ଗୁରୁଡିଝାଟିଆ : ତୃଣ ମୂଳ ସ୍ବାସ୍ଥ୍ୟ ବିଭାଗର କର୍ମଚାରୀମାନେ ନିକଟସ୍ଥ ସ୍ବାସ୍ଥ୍ୟ ଉପକେନ୍ଦ୍ରରେ ରହିବାର ଥିଲେ ମଧ୍ୟ ସହରୀ ମୋହ ପାଇଁ ରୋଗୀ ହେଉଛନ୍ତି ଦହଗଞ୍ଜ। କଟକ ଜିଲା ବ୍ରହ୍ମପୁର ଗୋଷ୍ଠୀ ସ୍ୱାସ୍ଥ୍ୟ ଅଧିକ୍ଷକଙ୍କ ପରିସର ଭୁକ୍ତ ସ୍ବାସ୍ଥ୍ୟ ଉପକେନ୍ଦ୍ର ବା ଆୟୁଷ୍ମାନ ଆରୋଗ୍ୟ ମନ୍ଦିରରେ ଏଭଳି ଚିତ୍ର ଦେଖା ଦେଇଛି। ସରକାର ଗ୍ରାମାଞ୍ଚଳରେ ବସବାସ କରୁଥିବା ଜନସାଧାରଣଙ୍କୁ ମୌଳିକ ସ୍ବାସ୍ଥ୍ୟ ସୁବିଧା ଯୋଗାଇ ଦେବା ପାଇଁ ପଞ୍ଚାୟତ ମାନଙ୍କରେ ସ୍ବାସ୍ଥ୍ୟ ଉପକେନ୍ଦ୍ର ବା ଆୟୁଷ୍ମାନ ଆରୋଗ୍ୟ ମନ୍ଦିର ପ୍ରତିଷ୍ଠା କରିଛନ୍ତି। ସ୍ବାସ୍ଥ୍ୟ ସମ୍ପର୍କିତ ସମସ୍ୟା ନିଜ ଗାଁ ପାଖରେ ସମାଧାନ କରିପାରିବେ। ସେମାନଙ୍କୁ ଖର୍ଚ୍ଚାନ୍ତ ହୋଇ ଦୂର ଦୂରାନ୍ତ କଟକ କିମ୍ବା ଭୁବନେଶ୍ୱର ଯିବାକୁ ପଡିବ ନାହିଁ।
ତେବେ ଏଠାରେ ରୋଗୀ ମୌଳିକ ସ୍ବାସ୍ଥ୍ୟ ସୁବିଧାରୁ ବଞ୍ଛିତ ହେଉଛନ୍ତି। କେତେକ କର୍ମଚାରୀ ନାମକୁ ମାତ୍ର କାର୍ଯ୍ୟ କ୍ଷେତ୍ରକୁ ଆସି ଉପସ୍ଥାନ ଖାତାରେ ଦସ୍ତଖତ କରି ପଳାଇଛନ୍ତି। ଆଉ କେହି କେହି ଘରେ ରହି କିଛି ବରିଷ୍ଠ ଅଧିକାରୀ ଙ୍କ ସହ ସଲାସୂତରା କରି ମାସକ ଦରମା ନେଉଥିବା ଅଭିଯୋଗ ହେଉଛି। ଏପରି କି ସେମାନଙ୍କ ପାଇଁ ସରକାରୀ କ୍ବାଟର ସୁବିଧା ରହିଥିଲେ ମଧ୍ୟ ସେମାନେ ରହୁନଥିବା ଅଭିଯୋଗ ହୋଇଛି। ଜିଲା ମୁଖ୍ୟ ସ୍ୱାସ୍ଥ୍ୟାଧିକାରୀ ଏଥି ପ୍ରତି ସ୍ୱତନ୍ତ୍ର ଦୃଷ୍ଟି ଦେବାକୁ ଦାବି କରାଯାଇଛି।
