ପୃଥିବୀ ଅକାଳଗ୍ରସ୍ତ ହେବ। ଭୂକମ୍ପ ବିଶ୍ଵରେ ଧ୍ଵଂସଲୀଳା ରଚିବ। ସମ୍ବଳକୁ ନେଇ ଯୁଦ୍ଧ ସ୍ଥିତି ଉପୁଜିବ। ଫ୍ରାନ୍ସରେ ଜନ୍ମିତ ମାଇକେଲ ଦି ନୋଷ୍ଟ୍ରାଡେମସଙ୍କ ୪୬୫ ବର୍ଷ ତଳର ଏପରି ଭବିଷ୍ୟବାଣୀ ଏବେ ବେଶ୍ ଆଲୋଡ଼ନ ସୃଷ୍ଟି କରିଛି। ପୂର୍ବରୁ ନୋଷ୍ଟ୍ରାଡେମସ୍ଙ୍କ ଭବିଷ୍ୟବାର୍ତ୍ତା ୭୦ ପ୍ରତିଶତ ସତ୍ୟରେ ପରିଣତ ହୋଇଥିବା ଜଣାଯାଇଛି। ୨୦୨୦ ପାଇଁ ସେ ଯେଉଁ ଭବିଷ୍ୟବାଣୀ କରିଥିଲେ ତାହା ସତ୍ୟରେ ପରିଣତ ହୋଇଛି। ୨୦୨୧ର ଭବିଷ୍ୟବାର୍ତ୍ତାକୁ ଏବେ ସବୁଠି ଚର୍ଚ୍ଚା ଜୋର୍ ଧରିଛି।
ନୋଷ୍ଟ୍ରାଡେମସ ବହୁ ବର୍ଷ ତଳେ ‘ଲେସ୍ ପ୍ରୋଫେଟିସ’ ନାମକ ଏକ ପୁସ୍ତକରେ ପୃଥିବୀ ସମ୍ପର୍କରେ ଅନେକ ଭବିଷ୍ୟବାଣୀ କରିଥିଲେ। ଏହି ପୁସ୍ତକର ପ୍ରଥମ ସଂସ୍କରଣ ୧୫୫୫ରେ ପ୍ରକାଶ ପାଇଥିଲା। ଏଥିରେ ମୋଟ ୬୩୩୮ଟି ଭବିଷ୍ୟବାଣୀ ଉଲ୍ଲେଖ ରହିଛି, ଯେଉଁଥିରୁ ଆଜି ପର୍ଯ୍ୟନ୍ତ ୭୦ ପ୍ରତିଶତ ସତ୍ୟ ପ୍ରମାଣିତ ହୋଇଛି।
ନୋଷ୍ଟ୍ରାଡେମସ୍ ତାଙ୍କ ଭବିଷ୍ୟବାଣୀକୁ ଛନ୍ଦ ଆକାରରେ ଉଲ୍ଲେଖ କରିଛନ୍ତି। ୨୦୨୦ରେ ସାରା ବିଶ୍ଵକୁ ଦୋହଲାଇ ଦେଇଥିବା କରୋନା ଭୂତାଣୁ ମହାମାରୀ ସମ୍ପର୍କରେ ବି ନୋଷ୍ଟ୍ରାଡେମସ ଭବିଷ୍ୟବାଣୀ କରିଥିଲେ। ତାହା ସତ ହୋଇଥିବା ବେଳେ ଆଉ କିଛି ଐତିହାସିକ ଘଟଣା ମଧ୍ୟ ତାଙ୍କ ଭବିଷ୍ୟବାଣୀ ଆଧାରରେ ଘଟିସାରିଛି। ୨୦୨୧କୁ ନେଇ ମଧ୍ୟ ନେ ଅନେକ ଭବିଷ୍ୟବାଣୀ କରିଛନ୍ତି।
ଜୋମ୍ବି
ନୋଷ୍ଟ୍ରାଡେମସଙ୍କ ଭବିଷ୍ୟବାଣୀ ଅନୁସାରେ, ୨୦୨୧ରେ ରୁଷ୍ର ଜଣେ ବୈଜ୍ଞାନିକ ଏପରି ଏକ ଜୈବିକ ଅସ୍ତ୍ର ଏବଂ ଭୂତାଣୁ ବିକଶିତ କରିବେ, ଯାହା ମଣିଷକୁ ଜୋମ୍ବି କରିଦେବ। ଏହିପରି ଭାବେ ପରବର୍ତ୍ତୀ ସମୟରେ ମଣିଷ ପ୍ରଜାତିର ସର୍ବନାଶ ହୋଇଯିବ।
ଅକାଳ
