ଘଣ୍ଟାପଡା ଫାଣ୍ଡିକୁ ମିଳିଲା ନୂତନ ଥାନାର ମାନ୍ୟତା

ଘଣ୍ଟାପଡା/କଣ୍ଟାମାଳ : ଦୀର୍ଘ ୩୭ ବର୍ଷ ପରେ ଘଣ୍ଟାପଡା ଫାଣ୍ଡିକୁ ପୁଣି ମିଳିଲା ନୂତନ ଥାନାର ମାନ୍ୟତା। ସମଗ୍ର ରାଜ୍ୟରେ ୩୬ଟି ନୂତନ ଥାନା ଖୋଲିବା ପାଇଁ  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଅନୁମୋଦନ କରିଛନ୍ତି। ତନ୍ମଧ୍ୟରୁ ବୌଦ୍ଧ ଜିଲ୍ଲା ଘଣ୍ଟାପଡା ଫାଣ୍ଡିକୁ ଥାନାର ମାନ୍ୟତା ମିଳିଛି। ଏଇ ଖବର ପ୍ରଚାରିତ ହେବା ପରେ ଘଣ୍ଟାପଡା ଅଞ୍ଚଳରେ ଖୁସିର ଲହରୀ ଖେଳି ଯାଇଛି। ବିଭିନ୍ନ ମହଲରୁ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି। ପ୍ରକାଶ ଥାଉକି ବ୍ରିଟିଶ ତଥା ରାଜାରାଜୁଡା ଶାସନ ସମୟରେ ୧୯୦୫ ମସିହାରେ ତତ୍କାଳୀନ ବୌଦ୍ଧଗଡ଼ର ରାଜା ଘଣ୍ଟାପଡା ଗ୍ରାମରେ ଏକ ଥାନା ପ୍ରତିଷ୍ଠା କରିଥିଲେ। ଯାହାକି ଭାରତ ସ୍ୱାଧୀନତା ପାଇବାପରେ ରାଜ୍ୟ ସରକାରଙ୍କ ତରଫରୁ ମଧ୍ୟ ଥାନାର ମାନ୍ୟତା ମିଳିଥିଲା। କିନ୍ତୁ ଏଠାର ରାଜନୈତିକ ଅପାରଗତା ଯୋଗୁଁ ୧୯୮୫ ମସିହାରେ ଓଡିଶା ସରକାର ଘଣ୍ଟାପଡା ଥାନାକୁ ଉଠାଇନେଇ କଣ୍ଟାମାଳ ଫାଣ୍ଡିକୁ ଥାନା ଓ ଘଣ୍ଟାପଡା ଥାନାକୁ ଫାଣ୍ଡିର ମାନ୍ୟତା ଦେଇଥିଲେ। ଦୀର୍ଘ ୩୭ ବର୍ଷର ଆପତ୍ତି ଅଭିଯୋଗ ଓ ବିଭିନ୍ନ ସଙ୍ଘ ତରଫରୁ ଦାବି ପରେ ଆଜି ଓଡିଶା ସରକାରଙ୍କ ଘୋଷଣା ପରେ ଅଞ୍ଚଳରେ ଖୁସିର ଲହରୀ ଖେଳିଯାଇଛି। ଖୁସିରେ ଅଞ୍ଚଳବାସୀ ମିଷ୍ଟାନ୍ନ ବଣ୍ଟନ ସହ ବାଣ ଫୁଟାଇ ଖୁସି ମନାଇବା ସହ ଓ ମୁଖ୍ୟମନ୍ତ୍ରୀ ଓ କଣ୍ଟାମାଳ ବିଧାୟକ ମହୀଧର ରଣାଙ୍କୁ କୃତଜ୍ଞତା ଜଣାଇଛନ୍ତି।