ଜୟପୁର/ନୂଆଦିଲ୍ଲୀ : ରାଜସ୍ଥାନରେ ଗୁର୍ଜର ସଂରକ୍ଷଣ ଆନ୍ଦୋଳନ ପୁରୋଧା କର୍ଣ୍ଣଲ କିରୋଡି ସିଂହ ବୈସଂଲା ନିଜ ପୁଅ ବିଜୟ ବୈସଂଲାଙ୍କ ସହ ବୁଧବାର ବିଜେପିରେ ଯୋଗଦେଇଛନ୍ତି। ଗୁର୍ଜର ଆନ୍ଦୋଳନ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରାଙ୍କ ମୁଣ୍ଡବିନ୍ଧାର କାରଣ ସାଜିଥିଲା। କିରୋଡ଼ିଙ୍କ ନେତୃତ୍ୱରେ ଗୁର୍ଜରମାନେ ଏବେକାର କଂଗ୍ରେସ ସରକାର ବିରୋଧରେ ମଧ୍ୟ ଆନ୍ଦୋଳନକୁ ଓହ୍ଳାଇଥିଲେ।
ନୂଆଦିଲ୍ଲୀଠାରେ ରାଜସ୍ତାନ ବିଜେପି ଦାୟିତ୍ବରେ ଥିବା ପ୍ରକାଶ ଜାଭାଦେକରଙ୍କ ଉପସ୍ଥିତିରେ କିରୋଡି ଏବଂ ବିଜୟ ବୈସଂଲା ବିଜେପିରେ ଯୋଗ ଦେଇଛନ୍ତି । ବିଜେପିରେ ଯୋଗଦେବା ପରେ କିରୋଡ଼ି କହିଛନ୍ତି ଯେ ଗୁର୍ଜର ଆନ୍ଦୋଳନ ସହ ଦୀର୍ଘ ୧୪ ବର୍ଷ ହେବ ସମ୍ପୃକ୍ତ ଅଛି। ଏହି ସମୟ ମଧ୍ୟରେ କଂଗ୍ରେସ ଏବଂ ବିଜେପି ଦଳର ମୁଖ୍ୟମନ୍ତ୍ରୀଙ୍କ ଶାସନକୁ ସେ ଅତି ନିକଟରୁ ଅନୁଭବ କରିଛନ୍ତି ଓ ଉଭୟ ଦଳର କାର୍ଯ୍ୟଶୈଳୀ ଏବଂ ବିଚାରଧାରକୁ ଦେଖିଛନ୍ତି। ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ପ୍ରଭାବିତ ହୋଇ ବିଜେପିରେ ଯୋଗ ଦେଇଛନ୍ତି। ବିଜେପିରେ ରହି ସେ ଗୁର୍ଜର ଲୋକଙ୍କ ବିକାଶ ପାଇଁ କାର୍ଯ୍ୟ କରିବେ।
