ସମାଜ ଡିଜିଟାଲ ଡେସ୍କ: ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଓମ ପ୍ରକାଶ ଚୌତାଲାଙ୍କ ବିୟୋଗରେ ରାଜ୍ୟ ସରକାର ୩ ଦିନିଆ ଶୋକ ଘୋଷଣା କରିଛନ୍ତି। ଚୌତାଲାଙ୍କୁ ସମ୍ମାନାର୍ଥେ ଶୁକ୍ରବାରଠାରୁ ଆସନ୍ତା ରବିବାର ପର୍ଯ୍ୟନ୍ତ ରାଜ୍ୟବ୍ୟାପୀ ଶୋକ ପାଳନ କରାଯିବ। ଏହି ସମୟରେ ଜାତୀୟ ପତାକା ଅଧନମିତ ଅବସ୍ଥାରେ ରହିବ। ରାଜ୍ୟ ସରକାରଙ୍କ ସମସ୍ତ କାର୍ଯ୍ୟକ୍ରମକୁ ବାତିଲ କରିଦିଆଯାଇଥିବାବେଳେ ସରକାରୀ ସ୍ତରରେ କୌଣସି ଉତ୍ସବ ପାଳନ କରାଯିବ ନାହିଁ। ଶନିବାର ସରକାରୀ ଛୁଟି ଘୋଷଣା କରାଯାଇଛି।
ପୂର୍ବତନ ଉପପ୍ରଧାନମନ୍ତ୍ରୀ ଦେବି ଲାଲଙ୍କ ପୁଅ ହେଉଛନ୍ତି ଓମ ପ୍ରକାଶ ଚୌତାଲା। ଶୁକ୍ରବାର ସକାଳେ ସେ ହୃଦଘାତର ଶିକାର ହୋଇଥିଲେ। ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା। ଡାକ୍ତରଖାନାରେ ତାଙ୍କର ଦେହାନ୍ତ ହୋଇଥିଲା। ତାଙ୍କୁ ୮୯ ବର୍ଷ ହୋଇଥିଲା।
