ଆଠଗଡରେ ଆନନ୍ଦ ଉଲ୍ଲାସ ମଧ୍ୟରେ ଇଦ୍ ପାଳିତ

ଆଠଗଡ : ଆଠଗଡ ସହରରେ ବସବାସ କରୁଥିବା ମୁସଲମାନ ଭାଇଭଉଣୀ ସୋମବାର ଇଦୁଲ ଫିତର ବା ଦାନର ପର୍ବ ଅତ୍ୟନ୍ତ ଆନନ୍ଦ ଉଲ୍ଲାସ ମଧ୍ଯରେ ପାଳନ କରିଛନ୍ତି ।  ଏକ ମାସ ଧରି ରମଜାନ୍ ପାଳନ ଅବସରରେ ମୁସଲମାନ ସମ୍ପ୍ରଦାୟର ଭାଇଭଉଣୀ ରୋଜା ବା ଉପବାସ ରଖିଥିଲେ । ଆକାଶରେ ନୂତନ ଚାନ୍ଦ ଦେଖିବା ପରଦିନ ଇଦ୍ ପର୍ବ ପାଳନ ହୋଇଥିଲା । ମହାନ ଇଦ୍ ପର୍ବ ଉପଲକ୍ଷେ ସହର ମୁସଲମାନ ସାହି ଓ ବସ୍ତି ସମେତ ବିଭିନ୍ନ ମସଜିଦ୍ ସୁନ୍ଦର ସାଜସଜ୍ଜା ସାଙ୍ଗକୁ ସାମୁହିକ ନମାଜ ପାଠ କରାଯାଇଥିଲା । ଏଥିସହିତ ମୁସଲମାନ ଭାଇମାନେ ନୂତନ ବସ୍ତ୍ର ପରିଧାନ ସାଙ୍ଗକୁ ମହିଳାମାନେ ନୂତନ ବସ୍ତ୍ର, ଚୁଡି ଓ ମେହେନ୍ଦି ଇତ୍ୟାଦିରେ ସଜେଇ ହୋଇଥିଲେ । ସମସ୍ତଙ୍କ ଘରେ ଭଳି କି ଭଳି ଖାଦ୍ଯ ଯଥା ସିମେଇ, ଲଚ୍ଛା, ଫାଲୁଦା ଏବଂ ବିରିୟାନୀ ଆଦି ପ୍ରସ୍ତୁତ ହୋଇଥିଲା। ପୁରୁଷମାନେ ବିଭିନ୍ନ ମସଜିଦରେ ସାମୁହିକ ନମାଜ ପାଠ ପରେ ପରସ୍ପରକୁ ଆଲିଙ୍ଗନ କରି ଇଦ୍ ପର୍ବର ଅଭିନନ୍ଦନ ଜଣାଇଥିଲେ । ପରମ୍ପରା ଅନୁଯାୟୀ ନମାଜ ପାଠ ପୂର୍ବରୁ ମୁସଲମାନ ଭାଇମାନେ ନିଜ ସମ୍ପ୍ରଦାୟର ଗରିବ ଶ୍ରେଣୀର ଲୋକଙ୍କୁ ବିଭିନ୍ନ ପ୍ରକାର ଦାନ କରିଥିଲେ । ଆଠଗଡର ବଡ ବରେଲି ଜାମା ମସଜିଦରେ ପ୍ରାୟ ୪୦୦ ଜଣ, ଛୋଟ ମସଜିଦରେ ପ୍ରାୟ ୧୦୦ଜଣ ଏବଂ କନ୍ତୋଲ ମସଜିଦରେ ୫୦ରୁ ଉର୍ଦ୍ଧ୍ବ ଲୋକ ନମାଜ ପାଠ କରିଥିଲେ । ଆଠଗଡର ଭାଇଚାରାର ନିଦର୍ଶନ ସ୍ୱରୂପ ଜାତି, ଧର୍ମ ଓ ବର୍ଣ୍ଣ ନିର୍ବିଶେଷରେ ମୁସଲମାନ ସମ୍ପ୍ରଦାୟର ଏହି ମହାନ ପର୍ବ ସମସ୍ତଙ୍କ ସହଯୋଗରେ ଶାନ୍ତିପୂର୍ଣ୍ଣ ଭାବେ ପାଳିତ ହୋଇଥିଲା । ମହମ୍ମଦ ଅମିନ୍, ସୟଦ୍ ମହମ୍ମଦ, ମହମ୍ମଦ ଅସଫାକ୍ ହୁସେନ୍, ଖାଲିଦ୍ ମହମ୍ମଦ, ମହମ୍ମଦ ଅସଲମ୍, ମୁସାହିଦ ରଜା, ସାଦ୍ ଅହେମଦ୍ ପ୍ରମୁଖ ସାମୁହିକ ନମାଜ ପାଠ କାର୍ଯ୍ୟକ୍ରମ ପରିଚାଳନା କରିଥିଲେ।