ଗୁରୁଡିଝାଟିଆ: ଆଠଗଡ ବନଖଣ୍ଡ ଅନ୍ତର୍ଗତ ଖୁଣ୍ଟୁଣୀ ବନାଞ୍ଚଳର କଖଡିରେ ବାରହାମାନଙ୍କ ଉପଦ୍ରବ ବୃଦ୍ଧି ପାଇଛି। ଦଳଦଳ ହୋଇ ବାରହା ସଂନ୍ଧ୍ୟା ହେଲେ ନିକଟସ୍ଥ ଜଙ୍ଗଲ ଓ ଜଳାଶ୍ରୟ ନିକଟରେ ରହିଥିବା ବୁଦାମାନଙ୍କରୁ ବାହାରି ପାଚିଲା ଧାନ କ୍ଷେତରେ ପଶି ନଷ୍ଟ କରିବା ସହିତ ଖାଇକି ଉଜାଡି ଦେଉଛନ୍ତି। ଚଳିକ ବର୍ଷ ଅନୁକୂଳ ପାଣିପାଗ ଥିବାରୁ ଶାରଦ ଧାନ ଭଲ ଅମଳକ୍ଷମ ହେବା ଭଳି ଜଣାପଡିଛି। ଧାନ କିଆରୀକୁ ଗଲେ ବେଶ ବାରି ହୋଇପଡୁଥିଲା। ହେଲେ ବାରାହା ପଲ କୃଷକଙ୍କ ବର୍ଷକର ଆହାରକୁ ଛଡାଇ ନେଇଛି। ଘୋର ସଂକଟ ମଧ୍ୟରେ ଚିନ୍ତାଗ୍ରସ୍ତ ହୋଇପଡିଛି ଚାଷୀ।
ହାତୀଙ୍କ ଠାରୁ ପାଚିଲା ଧାନକ୍ଷେତ୍ର ଉଜାଡିବା କ୍ଷେତ୍ରରେ ବାରାହା ପଲ ଅଧିକ ସକ୍ରିୟ ହୋଇଉଠିଛନ୍ତି। କଖଡି ଗ୍ରାମର ଗଙ୍ଗାଧର ବେହେରାଙ୍କ ୨୦ଗୁଣ୍ଠ ପାଚିଲା ଧାନ କିଆରୀ ସଂପୂର୍ଣ୍ଣ ଉଜାଡି ଦେଇଛନ୍ତି। ସେହିଭଳି ତ୍ରିନାଥ ସାହୁ, ସେଖ୍ ଜଲିଲ, ଶରତ ଚନ୍ଦ୍ର ମହାନ୍ତି, ସନ୍ତୋଷ କୁମାର ରାଉତ, ଗନ୍ଧର୍ବ ଦାସଙ୍କ ଭଳି ବହୁ କୃଷକଙ୍କ ପାଚିଲା ଧାନ କିଆରୀକୁ ବାରାହା ଉଜାଡି ଦେଇଛନ୍ତି। ବିଶେଷତଃ କଖଡି ଅଞ୍ଚଳର ପାରିବିଲା, ଦଣ୍ଡା, ଏକଡାଳିଆ ଗହୀରରେ ବାରାହାଙ୍କ ଉତ୍ପାତ ବୃଦ୍ଧି ପାଇଛି। ସେହିଭଳି ଭାବରେ ନାରଙ୍ଗବସ୍ତ, ପ୍ରଶନ୍ନାପୁର, ଲିଙ୍ଗାପଦା, ବିଦ୍ୟାଧରପୁର, ଗୋପିନାଥପଡା, ବିଷ୍ଣୁପୁର ଓ ବ୍ରାହ୍ମଣବସ୍ତ ପ୍ରଭୂତି ଗାଁର ଧାନକ୍ଷେତରେ ବାରାହା ହାଉଯାଉ ହେଉଛନ୍ତି। ଗତବର୍ଷ ବ୍ରାହ୍ମଣବସ୍ତରେ ଦୁଇଜଣ କୃଷକଙ୍କୁ ବାରାହା ଅତର୍କିତ ଆକ୍ରମଣ କରିବାରୁ ଗୁରୁତର ହୋଇଥିଲେ। ଲିଙ୍ଗାପଦାରେ ମଧ୍ୟ ପାଚିଲା ଧାନ କିଆରୀକୁ ରକ୍ଷା କରିବା ପାଇଁ ରାତିରେ କୃଷକମାନେ ଟାୟାର ଜାଳି ରାତି ତମାମ ଉଜାଗର ରହୁଥିବା ଦେଖାଯାଇଛି। ବନବିଭାଗ ତୁରନ୍ତ ବାରହା ଉପଦ୍ରବକୁ ରୋକିବା ସହିତ ବର୍ଦ୍ଧିତ ହାରରେ କ୍ଷୟକ୍ଷତି ଦେବା ପାଇଁ ଦାବି ହୋଇଛି।
