୦୨୩ ଅକ୍ଟୋବର ୭ ତାରିଖରେ ଗାଜାପଟିରେ ସରକାର ଚଳାଇଥିବା ଆତଙ୍କବାଦୀ ସଂଗଠନ ହମାସ ପକ୍ଷରୁ ଇସ୍ରାଏଲର ରାଜଧାନୀ ଜେରୁଜେଲମରେ ଆକ୍ରମଣ ହୋଇଥିଲା। ଜନସାଧାରଣ ପ୍ରାର୍ଥନା ସଭାରେ ଏକାଠି ହୋଇ ପ୍ରାର୍ଥନା କରୁଥିବାବେଳେ ହମାସ ଘଣ୍ଟାଏ ଭିତରେ ୫ ହଜାର ରକେଟ ମାଡ଼ କରିଥିଲା, ଯେଉଁଥିରେ ୧୨୦୦ରୁ ଅଧିକ ଇସ୍ରାଏଲ ନାଗରିକ ପ୍ରାଣ ହରାଇଥିଲେ। ଆଜି ଏହି ଘଟଣାକୁ ବର୍ଷେ ପୂରିଥିବାବେଳେ ଇସ୍ରାଏଲ ଗାଜାପଟିରେ ହମାସ ସଂଗଠନ ଉପରେ ଏବଂ ଲେବାନନରେ ହେଜବୋଲ୍ଲା ସଂଗଠନ ଉପରେ ଜୋରଦାର ଆକ୍ରମଣ ଚଳାଇଛି। ଗାଜା ଏବଂ ବେରୁତରେ ଏୟାରଷ୍ଟ୍ରାଇକ ଜରିଆରେ ଘନ ଘନ ବୋମାମାଡ଼ କରାଯାଉଛି। ଛାତିଥରା ଆକ୍ରମଣର ଦୃଶ୍ୟର ଭିଡିଓ ସାମାଜିକ ଗଣମାଧ୍ୟମରେ ପ୍ରକାଶ ପାଇଛି।
ସୋମବାର ମାଉଣ୍ଟ ଲେବାନନ ଗବର୍ନରେଟର ସିନ ଏଲ ଫିଲରେ ପ୍ରଚଣ୍ଡ ବିସ୍ଫୋରଣ ଘଟିଥିଲା। ଇସ୍ରାଏଲ ପ୍ରତିରକ୍ଷା ବାହିନୀ(ଆଇଡିଏଫ) ପକ୍ଷରୁ ଆକାଶମାର୍ଗରୁ ବୋମାମାଡ଼ କରାଯାଇଥିଲା। ଏଥିରେ କାହାର ମୃତାହତ ନେଇ କୌଣସି ସୂଚନା ମିଳି ନ ଥିଲେ ହେଁ ବିସ୍ଫୋରଣର ତୀବ୍ରତା ବହୁ ପ୍ରଚଣ୍ଡ ଥିବା ଭିଡିଓରେ ଦେଖିବାକୁ ମିଳିଛି।
