ଲକ୍ଷ୍ମୌ: ପୁଲୱାମା ଆକ୍ରମଣରେ ଶହୀଦ ଯବାନଙ୍କୁ ଦେଶବାସୀ ଗଭୀର ଶ୍ରଦ୍ଧାଞ୍ଜଳି ଜଣାଇଛନ୍ତି। କିନ୍ତୁ ସେମାନଙ୍କ ମଧ୍ୟରୁ ଅନେକେ ସମସ୍ତ ଶହୀଦଙ୍କୁ ସାରା ଜୀବନ ମନେ ରଖି ନ ପାରନ୍ତି। କିନ୍ତୁ ଏହାକୁ ଭୁଲ ପ୍ରମାଣିତ କରିଛନ୍ତି ଉତ୍ତରପ୍ରଦେଶର ଜଣେ ଯୁବକ। ସେ ଶହୀଦ ଯବାନମାନଙ୍କୁ ନିଆରା ଢଙ୍ଗରେ ଶ୍ରଦ୍ଧାଞ୍ଜଳି ଜଣାଇ ନିଜ ଦେଶଭକ୍ତିର ପରିଚୟ ଦେଇଛନ୍ତି। ସେ ନିଜ ଶରୀରରେ ୪୨ ଜଣ ଶହୀଦ ଯବାନଙ୍କ ନାମକୁ ଚିତା କୁଟାଇଛନ୍ତି। ସେ କହିଛନ୍ତି ଦିନେ ଅଧେ ନୁହେଁ, ସାରା ଜୀବନ ଶହୀଦମାନଙ୍କୁ ମନେ ରଖିବି।
ସୂଚନା ମୁତାବକ, ଯୁବକଙ୍କ ନାମ ବିଜୟ ଏବଂ ତାଙ୍କ ଘର ରାମଲୀ ଜନପଦ ଅନ୍ତର୍ଗତ ଭାରସୀ ଗାଁରେ। ଯୁବକ ଜଣକ କହିଛନ୍ତି ପିଲା ବେଳୁ ତାଙ୍କର ଦେଶ ପ୍ରତି ଗଭୀର ଭକ୍ତି ରହିଛି। ତାଙ୍କ ଭାଇ ମଧ୍ୟ ଦେଶ ସେବା କରୁଛନ୍ତି। ତେଣୁ ସେ ପୁଲୱାମାରେ ଶହୀଦ ଯବାନମାନଙ୍କୁ ଶ୍ରଦ୍ଧାଞ୍ଜଳି ଜଣାଇବା ଉଦ୍ଦେଶ୍ୟରେ ଏପରି କରିଛନ୍ତି। ସେ ତାଙ୍କ ପିଠିରେ ପ୍ରଥମେ ଲେଖିଛନ୍ତି ଯେ, ପୁଲୱାମାରେ ଶହୀଦ ଯବାନମାନଙ୍କୁ ଶ୍ରଦ୍ଧାଞ୍ଜଳି। ତା’ ପରେ ୪୨ ଜଣ ଶହୀଦଙ୍କ ନାମ ଲେଖିଛନ୍ତି।
ସର୍ବପ୍ରଥମେ ରହିଛି ଜିମାଲ ସିଂହଙ୍କ ନାମ। ଏହା ପରେ ନସିର ଅହମ୍ମଦ, ସୁଖବିନ୍ଦର ସିଂହ, ରୋହିତାସ ଲାମ୍ବା, ତିଲକ ରାଜଙ୍କ ସମେତ ଅନ୍ୟ ଶହୀଦଙ୍କ ନାମ। ଏହା ପୂର୍ବରୁ ବିଜୟ ପ୍ରଧାନମନ୍ତୀଙ୍କୁ ରକ୍ତରେ ଏକ ଚିଠି ଲେଖି ପଠାଇଥିଲେ। ସେଥିରେ ସେ ଉଲ୍ଲେଖ କରିଥିଲେ ଯେ, ଯଦି ଶହୀଦମାନଙ୍କୁ ନ୍ୟାୟ ନ ମିଳିବ ତା’ହେଲେ ଦେଶର ଯୁବକମାନେ ଆନ୍ଦୋଳନ ଆରମ୍ଭ କରିବେ। ଶନିବାର ଇଣ୍ଡିଆ ଗେଟ୍ ନିକଟରେ ଶହୀଦମାନଙ୍କୁ ନ୍ୟାୟ ପ୍ରଦାନ ଲାଗି ଧାରଣା ଦିଆଯାଉଛି।
