ସ୍ନାତକ ଡିଗ୍ରୀ ପରୀକ୍ଷା ଫଳ, ଶ୍ରେଷ୍ଠ ୧୦ ତାଲିକାରେ ସଞ୍ଜୟ ସ୍ମୃତି ସରକାରୀ ମହିଳା ମହାବିଦ୍ୟାଳୟ ଛାତ୍ରୀ

ଫୁଲବାଣୀ : ବ୍ରହ୍ମପୁର ବିଶ୍ୱବିଦ୍ୟାଳୟ ଅଧୀନରେ ପରିଚାଳିତ ସ୍ନାତକ ଶେଷବର୍ଷ ଡିଗ୍ରୀ ପରୀକ୍ଷା ଫଳ ପ୍ରକାଶ ପାଇଛି।  ପ୍ରକାଶିତ ଏହି ଶ୍ରେଷ୍ଠ ୧୦ କୃତି ତାଲିକାରେ ଫୁଲବାଣୀ ସ୍ଥିତ ସଞ୍ଜୟ ସ୍ମୃତି ସରକାରୀ ମହିଳା ମହାବିଦ୍ୟାଳୟର ବିଭିନ୍ନ ବିଭାଗର ୯ ଜଣ ଛାତ୍ରୀ ସ୍ଥାନପାଇ ମହାବିଦ୍ୟାଳୟ ତଥା କନ୍ଧମାଳ ଜିଲ୍ଲା ନିମନ୍ତେ ଗୌରବ ଅର୍ଜନ କରିଛନ୍ତି। ଏହି ଅବସରରେ ମହାବିଦ୍ୟାଳୟର ଅଧ୍ୟକ୍ଷା, ସମସ୍ତ ଅଧ୍ୟାପକ, ଅଧ୍ୟାପିକା ଏବଂ ଛାତ୍ରୀ ଖୁବ୍ ଆନନ୍ଦିତ ଓ ଉତ୍ସାହିତ ଅଛନ୍ତି। ଛାତ୍ରୀଙ୍କ ଅଦମ୍ୟ ସାଧନା ଓ ଅଧ୍ୟବସାୟ ଏବଂ ଅଧ୍ୟାପକ – ଅଧ୍ୟାପିକାଙ୍କ ପ୍ରେରଣା ଓ ପ୍ରୋତ୍ସାହନ ତାଙ୍କୁ ଏଭଳି   ସଫଳତା  ଦେଇପାରିଛି ବୋଲି ମହାବିଦ୍ୟାଳୟର ଅଧ୍ୟକ୍ଷା ଡ. ତନୁଜା ସିଂହ କହିଛନ୍ତି। ଚଳିତ ବର୍ଷ ପ୍ରକାଶିତ ଏହି ଶ୍ରେଷ୍ଠ ୧୦ ତାଲିକାରେ ସଞ୍ଜୟ ସ୍ମୃତି ସରକାରୀ ମହିଳା ମହାବିଦ୍ୟାଳୟର ରାଜନୀତି ବିଜ୍ଞାନ ସ୍ନାତକ ଡିଗ୍ରୀର ଶେଷବର୍ଷ ଛାତ୍ରୀ ସୁଶ୍ରୀ ସ୍ଵାତୀପ୍ରିୟା ବେହେରା ଓ ସୁଶ୍ରୀ ଚନ୍ଦ୍ରକ୍ରାନ୍ତି ଭୋଇ  ଚତୁର୍ଥ ଓ ଷଷ୍ଠ ସ୍ଥାନ ଅଧିକାର କରି ମହାବିଦ୍ୟାଳୟ ଓ ବିଭାଗକୁ ଗୌରବାନ୍ଵିତ କରିଛନ୍ତି। ଏତଦ୍ ବ୍ୟତୀତ  ଗୃହ ବିଜ୍ଞାନ ସ୍ନାତକ ଡିଗ୍ରୀର  ଛାତ୍ରୀ ଝରଣା ସାହୁ ଅଷ୍ଟମ ସ୍ଥାନ, ନୃତତ୍ତ୍ବ ସ୍ନାତକ ଡ଼ିଗ୍ରୀର ଛାତ୍ରୀ ସୁଶ୍ରୀ ଅର୍ପିତା ବେହେରା, ସୁଶ୍ରୀ ସୁସ୍ମିତା କହଁର ,ସୁଶ୍ରୀ ପ୍ରିୟଦର୍ଶିନୀ ସାହୁ, ସୁଶ୍ରୀ ସୁନିତା ପ୍ରଧାନ, ସୁଶ୍ରୀ ରାଜଶ୍ରୀ ଭୁକ୍ତା, ସୁଶ୍ରୀ ଲାବଣ୍ୟବତି ମଲ୍ଲିକ ଯଥାକ୍ରମେ ଦ୍ୱିତୀୟ, ଚତୁର୍ଥ, ପଞ୍ଚମ,ଷଷ୍ଠ, ନବମ, ଦଶମ ସ୍ଥାନ ଅଧିକାର କରିଥିବା ଜଣାପଡ଼ିଛି।  ମହାବିଦ୍ୟାଳୟର କୃତି ଛାତ୍ରୀମାନଙ୍କ ଏହି ସଫଳତା ଅବସରରେ ଅଧ୍ୟକ୍ଷାଙ୍କ ସମେତ ମହାବିଦ୍ୟାଳୟର ସମସ୍ତ ଅଧ୍ୟାପକ, ଅଧ୍ୟାପିକା ଓ କର୍ମଚାରୀ ବୃନ୍ଦ ଶୁଭେଚ୍ଛା ଓ ଶୁଭକାମନା ଜ୍ଞାପନ  କରିଛନ୍ତି।