ନାଷ୍ଟ୍ରୋଡେମସ ଆହୁରି କହିଛନ୍ତି, ଅକାଳ, ଭୂକମ୍ପ, ବିଭିନ୍ନ ପ୍ରକାରର ରୋଗ ଏବଂ ମହାମାରୀ ଦୁନିଆର ସର୍ବନାଶ ପୂର୍ବର ସଙ୍କେତ ସାଜିବ। ଏହା ଏପରି ଏକ ଅକାଳ ହେବ, ଯାହାର ସାମ୍ନା ଦୁନିଆ ପୂର୍ବରୁ କେବେ କରି ନ ଥିବ। ବିଶ୍ଵ ଜନସଂଖ୍ୟାର ଏକ ବଡ଼ ଭାଗ ଏଥିରେ କ୍ଷତିଗ୍ରସ୍ତ ହେବ। ୨୦୨୦ର କରୋନା ଭୂତାଣୁ ଏହାର ପ୍ରାରମ୍ଭ ବୋଲି କୁହାଯାଇପାରେ।
ସୂର୍ଯ୍ୟଙ୍କ କୋପ
୨୦୨୧ ଦୁନିଆର ପ୍ରମୁଖ ଘଟଣାବହୁଳ ବର୍ଷ ଭାବେ ଗୁରୁତ୍ଵପୂର୍ଣ୍ଣ ସାବ୍ୟସ୍ତ ହେବ। ଏହି ବର୍ଷରେ ସୂର୍ଯ୍ୟଙ୍କ କୋପ ପୃଥିବୀର କ୍ଷତିଗ୍ରସ୍ତର କାରଣ ସାଜିବ। ନୋଷ୍ଟ୍ରାଡେମସ ଚେତାବନୀ ଦେଇ ସମୁଦ୍ର ଜଳସ୍ତର ବୃଦ୍ଧି ପାଇବ ଏବଂ ପୃଥିବୀ ସେଥିରେ ଲୀନ ହେବ ବୋଲି ମଧ୍ୟ କହିଛନ୍ତି। ଜଳବାୟୁ ପରିବର୍ତ୍ତନ ଯୋଗୁ ଉପନୀତ ହେବାକୁ ଥିବା ଏହି କ୍ଷତି ଯୁଦ୍ଧ ସ୍ଥିତି ସୃଷ୍ଟି କରିବ। ସମ୍ବଳ ପାଇଁ ଦୁନିଆରେ ଝଗଡ଼ା ଆରମ୍ଭ ହେବ ଏବଂ ଲୋକମାନେ ପଳାୟନ କରିବେ।
ପୃଥିବୀ ସହିତ ମାଡ଼ ହେବ ଧୂମକେତୁ
ନାଷ୍ଟ୍ରୋଡେମସ ଏକ ଛନ୍ଦରେ ଲେଖିଛନ୍ତି, ପୃଥିବୀ ସହିତ ଧୂମକେତୁ ମାଡ଼ ହେବ। ଏହା ଦ୍ବାରା ଭୂକମ୍ପ ଏବଂ ଅନେକ ପ୍ରାକୃତିକ ବିପର୍ଯ୍ୟୟ ସୃଷ୍ଟି ହେବ। ପୃଥିବୀ କକ୍ଷପଥରେ ଏହି ଧୂମକେତୁ ପ୍ରବେଶ କରିବା ପରେ ବିସ୍ଫୋରିତ ହେବା ଆରମ୍ଭ ହେବ। ଆକାଶରେ ଏହା ‘ଗ୍ରେଟ୍ ଫାୟାର’ ଭଳି ଦୃଶ୍ୟମାନ ହେବ।
ବୈଜ୍ଞାନିକଙ୍କ ଚେତାବନୀ
ନୋଷ୍ଟ୍ରାଡେମସଙ୍କ ଭବିଷ୍ୟବାଣୀକୁ ନେଇ ବୈଜ୍ଞାନିକମାନେ ମଧ୍ୟ ଚେତାବନୀ ଦେଇଛନ୍ତି। ନାସାର ବୈଜ୍ଞାନିକମାନେ ଏକ ବଡ଼ ଧୂମକେତୁ ପୃଥିବୀ ସହିତ ମାଡ଼ ହେବାର ଆଶଙ୍କା ଥିବା ନେଇ ପୂର୍ବରୁ କହିଥିଲେ। ଏହାକୁ ଗମ୍ଭୀରତାର ସହିତ ନେବା ଜରୁରୀ। କାରଣ ୨୦୨୧ ମେ ୬ରେ ୨୦୦୯କେଏଫ୧ ନାମକ ଏକ ବଡ଼ ଧୂମକେତୁ ପୃଥିବୀରେ ମାଡ଼ ହେବାର ଆଶଙ୍କା ରହିଛି। ଏହି ଧୂମକେତରୁ ଶକ୍ତି ୧୯୪୫ରେ ହିରୋସିମା ଉପରେ ଆମେରିକା ଦ୍ବାରା ପକାଯାଇଥିବା ପରମାଣୁ ବୋମାଠାରୁ ପ୍ରାୟ ୧୫ ଗୁଣ ଅଧିକ ବୋଲି ବୈଜ୍ଞାନିକମାନେ କହିଛନ୍ତି।
