ଭାରତ କରିବ ମହାକାଶରେ ଘର – ଚନ୍ଦ୍ରଯାନ ସଫଳତା ପରେ ମହାକାଶରେ ଇସ୍ରୋ ସ୍ଥାପନ କରିବ…

ନୂଆଦିଲ୍ଲୀ – ଚନ୍ଦ୍ରଯାନ-୩ ଏବଂ ଆଦିତ୍ୟ ଏଲ୍‌-୧ର ସଫଳତା ପରେ ଏବେ ଭାରତୀୟ ଅନ୍ତରୀକ୍ଷ ଗବେଷଣା ସଂସ୍ଥା ଇସ୍ରୋ ମହାକାଶରେ ଆଉ ଏକ ସ୍ୱତନ୍ତ୍ରକାର୍ଯ୍ୟ କରିବା ପାଇଁ ଯାଉଛି । ଗଗନ ଯାନରେ ମହାକାଶକୁ ମାନବ ପଠାଇବ ଇସ୍ରୋ । କେବଳ ଏତିକି ନୁହେଁ ମହାକାଶରେ ଏକ ସ୍ପେସ୍‌ ଷ୍ଟେସନ୍‌ ବା ଅନ୍ତରୀକ୍ଷ ଷ୍ଟେସନ୍‌ ସ୍ଥାପନ କରିବ । ଏଥିରେ ବୈଜ୍ଞାନିକମାନେ ରହି ବିଭିନ୍ନ ପ୍ରକାରର ଗବେଷଣା କରିପାରିବେ । ଏହି ସ୍ପେସ୍‌ ଷ୍ଟେସନ୍‌କୁ ଭାରତ ୨୦୨୮ ମସିହା ମଧ୍ୟରେ ବିକଶିତ କରିବା ସହ ମହାକାଶରେ ସ୍ଥାପନ କରିପାରିବ ବୋଲି ଇସ୍ରୋ ପକ୍ଷରୁ ସୂଚନା ଦିଆଯାଇଛି । ୨୦୨୫ ମସିହାରେ ଏହାର ରାଉଣ୍ଡ ଟେଷ୍ଟିଂ କରାଯିବ । ଇସ୍ରୋର ଅଧ୍ୟକ୍ଷ ସୋମନାଥ ଭାରତରେ ସ୍ପେସ୍‌ ଷ୍ଟେସନ୍‌ ପ୍ରକଳ୍ପ ବିଷୟରେ ସୂଚନା ଦେଇଛନ୍ତି ।

ଗୁରୁବାରରେ ଫରିଦାବାଦରେ ଭାରତ ଅନ୍ତରାଷ୍ଟ୍ରୀୟ ବିଜ୍ଞାନ ମହୋତ୍ସବରେ ଅଂଶଗ୍ରହଣ କରିବା ଅବସରରେ ସେ ଏହି ସୂଚନା ଦେଇଛନ୍ତି । ଆସନ୍ତା ବର୍ଷ ମଧ୍ୟରେ ଅନ୍ତରୀକ୍ଷ ଷ୍ଟେସନର ପ୍ରଥମ ପର୍ଯ୍ୟାୟର ପରୀକ୍ଷଣ କରାଯିବ ବୋଲି ସେ କହିଛନ୍ତି । ୨୦୨୮ ମସିହା ମଧ୍ୟରେ ଏହାର ପ୍ରାଥମିକ ଗବଷଣାଗାର ମହାକାଶରେ ସ୍ଥାପିତ ହୋଇପାରିବ । ୨୦୩୫ ମସିହା ସୁଦ୍ଧା ଏହା ସମ୍ପୂର୍ଣ୍ଣ ହେବା ସହ ପୂର୍ଣ୍ଣରୂପେ କାର୍ଯ୍ୟକ୍ଷମ ହେବ ବୋଲି ଇସ୍ରୋ ପକ୍ଷରୁ ସୂଚନା ଦିଆଯାଇଛି