ବୌଦ୍ଧ : ବୌଦ୍ଧ ଥାନା ଅନ୍ତର୍ଗତ ଡିମିରିଖୋଲ ଜଙ୍ଗଲରେ ଚାଲାଣ ପାଇଁ ପ୍ୟାକିଂ କରାଯାଉଥିବାବେଳେ ବୌଦ୍ଧ ପୁଲିସ ପକ୍ଷରୁ ଚଢ଼ାଉ କରାଯାଇ ବିପୁଳ ମାତ୍ରାରେ ଗଞ୍ଜେଇ ଜବତ କରାଯାଇଛି । ପୁଲିସ ସୂତ୍ରରୁ ପ୍ରକାଶ ଯେ ଡିମିରିଖୋଲ ଗ୍ରାମ ନିକଟସ୍ଥ ଜଙ୍ଗଲରେ ଚାଲାଣ ପାଇଁ ଗଞ୍ଜେଇ ପ୍ୟାକିଂ କରାଯାଉଥିବା ବିଶ୍ଵସ୍ତ ସୁତ୍ରରୁ ସୂଚନା ପାଇ ପୁଲିସର ଏକ ଟିମ୍ ଚଢାଉ କରିଥିଲା । ପୁଲିସକୁ ଦେଖି ଗଞ୍ଜେଇ ମାଫିଆମାନେ ଫେରାର ହୋଇଯାଇଥିବାବେଳେ ସେହି ସ୍ଥାନରୁ ବିପୁଳ ମାତ୍ରାରେ ଗଞ୍ଜେଇ ଜବତ କରାଯାଇଥିଲା ।
ଜବତ ହୋଇଥିବା ଗଞ୍ଜେଇ ୪୦୮ କିଲୋ ବୋଲି ବୌଦ୍ଧ ଥାନା ଅଧିକାରୀ ରଞ୍ଜିତ କୁମାର ମୁନି ସୂଚନା ଦେଇଛନ୍ତି । ଏନେଇ ବୌଦ୍ଧ ଥାନା କେସ ନମ୍ୱର୍ ୮୬/୨୪ ରେ ଏକ ମାମଲା ରୁଜୁ କରି ପୁଲିସ ଘଟଣା ସମ୍ପର୍କରେ ତଦନ୍ତ ଜାରି ରଖିଛି । ପ୍ରକାଶ ଥାଉକି ଦୁଇଦିନ ପୂର୍ବରୁ ବୌଦ୍ଧ ଥାନା ପକ୍ଷରୁ ୧୦ କୁଇଣ୍ଟାଲରୁ ଅଧିକ ଗଞ୍ଜେଇ ଜବତ କରାଯାଇଥିଲା । କେବଳ ପୁଲିସ ପକ୍ଷରୁ ଚଳିତ ବର୍ଷ ୨ ହଜାର ଏକର ଗଞ୍ଜେଇ ଚାଷ ନଷ୍ଟ କରାଯାଇଥିବା କୁହାଯାଉଥିବାବେଳେ ପୁନର୍ବାର ଏତେ ପରିମାଣରେ ଗଞ୍ଜେଇ ଜବତ ହେବା ଚାଷ ନଷ୍ଟ ରେକର୍ଡକୁ ନେଇ ସନ୍ଦେହ ସୃଷ୍ଟି କରୁଛି ।
