ନୂଆଦିଲ୍ଲୀ : ବିସିସିଆଇ ଆନୁକୂଲ୍ୟରେ ଆୟୋଜିତ ଆଇପିଏଲ୍ର ୨୦୨୫ ସଂସ୍କରଣର ମ୍ୟାଚ୍ ପ୍ରସାରଣ ସମୟରେ ମଦ, ତମାଖୁ ବିଜ୍ଞାପନ ବନ୍ଦ କରିବାକୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ତରଫରୁ ନିର୍ଦେଶ ଦିଆଯାଇଛି। କେନ୍ଦ୍ର ସ୍ବାସ୍ଥ୍ୟ ସେବା ମହାନିର୍ଦେଶକ ଅତୁଲ ଗୋଏଲ ଆଇପିଏଲ୍ ଅଧ୍ୟକ୍ଷ ଅରୁଣ ଧୁମଲଙ୍କୁ ଏକ ପତ୍ର ଲେଖିଛନ୍ତି। ପତ୍ରରେ ଅତୁଲ ଦର୍ଶାଇଛନ୍ତି ଭାରତୀୟ ଯୁବଗୋଷ୍ଠୀଙ୍କ ନିମନ୍ତେ କ୍ରିକେଟର୍ମାନେ ଆଦର୍ଶ। ତେଣୁ କ୍ରିକେଟର୍ମାନେ ପ୍ରତ୍ୟକ୍ଷ କିମ୍ବା ପରୋକ୍ଷ ଭାବେ ମଦ, ତମାଖୁ ବିଜ୍ଞାପନ ସହ ଜଡ଼ିତ ହେବା ଅନୁଚିତ୍। ତେଣୁ ଆଇପିଏଲ୍ ମ୍ୟାଚ୍ ସମୟରେ ଷ୍ଟାଡିୟମ ଭିତରେ ଏବଂ ଟେଲିଭିଜନ୍ରେ ମ୍ୟାଚ୍ ପ୍ରସାରଣରେ ମଦ, ତମାଖୁ ବିଜ୍ଞାପନ ନ କରିବାକୁ ନିର୍ଦେଶାନାମା ଜାରି କରାଯାଇଛି। ଏହାକୁ ଆଇପିଏଲ୍ କର୍ତ୍ତୃପକ୍ଷ କଡ଼ାକଡ଼ି ଭାବେ ପାଳନ କରିବେ। ଆଇପିଏଲ୍ ମ୍ୟାଚ ଚାଲିଥିବା ବେଳେ ଅଧିକାଂଶ ଭାରତୀୟ ଟେଲିଭିଜନରେ ଏହାକୁ ଉପଭୋଗ କରିଥାନ୍ତି। ଏହି ଟୁର୍ଣ୍ଣାମେଣ୍ଟ ବିଭିନ୍ନ କମ୍ପାନୀଙ୍କୁ ନିଜ ସାମଗ୍ରୀର ବିଜ୍ଞାପନ ପ୍ରଦର୍ଶନ କରିବାର ବଳିଷ୍ଠ ମାଧ୍ୟମ ପାଲଟିଛି। ମଦ, ତମାଖୁ ଆଦିରୁ ହୃଦ୍ଯନ୍ତ୍ର, ଫୁସଫୁସ୍ରେ ନାନା ରୋଗ ସୃଷ୍ଟି ହେଉଛି। ଏଥିସହ କର୍କଟ, ମଧୁମେହ, ଉଚ୍ଚ ରକ୍ତଚାପ ରୋଗ ସୃଷ୍ଟି ହେଉଥିବା ବେେଳ ଏଥିରେ ବାର୍ଷିକ ୧୪ ଲକ୍ଷ ବ୍ୟକ୍ତି ପ୍ରାଣ ହରାଇଥାନ୍ତି। ତେଣୁ ଆଇପିଏଲ୍ ଭଳି ଲୋକପ୍ରିୟ ଟୁର୍ଣ୍ଣାମେଣ୍ଟରେ ମଦ, ତମାଖୁ ବିଜ୍ଞାପନ ବନ୍ଦ କରିବା କେନ୍ଦ୍ର ସରକାରଙ୍କ ସାମାଜିକ ଓ ନୈତିକ ଦାୟିତ୍ବ ବୋଲି ଅତୁଲ ସ୍ପଷ୍ଟ କରି ଦେଇଛନ୍ତି। ସେହିପରି ସୁସ୍ଥ ଜୀବନଶୈଳୀ ଆପଣାଇବା ନିମନ୍ତେ ଜନସାଧାରଣଙ୍କୁ ପ୍ରୋତ୍ସାହିତ କରିବା କ୍ରିକେଟର୍ଙ୍କ ନୈତିକ ଦାୟିତ୍ବ ବୋଲି ଅତୁଲ ପତ୍ରରେ ଦର୍ଶାଇଛନ୍ତି।
Popular Categories
Previous article
Next article