ନୂଆଦିଲ୍ଲୀ : ହିନ୍ଦୁସ୍ତାନ ଏୟରୋନୋଟିକ୍ସ ଲିମିଟେଡ୍(HAL)ର ସେୟାରରେ ମଙ୍ଗଳବାର ବୃଦ୍ଧି ଦେଖିବାକୁ ମିଳିଛି । ମଙ୍ଗଳବାର ସକାଳେ ଏଚଏଏଲର ସେୟାର ୨୬୦ ଟଙ୍କା ବୃଦ୍ଧି ସହିତ ୫୪୬୦ ଟଙ୍କାରେ ଖୋଲିଥିଲା । ଏହା ପରେ ସେୟାରରେ ତୀବ୍ର ଗତି ଦେଖିବାକୁ ମିଳିଥିଲା । ପ୍ରତିରକ୍ଷା ମନ୍ତ୍ରଣାଳୟ ତରଫରୁ ୧୫୬ ଲାଇଟ୍ କମ୍ବାଟ୍ ହେଲିକପ୍ଟରର ଚୁକ୍ତି ପରେ ଏଚଏଏଲର ସେୟାର ଦାମ୍ ବଢିଛି । ପ୍ରାୟ ୪୫ ହଜାର କୋଟି ଟଙ୍କାରେ ଏହି ଡିଲ୍ ହୋଇଛି । ପିଏମଓଙ୍କ ଅଫିସିଆଲ୍ ଏକ୍ସ ଆକାଉଣ୍ଟରେ ଏନେଇ ସୂଚନା ଦିଆଯିବା ପରେ ସେୟାର ବଜାରରେ ବୃଦ୍ଧି ପରିଲକ୍ଷିତ ହୋଇଛି ।
ପ୍ରତିରକ୍ଷା ମନ୍ତ୍ରଣାଳୟ ୧୫୬ ହାଲୁକା ଲଢୁଆ ହେଲିକପ୍ଟର କିଣିବା ପାଇଁ ଯୋଜନା ରଖିଛି । ଏଥିରେ ୯୦ ହେଲିକପ୍ଟର ଭାରତୀୟ ସେନା ପାଇଁ ଏବଂ ୬୬ ହେଲିକପ୍ଟର ଭାରତୀୟ ବାୟୁ ସେନା ପାଇଁ ହେବ । ଭାରତୀୟ ସେନା ଦ୍ବାରା କିଣାଯିବାକୁ ଥିବା ଏହି ହେଲିକପ୍ଟର ସହିତ ଟେଣ୍ଡରର ଦାମ୍ ୪୫ ହଜାର କୋଟି ଟଙ୍କା । ମଙ୍ଗଳବାର ଏଚଏଏଲର ସେୟାରରେ ଲଗାତର ବୃଦ୍ଧି ଦେଖିବାକୁ ମିଳିଛି । ଦ୍ବିପ୍ରହର ୨ଟା ସୁଦ୍ଧା ଏହା ପ୍ରାୟ ୫୫୪୫ ଟଙ୍କାରେ ଥିଲା । ଏହି ସମୟରେ ସର୍ବୋଚ୍ଚ ୫୫୬୫ ଟଙ୍କା ଏବଂ ସର୍ବନିମ୍ନ ୫୩୯୦ ଟଙ୍କା ଛୁଇଁଥିଲା ସେୟାର ଦାମ୍ । ଏହା ସହିତ କମ୍ପାନୀର ମାର୍କେଟ୍ କ୍ୟାପ୍ ବୃଦ୍ଧି ପାଇ ୩,୭୧,୧୩୬ କୋଟି ଟଙ୍କାରେ ପହଞ୍ଚି ଯାଇଛି ।
