ଗୋପାଳପୁର: ଅଲ ଇଣ୍ଡିଆ ସିଭିଲ ସର୍ଭିସ କ୍ରୀଡ଼ା ପ୍ରତିଯୋଗିତା ୨୦୨୪-୨୫ରେ ଚମକିଲେ ଓଡ଼ିଆ ପୁଅ। ଚଣ୍ଡିଗଡ଼ ସ୍ପୋର୍ଟ୍ସ କମ୍ପ୍ଲେସ ସେକ୍ଟର ୭ରେ ଚଣ୍ଡିଗଡ଼ କ୍ରୀଡ଼ା ବିଭାଗ ତଥା ସାଂସ୍କୃତିକ ଏବଂ କ୍ରୀଡ଼ା ନୂଆଦିଲ୍ଲୀ ପକ୍ଷରୁ ଆୟୋଜିତ ଅଲ ଇଣ୍ଡିଆ ସିଭିଲ ସର୍ଭିସ କ୍ରୀଡ଼ା ପ୍ରତିଯୋଗିତା ୨୦୨୪-୨୫ରେ ଓଡ଼ିଶା କ୍ରୀଡା ବିଭାଗ ପକ୍ଷରୁ ସତ୍ୟନାରାୟଣପୁର ୟୁପି ସ୍କୁଲର ସହକାରୀ ଶିକ୍ଷକ ଟୁକୁ ସେଠୀ ସ୍ବର୍ଣ୍ଣ ପଦକ ହାସଲ କରିଛନ୍ତି। ୧୦୦ ମିଟର ଦୌଡ଼ରେ ପ୍ରଥମ ହୋଇ ସେ ଏହି ପଦକ ହାତେଇଛନ୍ତି।
ଚଳିତ ମାସ ୧୯ରୁ ୨୧ ତାରିଖ ପର୍ଯ୍ୟନ୍ତ ଚାଲିଥିବା ପ୍ରତିଯୋଗିତାରେ ଟୁକୁ ୪୦ରୁ ୫୦ ବର୍ଷ ବୟସ ବର୍ଗରେ ୧୦୦ ମିଟର ଦୌଡ଼ ପ୍ରତିଯୋଗିତାରେ ଭାଗ ନେଇଥିଲେ। ସର୍ବଭାରତୀୟ ସ୍ତରରେ ୧୦୦ ମିଟର ଦୌଡ଼ରେ ପ୍ରାୟ ୬୦ ଜଣ ଭାଗ ନେଇଥିବାବେଳେ ୮ଟି ହିଟରେ ପ୍ରଥମ ସ୍ଥାନ ଅଧିକାର କରି ସ୍ବର୍ଣ୍ଣ ପଦକ ହାସଲ କରିଛନ୍ତି। ପୁରସ୍କାର ବିତରଣ ଉତ୍ସବରେ କେନ୍ଦ୍ରୀୟ କ୍ରୀଡା ବିଭାଗର ଯୁଗ୍ମ ସମ୍ପାଦକ ରାବତ ପାଠକ ପ୍ରମୁଖ ଉପସ୍ଥିତ ରହି ପଦକ ପ୍ରଦାନ କରିଛନ୍ତି।
