ରୁଷ-ୟୁକ୍ରେନ ଯୁଦ୍ଧ ଯୋଗୁ ମନ୍ଥର ହେବ ବିଶ୍ୱ ଅର୍ଥନୀତି ଅଭିବୃଦ୍ଧି ହାର – ଆନ୍ତର୍ଜାତିକ ମୁଦ୍ରାପାଣ୍ଠି

ଡେସ୍କ: ରୁଷ-ୟୁକ୍ରେନ ଯୁଦ୍ଧ ଯୋଗୁଁ ବିଶ୍ୱ ଅର୍ଥନୀତି ଅଭିବୃଦ୍ଧି ହାର ମନ୍ଥର ହେବ ବୋଲି ଆନ୍ତର୍ଜାତିକ ମୁଦ୍ରାପାଣ୍ଠି ଆଶଙ୍କା ପ୍ରକାଶ କରିଛି। ଆନ୍ତର୍ଜାତିକ ମୁଦ୍ରାପାଣ୍ଠି ଏହାର ରିପୋର୍ଟରେ ଚଳିତ ବର୍ଷ ବିଶ୍ୱ ଅର୍ଥନୀତି ୩.୬% ଅଭିବୃଦ୍ଧି ହାସଲ କରିବା ପୂର୍ବାନୁମାନ କରିଛି। ଗତବର୍ଷ ଏହା ୬.୧% ଥିଲା। ଚଳିତବର୍ଷ ବିଶ୍ୱ ଅର୍ଥନୀତି ୪.୪% ଅଭିବୃଦ୍ଧି ହାସଲ କରିବାର ପୂର୍ବରୁ ଅନୁମାନ କରାଯାଇଥିଲା।

ଆନ୍ତର୍ଜାତିକ ମୁଦ୍ରାପାଣ୍ଠି ଦେଇଥିବା ସୂଚନା ଅନୁଯାୟୀ, ଏହି ଯୁଦ୍ଧର ଅର୍ଥନୈତିକ ପ୍ରଭାବ ବିଶ୍ୱର ବିଭିନ୍ନ ପ୍ରାନ୍ତକୁ ବ୍ୟାପିବାରେ ଲାଗିଛି। ଏହା ଯୋଗୁଁ ଅର୍ଥନୈତିକ କାର୍ଯ୍ୟକଳାପ ବାଧାପ୍ରାପ୍ତ ହେବା ସହ ବ୍ୟବସାୟ ଓ ବାଣିଜ୍ୟ ହ୍ରାସ ପାଉଛି ଏବଂ ଇନ୍ଧନ ଓ ଖାଦ୍ୟପଦାର୍ଥର ମୂଲ୍ୟ ବୃଦ୍ଧି ଘଟୁଛି। ରୁଷ ଅର୍ଥନୀତି ଚଳିତ ବର୍ଷ ୮.୫% ହ୍ରାସ ପାଇବାର ମଧ୍ୟ ଆନ୍ତର୍ଜାତିକ ମୁଦ୍ରାପାଣ୍ଠି ପୂର୍ବାନୁମାନ କରିଛି। ଅନ୍ୟପକ୍ଷରେ ୟୁକ୍ରେନ ଅର୍ଥନୀତି ମଧ୍ୟ ୩୫% ହ୍ରାସ ପାଇବ। ଆମେରିକା, ଚୀନ ଓ ୟୁରୋପୀୟ ଦେଶଗୁଡ଼ିକର ଅର୍ଥନୀତି ମଧ୍ୟ ଏହି ଯୁଦ୍ଧ ଯୋଗୁଁ ମନ୍ଥର ହେବ।