ସମାଜ ଡିଜିଟାଲ ଡେସ୍କ: ଏହି ଭାରତୀୟ ଖେଳାଳିଙ୍କୁ ସବୁବେଳେ ଶାନ୍ତ ସ୍ଵଭାବ ଓ ଗମ୍ଭୀର ଭାବେ ରହୁଥିବା ଦେଖିବାକୁ ମିଳିଥାଏ । ଯିଏକ ସର୍ବଦା ନିଜ କାମ ଉପରେ ଫୋକସ କରିଥାନ୍ତି ଏବଂ ସଫଳତା ମିଳିବା ପରେ ବି ମୁହଁରେ ରହିଥାଏ ସ୍ମିତହାସ୍ୟ । ଆମେ କହୁଛୁ ଭାରତୀୟ ଟିମ୍ର କୋଚ୍ ରାହୁଲ ଦ୍ରାବିଡଙ୍କ କଥା । ହେଲେ ଶନିବାର ରାତିରେ ଭାରତର ଦମଦାର ବିଜୟ ପରେ ରାହୁଲ ଗମ୍ଭୀର ରୂପରୁ କିଛି ଅଲଗା ଅନ୍ଦାଜରେ ନଜର ଆସିଥିଲେ । ହାତରେ ରାହୁଲ ଟି-୨୦ ବିଶ୍ୱକପ ଟ୍ରଫି ଧରି ଯେଭଳି ଜୋସରେ ନଜର ଆସିଥିଲେ ତାହାକୁ ଦେଖିବା ପରେ ପ୍ରଶଂସକମାନେ ତାଜୁବ ହୋଇଥିଲେ । ଟ୍ରଫି ସହ ଯୁବଖେଳାଳିଙ୍କ ଭଳି ଜୋସ୍ ଦେଖାଇ ଚିତ୍କାର କରି ଖୁସି ଜାହିର କରିଥିଲେ । ତାଙ୍କର ଏଭଳି ବଦଳିବା ଅନ୍ଦାଜ ପଛରେ ଗତ ୧୭ବର୍ଷର ପୀଡା ରହିଥିଲା । ଏହି ଅବସରରେ ସେ କହିଥିଲେ ଯେ ‘ଖେଳାଳି ଭାବେ ମୁଁ କେବେ ବିଶ୍ୱକପ ଜିତି ପାରିନଥିଲି । ମୁଁ ସେତିକି ଭାଗ୍ୟଶାଳୀ ନଥିଲି, ହେଲେ ଯେବେ ବି ମ୍ୟାଚ ଖେଳିଛି ନିଜର ଶ୍ରେଷ୍ଠ ପ୍ରଦର୍ଶନ ଦେଇଛି ।’ ଏଭଳି ଅନେକ ଖେଳାଳି ରହିଛନ୍ତି ଯେଉଁମାନେ ବିଶ୍ୱକପ ଜିତି ପାରିନାହାଁନ୍ତି । ହେଲେ ମୁଁ ଭାଗ୍ୟଶାଳୀ ଯେ ମୋତେ ଭାରତୀୟ ଦଳର ପ୍ରଶିକ୍ଷକ ହେବାର ସୁଯୋଗ ମିଳିଲା । କ୍ୟାପଟେନରୁ ପ୍ରଶିକ୍ଷକ ହେବାର ଯାତ୍ରା ଯେଭଳି ଏକ ଜୀବନ ଜିଇବା ଭଳି ହୋଇଛି ।
ୱେଷ୍ଟଇଣ୍ଡିଜର ଏହି କ୍ରିକେଟ ପଡିଆରେ ଭାରତୀୟ ଟିମ୍ ରାହୁଲଙ୍କ ଅଧିନାୟକତ୍ୱରେ ବିଶ୍ୱକପ ଖେଳିଥିଲା । ଦଳ ଏଠାରେ ବାଂଲାଦେଶ ଠାରୁ ପରାଜିତ ହେବା ପରେ ଶ୍ରୀଲଙ୍କଠାରୁ ମଧ୍ୟ ହାରି ପ୍ରଥମ ପର୍ଯ୍ୟାୟରେ ବିଶ୍ୱକପରୁ ବାହାରି ଯାଇଥିଲା । ସେହିଥର ଦ୍ରାବିଡ ପ୍ରଥମ ଥର ବିଶ୍ୱକପରେ ଭାରତୀୟ ଦଳର ଅଧିନାୟକ ହୋଇଥିଲେ ଏବଂ ବିପର୍ଯ୍ୟସ୍ତ ପରାଜୟର ସାମ୍ନା କରି ସ୍ୱଦେଶ ଫେରିଥିଲେ । ଏହି ଆଘାତ ତାଙ୍କ ହୃଦୟରେ ସର୍ବାଦା ରହିଥିଲା । ଖେଳାଳି ଭାବେ ସନ୍ନ୍ୟାସ ନେବା ପରେ ଦ୍ରାବିଡ ଅଣ୍ଡର-୧୯ରେ ପ୍ରଶିକ୍ଷକ ଭାବେ କାର୍ଯ୍ୟ କରିଥିଲେ । ଏହା ପରେ ଜାତୀୟ କ୍ରିକେଟ ଏକାଡେମୀ ସହିତ ଯୋଡି