ଗୁରୁଡିଝାଟିଆ : ସପ୍ତାହେ ନୁହେଁ କି ମାସେ ନୁହେଁ। ୩ମାସ ଧରି ବାରଣ୍ଡାରେ ପଡି ରହିଥିଲା ବିଧବା ଜେମା ସଏ(୬୨)। ପେଟ ଯନ୍ତ୍ରଣା ସାଙ୍ଗକୁ ଜ୍ୱର ଶରୀରକୁ ଦୁର୍ବଳ କରି ଦେଇଥିଲା। ଠିକଣା ଢଙ୍ଗରେ ଦିଓଳି ଦୁଇମୁଠା ଭଲରେ ଖାଇବା ମଧ୍ୟ ଜୁଟୁ ନଥିବାରୁ ଚାଲିବା ତା ପାଇଁ କଷ୍ଟକର ହୋଇ ପଡିଥିଲା। ଏଭଳି ସ୍ଥିତିରେ ଜେମା ଅସହାୟ ହୋଇ ଭାଗ୍ୟକୁ ଆଦରି ବାରଣ୍ଡାରେ ଶୋଇ ରହିଥିଲା। କିଏ ବା ତାକୁ ଚିକିତ୍ସା ଯୋଗାଇଦେବ, ତେଣୁ ବାରଣ୍ଡାରେ ପଡି ରହି ଈଶ୍ୱରଙ୍କୁ ହିଁ ଡାକୁଥିଲା ଜେମା ସଏ। ଏହା କଟକ ଜିଲ୍ଲାର ଆଠଗଡ ବ୍ଲକ ଅନ୍ତର୍ଗତ କୃଷ୍ଣପୁର ପଞ୍ଚାୟତର ରାଧିକାପାଟିକା ସାହିର ଚିତ୍ର।
ପୂର୍ବାହ୍ନରେ ଜନଜାତି ଅଧ୍ୟୁଷିତ ରାଧିକାପାଟିକା ସାହିକୁ ଖବର ସଂଗ୍ରହ ପାଇଁ ଯାଇଥିବା ସ୍ଥାନୀୟ ସମାଜ ପ୍ରତିନିଧି ବାରଣ୍ଡାରେ ଶୋଇଥିବା ଅବସ୍ଥାରେ ଜେମାକୁ ଦେଖି ପଚାରି ବୁଝିଥିଲେ। ଅସହାୟ ଅବସ୍ଥାରେ ରୋଗରେ ୩ ମାସ ଧରି ବାରଣ୍ଡାରେ ପଡି ରହିବା ଓ ଠିକଣା ଚିକିତ୍ସା ପାଇ ପାରୁନଥିବା ସଂପର୍କରେ ଜାଣିବାକୁ ପାଇଥିଲେ। ପରିବାର ସଦସ୍ୟ, ସାହିଲୋକ ଓ ଜେମା ସହିତ ଆଲୋଚନା କରିବା ପରେ ଚିକିତ୍ସାଳୟକୁ ଯିବା ପାଇଁ ସମ୍ମତି ହୋଇଥିଲେ। ଶ୍ରୀ ବେହେରା ସ୍ଥାନୀୟ ବ୍ରହ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିକ୍ଷକ ଡାକ୍ତର ଦିଲ୍ଲିପ ଦାସଙ୍କୁ ଯୋଗାଯୋଗ କରିଥିଲେ। ଡାକ୍ତର ଶ୍ରୀ ଦାସଙ୍କ ପରାମର୍ଶ କ୍ରମେ ୧୦୮ ଆମ୍ବୁଲାନ୍ସ ଆସିଥିଲା ଜେମା ସଏକୁ ବ୍ରହ୍ମପୁର ଗୋଷ୍ଠୀସ୍ୱାସ୍ଥ୍ୟକେନ୍ଦ୍ରକୁ ନେବା ପାଇଁ। ହେଲେ ଗାଁକୁ ରାସ୍ତା ନାହିଁ। ଆମ୍ବୁଲାନ୍ସ କିଭଳି ଆସିବ।
ପ୍ରାୟ ୨ କିମି ଦୂରରେ ଆମ୍ବୁଲାନ୍ସ ଅଟକି ରହିଥିଲା। ସେପଟେ ଜେମା ସଏ ମଧ୍ୟ ୩ ମାସ ଧରି ରୋଗରେ ପଡିଥିବାରୁ ଏତେବାଟ ଚାଲିକି ଯିବା ସମ୍ଭବପର ନୁହେଁ। ତେଣୁ ନିକଟରେ କାମ କରୁଥିବା ଦୁଇଜଣ ସ୍ଥାନୀୟ ଯୁବକ, ସ୍ୱାସ୍ଥ୍ୟକର୍ମଚାରୀ ରମାକାନ୍ତ ସିହ୍ନାଙ୍କୁ ସାଥି କରି ସାମ୍ବାଦିକ ଶ୍ରୀ ବେହେରା ଖଟିଆ ଯୋଗେ ଅସୁସ୍ଥ ଜେମାକୁ ପ୍ରାୟ ୨ କିମି ଖଟିଆରେ ବିପଦ ସଙ୍କୁଳ କାଠପୋଲ ଓ କାଦୁଆ ରାସ୍ତାଦେଇ ଆମ୍ବୁଲାନ୍ସକୁ ଆଣିଥିଲେ। ଏବେ ଜେମା ବ୍ରହ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି। ପ୍ରକାଶ ଯୋଗ୍ୟ ଜେମାର ପରିବାର କହିଲେ ବିଧବା ଭାଉଜ ଓ ଝିଆରୀକୁ ବୁଝାଏ। ଭାଇ ଆରପାରିକୁ ଯାଇଥିବାରୁ ଭାଉଜ ଉପରେ ନିର୍ଭରଶୀଳ ।
Comments are closed.