ଭାରତ ପାଇଁ ସତର୍କଘଣ୍ଟି: ଆଳସ୍ୟ କବଳରେ ଦେଶର ଅଧା ଯୁବପିଢ଼ି

ସମାଜ ଡିଜିଟାଲ ଡେସ୍କ: କୁହାଯାଏ ଆଜିର ଶିଶୁ କାଲିର ଭବିଷ୍ୟତ। ସେଥିପାଇଁ ଶିଶୁମାନଙ୍କ ଲାଗି ପରିବାରଠାରୁ ଆରମ୍ଭ କରି ସରକାର ଏବଂ ସମଗ୍ର ମାନବସମାଜ ଚିନ୍ତାଶୀଳ ରହିଥାଏ। ସେମାନଙ୍କ ସାମଗ୍ରିକ ବିକାଶ ପାଇଁ ଯତ୍ନଶୀଳ ହୁଅନ୍ତି। ଶିଶୁଟିଏ ଯୁବାବସ୍ଥାରେ ପାଦ ଦେଲେ ପରିବାର ଏବଂ ଦେଶ ପ୍ରତି ତା’ର କର୍ତ୍ତବ୍ୟବୋଧ ଓ ଦାୟିତ୍ଵବୋଧ ବୃଦ୍ଧି ପାଇଥାଏ। ହେଲେ ଆଜିର ସମୟରେ ଦେଶର ଅଧିକାଂଶ ଯୁବପିଢ଼ି ଆଳସ୍ୟ କବଳରେ ପଡ଼ିଛନ୍ତି। ଶାରିରୀକ ପରିଶ୍ରମ କରିବାକୁ ଯୁବପିଢ଼ି ଅନିଚ୍ଛୁକ। ଦେଶର ଅଧା ଯୁବପିଢ଼ି ଶାରିରୀକ ଭାବେ ସକ୍ରିୟ ନୁହନ୍ତି ବୋଲି ୨୦୨୨ରେ କରାଯାଇଥିବା ଏକ ଅଧ୍ୟୟନରୁ ଜଣାପଡ଼ିଛି। ନିକଟରେ ଲାନସେଣ୍ଟ ଗ୍ଲୋବାଲ ହେଲଥ ଜର୍ନାଲରେ ଏ ସମ୍ପର୍କିତ ରିପୋର୍ଟ ପ୍ରକାଶିତ ହୋଇଛି। ଭାରତର ୫୦ ପ୍ରତିଶତ ଯୁବପିଢ଼ି ଶାରିରୀକ କାର୍ଯ୍ୟକଳାପ କରୁନାହାନ୍ତି ବୋଲି ରିପୋର୍ଟରେ କୁହାଯାଇଛି।

ଅଧ୍ୟୟନରେ କୁହାଯାଇଛି ଯେ, ପୁରୁଷଙ୍କ ତୁଳନାରେ ମହିଳାଙ୍କ କ୍ଷେତ୍ରରେ ଏହି ହାର ଅଧିକ। ଦେଶର ୪୨ ପ୍ରତିଶତ ଯୁବକ ଶାରିରୀକ ଭାବେ ସକ୍ରିୟ ନ ଥିବାବେଳେ ମହିଳାଙ୍କ ହାର ୫୭ ପ୍ରତିଶତ ରହିଛି। ଅଳସୁଆମୀ(ଶାରିରୀକ କାର୍ଯ୍ୟ କରିବାକୁ ଅନିଚ୍ଛୁକ)ରେ ଦକ୍ଷିଣ ଏସିଆରେ ଭାରତ ସବୁଠୁ ଆଗରେ ରହିଛି।

ସେହିପରି ବିଶ୍ଵସ୍ତରରେ ୩୧.୩ ପ୍ରତିଶତ ଯୁବପିଢ଼ିଙ୍କ ନିକଟରେ ଆଳସ୍ୟ ଦେଖିବାକୁ ମିଳିଥିବା କୁହାଯାଇଛି। ସେମାନେ ପର୍ଯ୍ୟାପ୍ତ ରୂପେ ଶାରିରୀକ କାର୍ଯ୍ୟ କରୁ ନ ଥିବା ରିପୋର୍ଟରେ ଦର୍ଶାଯାଇଛି। ଏମାନେ ଗୋଟିଏ ସପ୍ତାହରେ ୧୫୦ ମିନିଟ ସମୟ ବି କୌଣସି ମଧ୍ୟମ ଧରଣର ଶାରିରୀକ କାର୍ଯ୍ୟ ଏବଂ ୭୫ ମିନିଟ କଠିନ ଶାରିରୀକ ପରିଶ୍ରମ କରୁନାହାନ୍ତି। ଅନେକ ଯୁବପିଢ଼ି ନିଜର କାର୍ଯ୍ୟସ୍ଥଳକୁ ଯାଉଥିଲେ ବି ସେଠାରେ ଶାରିରୀକ କାର୍ଯ୍ୟର ଅଭାବ ରହୁଛି। ସେମାନେ ଶରୀରର ସୁସ୍ଥତା ପାଇଁ ସମୟ ବାହାର କରି ବ୍ୟାୟାମ କି ଅନ୍ୟ କୌଣସି ଶାରିରୀକ କାର୍ଯ୍ୟ କରୁନାହାନ୍ତି।

ଭାରତରେ ୨୦୦୦ ମସିହାରେ ଏହି ହାର ଥିଲା ୨୨ ପ୍ରତିଶତ। ୨୦୧୦ରେ ଏହା ବୃଦ୍ଧି ପାଇ ୩୪ ପ୍ରତିଶତରେ ପହଞ୍ଚିଥିଲା। ୨୦୨୨ରେ ଏହା ୫୦ ପ୍ରତିଶତରେ ପହଞ୍ଚିଥିବାରୁ ସମଗ୍ର ଦେଶ ପାଇଁ ଏହା ଚିନ୍ତାର ବିଷୟ ପାଲଟିଛି। ଏହିଭଳି ଧାରା ଜାରି ରହିଲେ ୨୦୩୦ ବେଳକୁ ଦେଶର ୬୦ ପ୍ରତିଶତ ଯୁବପିଢ଼ି ଆଳସ୍ୟର ବଶବର୍ତ୍ତୀ ହୋଇଥିବେ ବୋଲି ଗବେଷକମାନେ ଆଶଙ୍କା ବ୍ୟକ୍ତ କରିଛନ୍ତି।