ବ୍ୟାଙ୍କକ୍ : ଭାରତର ଶିବ ଥାପ୍ପା, ଆଶିଷ କୁମାର, ସତୀଶ କୁମାର, ଆଶିଷ, ଏଲ.ସରିତା ଦେବୀ, ମନୀଷା, ନିଖତ୍ ଜରିନ ପ୍ରମୁଖ ଏଠାରେ ଚାଲିଥିବା ଏସୀୟ ବକ୍ସିଂ ଚମ୍ପିଆନସିପ୍ରେ ସେମିଫାଇନାଲକୁ ଉନ୍ନୀତ ହୋଇଛନ୍ତି। ମଙ୍ଗଳବାର ପୁରୁଷ ୬୦ କିଗ୍ରା ବର୍ଗ କ୍ବାର୍ଟର ଫାଇନାଲରେ ଶିବ ୫-୦ ପଏଣ୍ଟରେ ଥାଇଲାଣ୍ଡର ରୁଜାକ୍ରାନ୍ ଜୁନ୍ତ୍ରୋଙ୍ଗ୍ଙ୍କୁ ପରାସ୍ତ କରିଛନ୍ତି। ସେମିଫାଇନାଲରେ ଶିବ କାଜାଖସ୍ତାନର ଜାକିର ସଫିଉଲିନ୍ଙ୍କୁ ଭେଟିବେ। ସେମିକୁ ଉନ୍ନୀତ ହେବାସହ ଶିବ ଏହି ଟୁର୍ଣ୍ଣାମେଣ୍ଟରେ କ୍ରମାଗତ ଚତୁର୍ଥ ଥର ପଦକ ଜିତିବା ଆଶାକୁ ନିଶ୍ଚିତ କରିପାରିଛନ୍ତି। ଶିବ ୨୦୧୩ରେ ସ୍ବର୍ଣ୍ଣପଦକ ଜିତିଥିବାବେଳେ ୨୦୧୫ରେ ବ୍ରୋଞ୍ଜ ଓ ୨୦୧୭ରେ ରୌପ୍ୟପଦକ ଜିତିଥିଲେ।
ପୁରୁଷ ୭୫ କିଗ୍ରା ବର୍ଗ କ୍ବାର୍ଟର ଫାଇନାଲରେ ଆଶିଷ କୁମାର କିର୍ଗିସ୍ତାନର ଓମରବେକ୍ ଉଲୁ ବେଜିଜିଟ୍ଙ୍କୁ ପରାସ୍ତ କରିଥିବାବେଳେ ୬୯ କିଗ୍ରା ବର୍ଗ କ୍ବାର୍ଟର ଫାଇନାଲରେ ଆଶିଷ ଭିଏତନାମର ତ୍ରାନ୍ ଡୁକ୍ ଥୋଙ୍କୁ ଓ ୯୧ କିଗ୍ରା ବର୍ଗରେ ସତୀଶ ଦକ୍ଷିଣ କୋରିଆର କିମ୍ ଡୋଇଓନଙ୍କୁ ପରାସ୍ତ କରିଛନ୍ତି। ତେବେ ପୁରୁଷ ୯୧ କିଗ୍ରା ବର୍ଗ କ୍ବାର୍ଟର ଫାଇନାଲରେ ଭାରତର ନମନ ତନୱାର ଜୋର୍ଡାନର ହୁସେନ ଏହସାସ୍ଙ୍କଠାରୁ ହାରିଯାଇଛନ୍ତି।
ଅପରପକ୍ଷରେ ମହିଳା ୬୦ କିଗ୍ରା ବର୍ଗ କ୍ବାର୍ଟର ଫାଇନାଲରେ ସରିତା କାଜାଖସ୍ତାନର ରିମା ଭୋଲୋସେଙ୍କୋଙ୍କୁ ପରାସ୍ତ କରିଥିବାବେଳେ ମନୀଷା ଫିଲିପାଇନ୍ସର ପେଟେସିଓ ଜାନାଇସ୍ଙ୍କୁ ହରାଇଛନ୍ତି। ମହିଳା ୫୧ କିଗ୍ରା ବର୍ଗରେ ନିଖତ୍ କାଜାଖସ୍ତାନର ନାଜିମ୍ କିଜାଇବେଙ୍କୁ ପରାସ୍ତ କରି ସେମିଫାଇନାଲରେ ପ୍ରବେଶ କରିଛନ୍ତି।
ସେମିରେ ଶିବ, ଆଶିଷ, ସରିତା ଓ ମନୀଷା
Popular Categories
Previous article
Next article