ଭୁବନେଶ୍ୱର: ଆସନ୍ତା ୨ ତାରିଖ ବେଳକୁ ବଙ୍ଗୋପସାଗରରେ ପୁଣି ଏକ ଲଘୁଚାପ ସୃଷ୍ଟି ହେବାକୁ ଯାଉଛି। ଏହା କ୍ରମଶଃ ଘନୀଭୂତ ହେବ। ତେବେ ଦକ୍ଷିଣ ଚୀନ ପଟୁ ଆଉ ଏକ ଅବପାତ ଆସି ଓଡ଼ିଶା ଉପରେ ଥିବା ଲଘୁଚାପ ସହିତ ମିଶିବ। ଏହାର ପ୍ରଭାବରେ ୪ରୁ ୬ ତାରିଖ ମଧ୍ୟରେ ଉପକୂଳ ଓଡ଼ିଶାରେ ପ୍ରବଳ ବର୍ଷା
ହେବା ସମ୍ଭାବନା ରହିଛି। ୪ରୁ ୫ ତାରିଖ ମଧ୍ୟରେ ଅଧିକାଂଶ ଜିଲାରେ ବର୍ଷା ହେବା ନେଇ ଆଞ୍ଚଳିକ ପାଣିପାଗ ବିଭାଗ ପୂର୍ବରୁ ପୂର୍ବାନୁମାନ କରିଥିବାବେଳେ ବୁଧବାର ସେଣ୍ଟର ଫର୍ ଏନଭିରନ୍ମେଣ୍ଟ ଆଣ୍ଡ କ୍ଲାଇମେଟ୍ (ସିଇସି) ପକ୍ଷରୁ କୁହାଯାଇଛି ଯେ ୨ ତାରିଖ ବେଳକୁ ଉତ୍ତର ପଶ୍ଚିମ ବଙ୍ଗୋପସାଗରରେ ଏକ ଲଘୁଚାପ ସୃଷ୍ଟି ହେବାର ସମ୍ଭାବନା ଅଛି। ଏହା କ୍ରମଶଃ ଘନୀଭୂତ ହୋଇ ୪ ତାରିଖ ବେଳକୁ ଗଭୀର ଅବପାତର ରୂପ ନେବ। ଏଥିଯୋଗୁଁ ୩ ତାରିଖରୁ ବର୍ଷା ହେବ। ତେବେ ଏହି ସମୟରେ ଦକ୍ଷିଣ ଚୀନ୍ ଆଡ଼ୁ ଏକ ଅବପାତ ପ୍ରଥମେ ବଙ୍ଗୋପସାଗରର ଉତ୍ତର-ଉତ୍ତରପଶ୍ଚିମ ଦିଗକୁ ଗତି କରି ଓଡ଼ିଶା ଅଭିମୁଖେ ମୁହାଁଇବ। ୫ ତାରିଖ ବେଳକୁ ଚୀନ୍ରୁ ଆସିଥିବା ଅବପାତ ଓଡ଼ିଶାର ଗଭୀର ଅବପାତ ସହ ମିଶିବ। ୫ ତାରିଖ ରାତି କିମ୍ବା ୬ ତାରିଖ ସକାଳେ ଦୁଇ ଅବପାତ ଓଡ଼ିଶା-ପଶ୍ଚିମବଙ୍ଗ ସୀମାରେ ଥିବା ଦୀଘା ଉପକୂଳ ଅତିକ୍ରମ କରିବ। ଏହାର ପ୍ରଭାବରେ ୨ ତାରିଖରୁ ବାଲେଶ୍ବର, ଭଦ୍ରକ, ଯାଜପୁର, କେନ୍ଦୁଝର, ମୟୂରଭଞ୍ଜ, କେନ୍ଦ୍ରାପଡ଼ା, ଜଗତସିଂହପୁର, ଖୋର୍ଦ୍ଧା, କଟକ ଓ ଢ଼େଙ୍କାନାଳରେ ବର୍ଷା ବଢ଼ିବ। ସିଇସିର ନିର୍ଦେଶକ ଡ଼ ଶରତ ଚନ୍ଦ୍ର ସାହୁ କହିଛନ୍ତି, ବିଶେଷକରି ମୟୂରଭଞ୍ଜ, କେନ୍ଦୁଝର, ଅନୁଗୋଳ, ଢ଼େଙ୍କାନାଳ, ନୟାଗଡ଼, ସମ୍ବଲପୁର, ସୁନ୍ଦରଗଡ଼, ବରଗଡ଼, ଝାରସୁଗୁଡ଼ା, ଦେବଗଡ଼, ବଲାଙ୍ଗୀର, ସୋନପୁର, ବୌଦ୍ଧ, ନୂଆପଡ଼ା, ନବରଙ୍ଗପୁର, କଳାହାଣ୍ଡି ଓ କନ୍ଧମାଳରେ ଅଧିକ ବର୍ଷା ହୋଇପାରେ। ଏହା ୬ ତାରିଖ ପର୍ଯ୍ୟନ୍ତ ଲାଗିରହିବ। ବର୍ଷା ସହିତ ଉପକୂଳ ଜିଲାରେ ପବନର ବେଗ ୬୦ କିମି ଛୁଇଁବ। ୩ ରୁ ୬ ତାରିଖ ଭିତରେ ମହାନଦୀ, ବ୍ରାହ୍ମଣୀ, ବୈତରଣୀ, ବୁଢ଼ାବଳଙ୍ଗ ଓ ସୁବର୍ଣ୍ଣରେଖା ନଦୀରେ ଜଳସ୍ତର ବୃଦ୍ଧି ପାଇବ ବୋଲି ଡ଼ ସାହୁ କହିଛନ୍ତି। ଅପରପକ୍ଷେ ୪ରୁ ୫ ତାରିଖ ମଧ୍ୟରେ ଅଧିକାଂଶ ଜିଲାରେ ବର୍ଷା ହେବା ନେଇ ଆଞ୍ଚଳିକ ପାଣିପାଗ ବିଭାଗ ପୂର୍ବରୁ ପୂର୍ବାନୁମାନ କରାଯାଇଛି। ଯେଉଁ ମତ୍ସ୍ୟଜୀବୀ ଏବେ ସମୁଦ୍ର ମଧ୍ୟରେ ଅଛନ୍ତି ସେମାନେ ୨ ତାରିଖ ସୁଦ୍ଧା କୂଳକୁ ଫେରି ଆସିବା ପାଇଁ ବିଭାଗ ପକ୍ଷରୁ କୁହାଯାଇଛି।
Comments are closed.