ହରଭଙ୍ଗା: ଚାଷ ଜମିରେ ଜଳସେଚନର ସୁବିଧା ଲାଗି କୋଟି କୋଟି ଟଙ୍କା ବ୍ୟୟରେ ନିର୍ମାଣ ହେଉଛି ପ୍ରକଳ୍ପ। ମାତ୍ର ପ୍ରକଳ୍ପ ନିର୍ମାଣ ପରେ ବି ଏହା ଲୋକଙ୍କ କାମରେ ଆସୁନି।ଯାହାଫଳରେ ଚାଷ ଜମିରେ ପାଣି ମାଡିପାରୁନାହିଁ। ଚାଷ ଜମିରେ ପାଣି ଅଭାବରୁ ଧାନଚାଷ ଉଜୁଡି ଯାଉଛି । ଫଳରେ ଲୋକେ ଚାଷ କାର୍ଯ୍ୟରୁ ମୁହଁ ଫେରାଇବାକୁ ବାଧ୍ୟ ହେଉଛନ୍ତି। ଶେଷରେ ଅନ୍ୟ ଉପାୟ ନପାଇ ଗାଁ ଲୋକେ ଦାଦନ ଯିବାକୁ ବାଧ୍ୟ ହେଉଛନ୍ତି। ଏଭଳି କିଛି ଅଭାବନୀୟ ଚିତ୍ର ଦେଖିବାକୁ ମିଳିଛି ବୌଦ୍ଧଜିଲ୍ଲା ହରଭଙ୍ଗା ବ୍ଲକ ଗୋଛାସାହି ଗାଁରେ। ଗୋଛାସାହି ଗାଁରେ ଥିବା ୮୫ଟି ପରିବାରରେ ପାଖାପାଖି ୩୦୦ରୁ ଅଧିକ ଲୋକ ବସବାସ କରନ୍ତି। ଗାଁ ଲୋକଙ୍କ ମୁଖ୍ୟ ଜୀବିକା ଚାଷବାସ। ଚାଷ ବାସ କରି ଲୋକେ ବର୍ଷସାରା ଗୁଜରାଣ ମେଣ୍ଟାନ୍ତି। ଦିନକୁ ଦିନ ନିଅଣ୍ଟିଆ ବର୍ଷା ସାଙ୍ଗକୁ ଧାନର ପ୍ରକୃଷ୍ଟ ସମୟରେ ପାଣିର ଅଭାବ ଯୋଗୁଁ ଚାଷ ଉଜୁଡିଯାଉଛି। ଲୋକଙ୍କ ଅସୁବିଧାକୁ ଦୃଷ୍ଟିରେ ରଖି ମୃର୍ତ୍ତିକା ସଂରକ୍ଷଣ ବିଭାଗ ପକ୍ଷରୁ ଏକ ଚେକ ଡ୍ୟାମ ନିର୍ମାଣ ହୋଇଥିଲେ ମଧ୍ୟ ଏହି ପ୍ରକଳ୍ପରୁ ଚାଷ ଜମିରେ ପାଣି ମାଡିବା ବ୍ୟତିକ୍ରମ ଦେଖାଦେଲା।ବର୍ତ୍ତମାନ୍ ମୁଣ୍ଡାଘାଇ ଚେକ ଡ୍ୟାମ ନିର୍ମାଣାଧିନ ରହିଥିଲେ ସୁଦ୍ଧା ଗାଁ ଲୋକଙ୍କ ବିନା ମତାମତରେ ଡ୍ୟାମ ନିର୍ମାଣ ଯୋଗୁଁ ଚାଷ ଜମିରେ ପାଣି ମାଡିବା ଆଶଙ୍କା ପ୍ରକାଶ ପାଇଛି।ଯାହାଫଳରେ ସରକାରଙ୍କ ଲକ୍ଷ ଲକ୍ଷ ଟଙ୍କା ପାଣିରେ ପଡିବା ସାରହେବ ବୋଲି ଗାଁଲୋକେ ଅଭିଯୋଗ ଉଠାଇଛନ୍ତି। ଏଣୁ ଲୋକଙ୍କ ସହମତି ଅନୁସାରେ ଚେକ ଡ୍ୟାମ ନିର୍ମାଣ କରିବାକୁ ଦାବି ହୋଇଛି।
Comments are closed.