୨୦୨୩ରେ ତ୍ରିରାଷ୍ଟ୍ରୀୟ ଶୃଙ୍ଖଳା ଖେଳିବ ଭାରତୀୟ ମହିଳା କ୍ରିକେଟ ଦଳ

ଜୋହାନର୍ସବର୍ଗ: ମହିଳା ଟ୍ବେଣ୍ଟି୨୦ ବିଶ୍ବକପ -୨୦୨୩ ପୂର୍ବରୁ ଭାରତୀୟ ମହିଳା କ୍ରିକେଟ ଦଳ ଦକ୍ଷିଣ ଆଫ୍ରିକା ଗସ୍ତ କରି ତ୍ରିରାଷ୍ଟ୍ରୀୟ ଟୁର୍ଣ୍ଣମେଣ୍ଟ ଖେଳିବ । ଦକ୍ଷିଣ ଆଫ୍ରିକା, ୱେଷ୍ଟଇଣ୍ଡିଜ୍‌ ସହ ଭାରତ ଉକ୍ତ ତ୍ରିରାଷ୍ଟ୍ରୀୟ ଟ୍ବେଣ୍ଟି୨୦ ଟୁର୍ଣ୍ଣାମେଣ୍ଟ ଖେଳିବ। ଉକ୍ତ ଟୁର୍ଣ୍ଣାମେଣ୍ଟ ୨୦୨୩ ଜାନୁଆରୀ ୧୯ରୁ ଫେବୃଆରୀ ୨ ପର୍ଯ୍ୟନ୍ତ ବୁଫାଲେ​‌ା ପାର୍କ କ୍ରିକେଟ ଷ୍ଟାଡ଼ିୟମରେ ଖେଳାଯିବ। ପ୍ରତ୍ୟେକ ଦଳ ବିପକ୍ଷ ଦଳ ସହିତ ୨ଟି ଲେଖାଏଁ ମ୍ୟାଚ ଖେଳିବେ। ଦୁଇ ଶ୍ରେଷ୍ଠ ଦଳ ଫାଇନାଲକୁ ଉନ୍ନୀତ ହେବେ। ଟ୍ବେଣ୍ଟି୨୦ ବିଶ୍ବକପ ୨୦୨୩ ଫେବୃଆରୀ ୧୦ରୁ ୨୬ ପର୍ଯ୍ୟନ୍ତ ଦକ୍ଷିଣ ଆଫ୍ରିକାରେ ଖେଳାଯିବ।ଟ୍ବେଣ୍ଟି୨୦ ବିଶ୍ବକପ ପ୍ରସ୍ତୁତି ନେଇ ଏହି ତ୍ରିରାଷ୍ଟ୍ରୀୟ ଟ୍ବେଣ୍ଟି୨୦ କ୍ରିକେଟ ଟୁର୍ଣ୍ଣାମେଣ୍ଟ ଆୟୋଜିତ ହେବ। ଏହା ବିଶ୍ବକପ ପ୍ରସ୍ତୁତିରେ ସହାୟକ ହେବ ବୋଲି କ୍ରିକେଟ ଦକ୍ଷିଣ ଆଫ୍ରିକା ନିର୍ଦେଶକ ଇନ୍‌ଚି ନେକ୍‌ୱା କହିଛନ୍ତି। ଉକ୍ତ ଟୁର୍ଣ୍ଣାମେଣ୍ଟ କ୍ରିକେଟ ଦକ୍ଷିଣ ଆଫ୍ରିକା, ବିସିସିଆଇ ଓ ୱେଷ୍ଟଇଣ୍ଡିଜ୍‌ କ୍ରିକେଟ ବୋର୍ଡର ମିଳିତ ସହଯୋଗରେ ଖେଳାଯିବ। ଭାରତ ଜାନୁଆରୀ ୧୯ରେ ଦକ୍ଷିଣ ଆଫ୍ରିକା, ୨୩ରେ ୱେଷ୍ଟଇଣ୍ଡିଜ, ୨୮ରେ ଦକ୍ଷିଣ ଆଫ୍ରିକା, ୩୦ରେ ୱେଷ୍ଟଇଣ୍ଡିଜ୍‌ ସହ ମ୍ୟାଚ ଖେଳିବ। ଫେବୃଆରୀ ୨ରେ ଫାଇନାଲ ମ୍ୟାଚ ଖେଳାଯିବ। ସୂଚନାଯୋଗ୍ୟ, ୱେଷ୍ଟଇଣ୍ଡିଜ୍‌ ୨୦୧୬ ମହିଳା ଟ୍ବେଣ୍ଟି୨୦ ବିଶ୍ବକପରେ ଚମ୍ପିଆନ ହୋଇଥିବାବେଳେ ଭାରତ ୨୦୨୦ରେ ରନର୍ସ ଅପ ହୋଇଥିଲା

Comments are closed.