ଡେସ୍କ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ମଧ୍ୟପ୍ରଦେଶର ଭୋପାଳ ଠାରେ ବିଶ୍ୱ ନିବେଶକ ସମ୍ମିଳନୀ ୨୦୨୫କୁ ଉଦଘାଟନ କରିଛନ୍ତି। ସମାବେଶକୁ ସମ୍ବୋଧିତ କରି ସମଗ୍ର ବିଶ୍ୱ ଭାରତକୁ ନେଇ ଆଶାବାଦୀ‘ ବୋଲି ଶ୍ରୀ ମୋଦୀ କହିବା ସହିତ ଭାରତ ଇତିହାସରେ ପ୍ରଥମ ଥର ପାଇଁ ଏଭଳି ସୁଯୋଗ ସୃଷ୍ଟି ହୋଇଛି ବୋଲି କହିଛନ୍ତି। ଭାରତ ବିଷୟରେ ଗତ କିଛି ସପ୍ତାହ ମଧ୍ୟରେ ମିଳିଥିବା ମନ୍ତବ୍ୟ ନିବେଶକଙ୍କ ଉତ୍ସାହ ବୃଦ୍ଧି କରିବ ବୋଲି ସେ କହିଛନ୍ତି। ଭାରତ ଦ୍ରୁତ ଅଭିବୃଦ୍ଧିଶୀଳ ଅର୍ଥବ୍ୟବସ୍ଥା ହୋଇ ରହିବ ବୋଲି ବିଶ୍ୱ ବ୍ୟାଙ୍କ ନିକଟରେ ଦେଇଥିବା ବିବୃତିକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ, ବିଶ୍ୱର ଭବିଷ୍ୟତ ଭାରତରେ ଅଛି।
ଜନସଂଖ୍ୟା ଦୃଷ୍ଟିରୁ ମଧ୍ୟପ୍ରଦେଶ ଭାରତର ପଞ୍ଚମ ବୃହତ୍ତମ ରାଜ୍ୟ ଏବଂ କୃଷି ଓ ଖଣିଜ ପଦାର୍ଥ ପାଇଁ ମଧ୍ୟପ୍ରଦେଶ ଭାରତର ଅନ୍ୟତମ ଶ୍ରେଷ୍ଠ ରାଜ୍ୟ ଓ ମଧ୍ୟପ୍ରଦେଶ ଜୀବନ ପ୍ରଦାନକାରୀ ନର୍ମଦା ନଦୀ ଦ୍ବାରା ଆଶୀର୍ବାଦପ୍ରାପ୍ତ। ସେ କହିଥିଲେ ଯେ ଜିଡିପି ଆଧାରରେ, ମଧ୍ୟପ୍ରଦେଶ ଭାରତର ଶ୍ରେଷ୍ଠ ପାଞ୍ଚଟି ରାଜ୍ୟ ମଧ୍ୟରୁ ଅନ୍ୟତମ ହେବାର ସମ୍ଭାବନା ଅଛି। ସେ ଆହୁରି ମଧ୍ୟ କହିଛନ୍ତି ଯେ ଜାନୁଆରୀ ୨୦୨୫ ସୁଦ୍ଧା, ମଧ୍ୟପ୍ରଦେଶରେ ପାଖାପାଖି ୨ ଲକ୍ଷ ଇଲେକ୍ଟ୍ରିକ୍ ଯାନ ପଞ୍ଜୀକୃତ ହୋଇଛି, ଯାହା ପ୍ରାୟ ୯୦ ପ୍ରତିଶତ ଅଭିବୃଦ୍ଧିକୁ ପ୍ରତିଫଳିତ କରୁଛି।
ଭୋପାଳରେ ଅନୁଷ୍ଠିତ ଦୁଇ ଦିନିଆ ବିଶ୍ବ ନିବେଶକ ସମ୍ମିଳନୀ ୨୦୨୫ ମଧ୍ୟପ୍ରଦେଶକୁ ଏକ ବିଶ୍ୱ ନିବେଶ କେନ୍ଦ୍ର ଭାବରେ ପ୍ରତିଷ୍ଠା କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ମଞ୍ଚ ଭାବରେ କାର୍ଯ୍ୟ କରୁଛି। ଜିଆଇଏସରେ ବିଭାଗୀୟ ସମ୍ମିଳନୀ ମଧ୍ୟ ଅନ୍ତର୍ଭୁକ୍ତ, ଯେଉଁଥିରେ ଔଷଧ ଏବଂ ମେଡିକାଲ ଉପକରଣ ପରିବହନ ଏବଂ ଲଜିଷ୍ଟିକ୍ସ, ଶିଳ୍ପ, ଦକ୍ଷତା ବିକାଶ, ପର୍ଯ୍ୟଟନ ଏବଂ ଏମଏସଏମଇ ଉପରେ ସ୍ୱତନ୍ତ୍ର ଅଧିବେଶନ ରହିଛି। ଏଥିରେ ଗ୍ଲୋବାଲ୍ ସାଉଥ୍ ଦେଶ ମାନଙ୍କର ସମ୍ମିଳନୀ, ଲାଟିନ୍ ଆମେରିକା ଓ କାରବୀୟ ଅଧିବେଶନ ଭଳି ଅନ୍ତର୍ଜାତୀୟ ଅଧିବେଶନ ଏବଂ ପ୍ରମୁଖ ଅଂଶୀଦାର ଦେଶମାନଙ୍କ ପାଇଁ ସ୍ୱତନ୍ତ୍ର ଅଧିବେଶନ ମଧ୍ୟ ଅନ୍ତର୍ଭୁକ୍ତ।
Comments are closed.