ଦିନ ଗଡ଼ିବା ସହ କରୋନା ଟୀକାକୁ ନେଇ ଗରମାଗରମ ଖବର ଆସୁଛି । ଲୋକମାନେ ଟୀକାକୁ ଅପେକ୍ଷା କରିଛନ୍ତି । ଟୀକା ପ୍ରସ୍ତୁତକର୍ତା ବିଶ୍ବର ବଡ଼ ୪ଟି ସଂସ୍ଥା ଫାଇଜର, ମଡ଼ର୍ଣା, ଆଷ୍ଟ୍ରଜେନେକା ଓ ସ୍ଫୁଟନିକ-ଭି ନାମରେ ୪ଟି ଟୀକା ପ୍ରସ୍ତୁତ କରିଛନ୍ତି ଏବଂ ଏହାର ସଫଳତା ହାରକୁ ନେଇ ପରୀକ୍ଷାନିରୀକ୍ଷା ଚାଲିଛି
ଅକ୍ସଫୋର୍ଡ-ଆଷ୍ଟ୍ରା ଜେନେକା ଟୀକା ର ସାମଗ୍ରିକ ପ୍ରଭାବ ୭୦.୪% ଥିବାବେଳେ ଅବଶିଷ୍ଟ ତିନୋଟିର ସଫଳତା ହାର ୯୪% ରୁ ଅଧିକ | ଅକ୍ସଫୋର୍ଡ ଟିକା ୯୦% ପର୍ଯ୍ୟନ୍ତ ସଫଳତା ଦେଇପାରେ ବୋଲି ମଧ୍ୟ ଆକଳନ କରାଯାଉଛି । ରୁଷର ଟୀକା ସ୍ଫୁଟନିକ ଭି ବ୍ୟତୀତ ଅନ୍ୟ ସମସ୍ତ ଟୀକା ଅନୁମୋଦନ ନିମନ୍ତେ ନିୟନ୍ତ୍ରକଙ୍କ ପାଖକୁ ଖୁବ ଶୀଘ୍ର ପଠାଯିବ ଏବଂ ଆସନ୍ତା ବର୍ଷ ଜାନୁଆରୀ ମାସ ବେଳକୁ ଟୀକା ଉପଲବ୍ଧ ହେବା ସମ୍ଭାବନା ରହିଛି ।
ଭାରତରେ କରୋନା ଟୀକା ପ୍ରଦାନ ନିମନ୍ତେ କେନ୍ଦ୍ର ସରକାର ନିର୍ଦିଷ୍ଟ କାର୍ଯ୍ୟକ୍ରମ ପ୍ରସ୍ତୁତ କରିଛନ୍ତି । ସ୍ବାସ୍ଥ୍ୟ କର୍ମୀ, ଛାମୁଆଁ କ୍ଷେତ୍ରରେ କାର୍ଯ୍ୟ କରୁଥିବା କର୍ମଚାରୀ ଓ ବରିଷ୍ଠ ନାଗରିକମାନଙ୍କୁ ପ୍ରଥମେ ଟୀକା ଦିଆଯିବ ବୋଲି ସରକାର କହିଛନ୍ତି । ଏହି ବର୍ଗରେ ଥିବା ବ୍ୟକ୍ତିମାନଙ୍କୁ ଉଚ୍ଚ ପ୍ରାଥମିକତା ଗୋଷ୍ଠୀ ବୋଲି କୁହାଯାଉଛି । ଟୀକା ଲାଗି ଯୋଗ୍ୟ ଏହି ବର୍ଗର ବ୍ୟକ୍ତିମାନଙ୍କୁ ଟୀକାକରଣର ତାରିଖ, ସମୟ ସ୍ଥାନ ଆଦି ଏସଏମଏସ୍ ଜରିଆରେ ଜଣାଇ ଦିଆଯିବ ବୋଲି ସୂଚନା ମିଳିଛି । ଏହା ସହ ଏହି ଏସଏମଏସରେ ଟୀକା ନେବାକୁ ଥିବା ବ୍ୟକ୍ତିଙ୍କ ନାମ ଓ ଟୀକା ଦେବାକୁ ଥିବା ସଂସ୍ଥା ବା କର୍ମଚାରୀଙ୍କ ନାମ ମଧ୍ୟ ରହିବ। ପ୍ରଥମ ଡ଼ୋଜ ପରେ ଦ୍ବିତୀୟ ଡ଼ୋଜ ଲାଗି ମଧ୍ୟ ଏସଏମଏସ୍ ଯିବ । ଟୀକାକରଣ ସମ୍ପୂର୍ଣ୍ଣ ହେବା ପରେ ସମ୍ପୃକ୍ତ ବ୍ୟକ୍ତିଙ୍କୁ ଏକ ଡିଜିଟାଲ୍ QR ଆଧାରିତ ପ୍ରମାଣପତ୍ର ପ୍ରଦାନ କରାଯିବ । ଯାହା ମାଧ୍ୟମରେ କୋଭିଡ୍ ଟିକାଗୁଡ଼ିକର ଷ୍ଟକ୍ ଏବଂ ବଣ୍ଟନ / ଟୀକାକରଣ ଉପରେ ନଜର ରଖାଯାଇ ପାରିବ ।
ଟୀକା କ୍ଷେତ୍ରରେ ଅନ୍ୟଦେଶଗୁଡ଼ିକଠାରୁ ଭାରତର ପ୍ରଦର୍ଶନ ଉତ୍ସାହଜନକ ରହିଛି । ବିଶ୍ବର ସର୍ବବୃହତ୍ ଟୀକା ଉତ୍ପାଦନକାରୀ ଦେଶ ଭାବରେ ଭାରତ ପରିଚିତ । ତେଣୁ କରୋନା ଟୀକା କ୍ଷେତ୍ରରେ ମଧ୍ୟ ଭାରତର ଭୂମିକା ଗୁରୁତ୍ବପୂର୍ଣ୍ଣ ରହିବ । ଏଥିପାଇଁ ଆସନ୍ତା ୨୭ ତାରିଖରେ ରୁଷ, ଅଷ୍ଟ୍ରେଲିଆ ସହ ମୋଟ ୨୦ ଦେଶର ରାଷ୍ଟ୍ରଦୂତ ପୁନେର ସେରମ ଇନଷ୍ଟିଚ୍ୟୁଟ୍ ଓ ଜେନୋଆ ଫାର୍ମା କମ୍ପାନୀ ପରିଦର୍ଶନ କରିବେ ବୋଲି ସୂଚନା ମିଳିଛି ।
ଏହି ପରିସ୍ଥିତିରେ ରୁଷୀୟ ଟୀକା ସ୍ଫୁଟନିକ୍ ଭି ନେଇ କିଛି ତଥ୍ୟ ପ୍ରକାଶ ପାଇଛି । ଏହି ଟୀକା ତରଳ ଭାବରେ ଉପଲବ୍ଧ ହେବ ଏବଂ ଏହାକୁ ସଂରକ୍ଷଣ ନିମନ୍ତେ (-) ବିଯୁକ୍ତ ୧୮ ଡ଼ିଗ୍ରୀ ତାପମାନ ଆବଶ୍ୟକ । ମାତ୍ର ଶୁଷ୍କ ଟୀକାକୁ ୨ରୁ ୮ ଡ଼ିଗ୍ରୀ ମଧ୍ୟରେ ରଖିବାକୁ ପଡ଼ିବ ବୋଲି କୁହାଯାଇଛି ।
