ନୂଆଦିଲ୍ଲୀ: ଡୋମିନିକା ହାଇକୋର୍ଟ ସୋମବାର ପଳାତକ ଅପରାଧୀ ମେହୁଲ ଚୋକ୍ସିଙ୍କୁ ଅନ୍ତରୀଣ ଜାମିନ ମଞ୍ଜୁର କରିଛନ୍ତି । ସ୍ୱାସ୍ଥ୍ୟଗତ କାରଣରୁ ତାଙ୍କୁ ଏହି ଜାମିନ ଦିଆଯାଇଛି । ଚୋକ୍ସିଙ୍କୁ ତାଙ୍କର ସ୍ନାୟବିକ ସମସ୍ୟାର ଚିକିତ୍ସା ନିମନ୍ତେ ଆଣ୍ଟିଗୁଆ ଏବଂ ବାରବାଡୋସ ଯିବାକୁ ମଧ୍ୟ ଅନୁମତି ଦିଆଯାଇଛି । ତେବେ ସେ ଯାତ୍ରା କରିବାକୁ ସମର୍ଥ ହେବା ପର୍ଯ୍ୟନ୍ତ ତାଙ୍କର ଏହି ଜାମିନ ଆଦେଶ ବଳବତ୍ତର ରହିବ ବୋଲି ଅଦାଲତଙ୍କ ପକ୍ଷରୁ କୁହାଯାଇଛି । ଚୋକ୍ସିଙ୍କ ପକ୍ଷରୁ ମାମଲା ଲଢୁଥିବା ଆଇନଜୀବୀ ଅଦାଲତରେ ତାଙ୍କର ସ୍ୱାସ୍ଥ୍ୟଗତ କାରଣ ଦର୍ଶାଇ ଜାମିନ ଆବେଦନ କରିବା ପରେ ସରକାରୀ ଓକିଲ ଏଥିପାଇଁ ତାଙ୍କୁ ଆଣ୍ଟିଗୁଆ ଯିବାରେ ତାଙ୍କର କୌଣସି ଆପତ୍ତି ନଥିବା କହିଥିଲେ । ସୂଚନାଯୋଗ୍ୟ ଯେ ୨୦୧୮ରେ ଭାରତ ଛାଡିବା ପରେ ଚୋକ୍ସି ଆଣ୍ଟିଗୁଆରେ ଜଣେ ନାଗରିକ ଭାବରେ ଅବସ୍ତାନ କରୁଛନ୍ତି ।
ଚୋକ୍ସିଙ୍କୁ ୧୦ ହଜାର ପୂର୍ବ କାରିବିଆନ୍ ଡଲାର (ପ୍ରାୟ ୨.୭୫ ଲକ୍ଷ ଟଙ୍କା) ଅଦାଲତରେ ଜାମିନ ନିମନ୍ତେ ଜମା କରିବାକୁ ଆଦେଶ ଦିଆଯାଇଛି । ଏଥିସହିତ ଚୋକ୍ସି ବେଆଇନ ଭାବରେ ମଇ ୨୩ ତାରିଖରେ ଡୋମିନିକାକୁ ପ୍ରବେଶ କରିଥିବା ଅଭିଯୋଗରେ ତାଙ୍କ ବିରୁଦ୍ଧରେ ଜଣେ ମାଜିଷ୍ଟ୍ରେଟଙ୍କ ଅଦାଲତରେ ଚାଲିଥିବା ମାମଲାର ବିଚାର ପ୍ରକ୍ରିୟାକୁ ମଧ୍ୟ ହାଇକୋର୍ଟ ସ୍ଥଗିତ ରଖିଛନ୍ତି । ସୂଚନାଯୋଗ୍ୟ ଯେ ଭାରତରେ ୧୩,୫୦୦ କୋଟି ଟଙ୍କାର ପଞ୍ଜାବ ନ୍ୟାସନାଲ ବ୍ୟାଙ୍କ ଦୁର୍ନୀତିରେ ୬୨ ବର୍ଷ ବୟସ୍କ ଚୋକ୍ସିଙ୍କୁ ଭାରତ ସରକାର ଅନ୍ୟତମ ମୁଖ୍ୟ ଅଭିଯୁକ୍ତ ଦର୍ଶାଇବା ସହିତ ତାଙ୍କୁ ସ୍ୱଦେଶ ଫେରାଇ ଆଣିବାକୁ ପ୍ରୟାସ କରୁଛନ୍ତି ।