ହୋଇଥିଲେ । ସିନିୟର ଭାରତୀୟ ଖେଳାଳିଙ୍କ କୋଚ୍ ହେବାକୁ ସେ କୁଣ୍ଠାବୋଧ କରୁଥିଲେ । ଯେତେବେଳେ ସୌରଭ ଗାଙ୍ଗୁଲି ବିସିସିଆଇ ଅଧ୍ୟକ୍ଷ ହୋଇଥିଲେ ସେତେବେଳେ ସେ ପ୍ରସ୍ତାବ ଦେଇଥିଲେ ଯେ ଭାରତୀୟ ଦଳର ମୁଖ୍ୟ କୋଚ୍ ରାହୁଲ ଦ୍ରାବିଡଙ୍କୁ କରାଯାଉ । ରାହୁଲ କୋଚ୍ ହେବା ପରେ ତାଙ୍କୁ ଟାର୍ଗେଟ ଦିଆଯାଇଥିଲା ଯେ ୨୦୨୨ରେ ଟି-୨୦ ବିଶ୍ୱକପ, ଟି-୨୦ ଚାମ୍ପିଅନସିପ୍ ଏବଂ ଭାରତରେ ହେବାକୁ ଥିବା ଦିନିକିଆ ବିଶ୍ୱକପ । ହେଲେ ଏହି ତିନୋଟି ଯାକ ଟୁର୍ଣ୍ଣାମେଣ୍ଟରେ ଭାରତକୁ ବିଜୟ ନିକଟତର କରାଇଥିଲେ ମଧ୍ୟ ଟ୍ରଫି ହାସଲ କରାଇ ପାରିନଥିଲେ ରାହୁଲ ।
୨୦୨୩ରେ ଦିନିକିଆ ବିଶ୍ୱକପରେ ଭାରତ ସମସ୍ତ ମ୍ୟାଚରେ ଦମଦାର ବିଜୟ ହାସଲ କରିଥିବା ବେଳେ ଫାଇନାଲରେ ଅଷ୍ଟ୍ରେଲିଆ ଠାରୁ ବିପର୍ଯ୍ୟସ୍ତ ଭାବେ ପରାଜିତ ହୋଇଥିଲା । ଏହାପରେ ଦ୍ରାବିଡଙ୍କ ମୁଖ୍ୟ ପ୍ରଶିକ୍ଷକ କାର୍ଯ୍ୟକାଳ ମଧ୍ୟ ସମାପ୍ତ ହୋଇଥିଲା । ହେଲେ ପରବର୍ତ୍ତୀ ପର୍ଯ୍ୟାୟରେ ବିସିସିଆଇ ଏହାକୁ ୨୦୨୪ ଟି-୨୦ ବିଶ୍ୱକପ ପର୍ଯ୍ୟନ୍ତ ବଢାଇଥିଲେ । ଟି-୨୦ ସିରିଜରେ ଟିମରେ କିଛିଟା ପରିବର୍ତ୍ତନ କରିଥିଲେ ରାହୁଲ । ରୋହିତ ଏବଂ ବିରାଟଙ୍କୁ ଓପନିଂ କରାଇବା ସହ ଅର୍ଶଦୀପ ସିଂହ, ଶିବମ ଦୁବେଙ୍କ ଭଳି ଯୁବ ଖେଳାଳିଙ୍କୁ ସୁଯୋଗ ଦେଇଥିଲେ । ହାର୍ଦ୍ଦିକ ପାଣ୍ଡ୍ୟା, ସୂର୍ଯ୍ୟ କୁମାର ଯାଦବ ଏବଂ ରିଷଭ ପନ୍ତଙ୍କୁ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ଦାୟିତ୍ୱ ଦେଇଥିଲେ । ଦଳରେ ଯଦି ବି ପରସ୍ପର ଭିତରେ ମତଭେଦ ରହିଛି ତେବେ ତାହାକୁ ମଇଦାନରୁ ବାହାରେ ରଖିବାକୁ ରାହୁଲ ପ୍ରୟାସ କରିଥିଲେ । ଧୀରେ ଧୀରେ ଭାରତୀୟ ଦଳ ଆହୁରି ମଜବୁତ ହେବା ସହ ନୂଆ ରୂପରେ ଖେଳୁଥିବା ଦେଖିବାକୁ ମିଳିଥିଲା । ଯାହା ଫଳରେ ଚଳିତ ଟି-୨୦ ବିଶ୍ୱକପରେ ଭାରତ ଐତିହାସିକ ବିଜୟ ହାସଲ କରିବା ସହ ଦ୍ରାବିଡଙ୍କ ହାତରେ ବିଶ୍ୱକପ ଟ୍ରଫି ଆସିଥିଲା । ଏହାସହିତ ତାଙ୍କର ୧୭ବର୍ଷର ଅପେକ୍ଷାର ଅନ୍ତ ଘଟିଥିଲା । ରାହୁଲ ଜଣେ ସଫଳ ପ୍ରଶିକ୍ଷକ ଭାବେ ବର୍ତ୍ତମାନ ଭାରତ ଫେରୁଛନ୍ତି ।
Comments are closed.