ଜାକାର୍ତା : ଇଣ୍ଡୋନେସିଆ ରାଷ୍ଟ୍ରପତି ନିର୍ବାଚନରେ କ୍ରମାଗତ ଦ୍ୱିତୀୟ ଥର ଜୋକେ ୱିଡୋଡୋ ବିଜୟୀ ହୋଇଛନ୍ତି। ନିର୍ବାଚନ ଆୟୋଗ ସୂଚନା ଦେଇଛନ୍ତି ଯେ ରାଷ୍ଟ୍ରପତି ନିର୍ବାଚନରେ ଇଣ୍ଡୋନେସିଆ ପାର୍ଟି ଅଫ ଷ୍ଟ୍ରଗଲର ସଦସ୍ୟ ୱିଡୋଡୋ ନିକଟତମ ପ୍ରତିଦ୍ୱନ୍ଦ୍ୱୀ ସାବୁୟାଁତୋଙ୍କୁ ପରାସ୍ତ କରିଛନ୍ତି। ଅପରପକ୍ଷରେ ପରାଜିତ ପ୍ରାର୍ଥୀ ସାବୁୟାଁତୋ ନିର୍ବାଚନରେ ହେରଫେରର ଅଭିଯୋଗ ଆଣିଛନ୍ତି। ସେ ନିର୍ବାଚନ ଫଳାଫଳ ବିରୋଧରେ କୋର୍ଟଙ୍କ ଦ୍ୱାରସ୍ଥ ହେବେ ବୋଲି ପ୍ରକାଶ କରିଛନ୍ତି। ଭାରତ ଓ ଆମେରିକା ପରେ ଇଣ୍ଡୋନେସିଆ ହେଉଛି ବିଶ୍ୱର ତୃତୀୟ ବଡ଼ ଗଣତାନ୍ତ୍ରିକ ଦେଶ।
୧୭ ଅପ୍ରେଲରେ ଅନୁଷ୍ଠିତ ନିର୍ବାଚନର ଫଳାଫଳ ଘୋଷଣା ବୁଧବାର ହେବାର ଥିଲା। ମାତ୍ର ହିଂସା ଏବଂ ବିରୋଧ ପ୍ରଦର୍ଶନ ଆଶଙ୍କାରେ ନିର୍ବାଚନ ଆୟୋଗ ଗୋଟିଏ ଦିନ ପୂର୍ବରୁ ଅର୍ଥାତ ମଙ୍ଗଳବାର ନିର୍ବାଚନ ପରିଣାମ ପ୍ରକାଶ କରିଛନ୍ତି। ନିର୍ବାଚନ ଆୟୋଗ ଏଥିପାଇଁ ଆଗୁଆ ନୋଟିସ୍ ଜାରି କରିଥିଲେ। ୨୦୧୪ ରାଷ୍ଟ୍ରପତି ନିର୍ବାଚନରେ ସାବୁୟାଁତୋ ୱିଡୋଡୋଙ୍କ ନିକଟରୁ ପରାସ୍ତ ହୋଇଥିଲେ। ଇଣ୍ଡୋନେସିଆରେ ୧୯ କୋଟିରୁ ଅଧିକ ଭୋଟର ଅଛନ୍ତି। ଏହି ନିର୍ବାଚନରେ ୨ ଲକ୍ଷ ୪୫ ହଜାର ଲୋକ ବିଭିନ୍ନ ପଦ ପାଇଁ ନାମାଙ୍କନ ଦାଖଲ କରିଥିଲେ। ନିର୍ବାଚନ ଫଳ ଘୋଷଣା ପରେ ହିଂସା ଆଶଙ୍କାରେ ରାଜଧାନୀ ଜାକାର୍ତାରେ ୩୨ ହଜାର ସୁରକ୍ଷା କର୍ମୀଙ୍କୁ ମୁତୟନ କରାଯାଇଛି। ନିର୍ବାଚନ ଆୟୋଗଙ୍କ କାର୍ଯ୍ୟାଳୟରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ପୁଲିସ୍ ଆଇଏସ୍ ଆତଙ୍କବାଦୀ ସମେତ କେତେକ ସନ୍ଦିଗ୍ଧ ଲୋକଙ୍କୁ ଗିରଫ କରିଛି।
ପ୍ରକାଶଯୋଗ୍ୟ ଯେ ୨୦୧୮ରେ ଭାରତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇଣ୍ଡୋନେସିଆ ଗସ୍ତରେ ଯାଇଥିଲେ। ଏହି ଅବସରରେ ମୋଦୀ ଏବଂ ୱିଡୋଡୋ ରାମାୟଣ-ମହାଭାରତ ଶୀର୍ଷକରେ ଆୟୋଜିତ ଗୁଡ଼ି ଉଡ଼ା ପ୍ରଦର୍ଶନୀରେ ଭାଗ ନେଇଥିଲେ।
ଇଣ୍ଡୋନେସିଆ ରାଷ୍ଟ୍ରପତି ଭାବେ କ୍ରମାଗତ ଦ୍ୱିତୀୟ ଥର ନିର୍ବାଚିତ ହେଲେ ଜୋକୋ ୱିଡୋଡୋ
Popular Categories
Previous article
Next article