ଆଠଗଡ : ଲଘୁଚାପ ଜନିତ ବର୍ଷା ସତ୍ତ୍ବେ ଆଠଗଡ ସହରର ୬ଟି ପ୍ରମୁଖ ବଜାରର ପୂଜାକମିଟି ପକ୍ଷରୁ ରବିବାର ଭସାଣ ଉତ୍ସବ ଅନୁଷ୍ଠିତ ହୋଇଯାଇଛି । ଭସାଣି ଉତ୍ସବ ପାଇଁ ସମଗ୍ର ଆଠଗଡ ସହରର ସବୁ ପ୍ରମୁଖ ବଜାର ଗୁଡିକ ସଂପୂର୍ଣ୍ଣ ବନ୍ଦ ରହିଛି । ଜଗନ୍ନାଥ ବଜାର ମେଢ, ରଘୁନାଥ ବଜାର, ଲକ୍ଷ୍ମୀ ବଜାର, ସ୍ୱପ୍ନେଶ୍ୱର ବଜାର ଏବଂ ଚାନ୍ଦବାଲି ଛକ ବଜାରର ମେଢ ଗୁଡିକ ଦୁର୍ଗାବଜାରଠାରେ ଏତକ୍ରିତ ହେବା ପରେ ଦୁର୍ଗାବଜାର ମେଢ ସହିତ ଅପରାହ୍ନରେ ଭସାଣି ଉତ୍ସବ ଆରମ୍ଭ ହୋଇଥିଲା। ସବୁ ପୂଜାକମିଟି ପକ୍ଷରୁ ଭଳିକି ଭଳି ବ୍ୟାଣ୍ଡ ବାଜା, ଡିଜେ ଓ ସୁସଜ୍ଜିତ ଆଲୋକ ତୋରଣ ଓ ମାଳାରେ ଭସାଣି ଉତ୍ସବ ଝଲସି ଉଠିଥିଲା । ଆଠଗଡ ଏନଏସି ନଗରପାଳ, ଉପନଗରପାଳ ଓ ସମସ୍ତ କାଉନସିଲର ଲକ୍ଷ୍ମୀବଜାରଠାରେ ଉପସ୍ଥିତ ରହି ସମସ୍ତ ପୂଜାକ ମିଟିର ମେଢକୁ ସ୍ୱାଗତ କରିବା ସହ କର୍ମକର୍ତ୍ତାଙ୍କୁ ପୁଷ୍ପଗୁଚ୍ଛ ଓ ଉତ୍ତରୀୟ ଦେଇ ସମ୍ବର୍ଦ୍ଧିତ କରିଥିଲେ। ଭସାଣି ଉତ୍ସବ ଶାନ୍ତିଶୃଙ୍ଖଳା ରଖିବା ପାଇଁ ଆଇଆଇସି ବାମଦେବ ସ୍ୱାଇଁଙ୍କ ନେତୃତ୍ୱରେ ବ୍ୟାପକ ପୁଲିସ ବ୍ୟବସ୍ଥା କରାଯାଇଥିଲା । ସହର ପରିକ୍ରମା କରିବା ପରେ ମେଢଗୁଡିକୁ ସାପୁଆନଦୀ ନିକଟରେ ଏନଏସି ପ୍ରଶାସନ ପକ୍ଷରୁ ସ୍ୱତନ୍ତ୍ର ଭାବେ ନିର୍ମିତ ପୁଷ୍କରିଣୀରେ ମୂର୍ତ୍ତିଗୁଡିକୁ ବିଳମ୍ବିତ ରାତିରେ ବିସର୍ଜନ କରାଯାଇଥିଲା।
Comments are closed.