ନୂଆଦିଲ୍ଲୀ: ଉତ୍ତର ଭାରତରେ ଗତ ତିନି ଦିନ ଧରି ବାଦଲ ଫଟା ବର୍ଷା ଜାରି ରହିଥିବା ବେଳେ ଗତ ୪୮ ଘଣ୍ଟା ମଧ୍ୟରେ ହିମାଚଳ ପ୍ରଦେଶରେ ବନ୍ୟାର କରାଳ ରୂପ ଦେଖିବାକୁ ମିଳିଛି । ବ୍ୟାସ ଓ ରାବୀ ନଦୀରେ ଜଳସ୍ତର ବୃଦ୍ଧି ଘଟି କୁଲ୍ଲୁ, ଚମ୍ବା ଓ ମଣ୍ଡି ଜିଲାରେ ଭୟାବହ ପରିସ୍ଥିତି ସୃଷ୍ଟି ହେଇଛି। ବନ୍ୟା ଯୋଗୁଁ କୁଲ୍ଲୁ-ମନାଲୀ ୧୨୬ ନମ୍ବର ଜାତୀୟ ରାଜପଥ ବନ୍ଦ ରହିଛି । କୁଲ୍ଲୁ ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି । ବ୍ୟାସ ନଦୀରେ ବନ୍ୟା ଯୋଗୁଁ ମନାଲୀରେ ଥୁଆ ହୋଇଥିବା ଏକ ବସ୍ ଭାସିଯାଇଛି। ବସରେ କେହି ଯାତ୍ରୀ ନଥିବା ଜଣାପଡିଛି।
ଅନ୍ୟ ପକ୍ଷରେ କୁଲ୍ଲୁ-ମନାଲୀର ଏକ ସ୍ଥନାରେ ଟ୍ରକ୍ ସମେତ ଅନେକ ଗାଡି ନଦୀରେ ଭାସି ଯାଇଛି । ସେହିପରି ବଢି ପାଣିରେ ଏକ କାର ଭାସିଯିବାରୁ ସେଥିରେ ଥିବା ୫ଜଣ ଯାତ୍ରୀ ନିଖୋଜ ହୋଇ ଯାଇଛନ୍ତି ବୋଲି ଉପଜିଲାପାଳ ରମନ ଗରସଙ୍ଗୀ ସୂଚନା ଦେଇଛନ୍ତି। କୁଲ୍ଲୁର ଓଟରେ ବାଦଲ ଫଟା ବର୍ଷା ଯୋଗୁଁ କୁଲ୍ଲୁ-ମନାଲୀ ମଧ୍ୟରେ ଥିବା ଡୋଭି ବିହାଲରେ ୧୯ ଜଣ ଫସି ରହିଛନ୍ତି । ହେଲିକପ୍ଟର ସାହାର୍ଯ୍ୟରେ ସେମାନଙ୍କୁ ଉଦ୍ଧାର କରାଯାଉଛି।