ଘରକୁ କରୋନା ଆଣିପାରେ କ୍ଷୀର ପ୍ୟାକେଟ : ସତର୍କ କଲା ଏଫଏସ୍ଏସ୍ଏଆଇ

ନୂଆଦିଲ୍ଲୀ: କରୋନାରୁ ବର୍ତିବା ପାଇଁ ଲୋକମାନେ ଯାବତୀୟ ସତର୍କତା ଅବଲମ୍ବନ କରୁଛନ୍ତି । ବାହାରୁ ଘରକୁ ଆସିଲେ ତାହାକୁ ପରିଷ୍କାର ପରିଛନ୍ନ କରୁଛନ୍ତି । ତେବେ ଏଥିପାଇଁ ଅଧିକ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛି ଫୁଟ୍ ସେଫ୍ଟି ଏଣ୍ଡ ଷ୍ଟାଣ୍ଡାର୍ଡ଼ ଅଥରିଟି ଅଫ୍ ଇଣ୍ଡିଆ (FSSAI)। ଏପରିକି ଘରକୁ କ୍ଷୀର ପ୍ୟାକେଟ୍ ଆଣିବା ଓ ଏହାକୁ ଫୁଟାଇବା ଉପରେ ଅଧିକ ଧ୍ୟାନ ଦେବାକୁ ‘ଫାସାଇ’ ପରାମର୍ଶ ଦେଇଛି । କେବଳ ସେତିକି ନୁହେଁ, ଆପଣ ଯଦି କ୍ଷୀରବାଲାଠାରୁ କ୍ଷୀର କିଣୁଛନ୍ତି ତେବେ ନିଜେ ମାସ୍କ ପିନ୍ଧିବା ଓ କ୍ଷୀରବାଲା ମାସ୍କ ପିନ୍ଧିଛି କି ନାହିଁ ତାହା ଦେଖିବା ଆପଣଙ୍କ ଦାୟିତ୍ଵ ବୋଲି କୁହାଯାଇଛି ।

Here are some simple tips to keep in mind for keeping packaged milk clean.#EatRightIndia #HealthForAll #SwasthaBharat pic.twitter.com/r01WhnOCtA

— FSSAI (@fssaiindia) July 13, 2020

ଫାସାଇ ପରାମର୍ଶ ଦେଇଛି ଯେତେବେଳେ ଆପଣ କ୍ଷୀର ପ୍ୟାକେଟ୍ ବାହାରୁ ଆଣୁଛନ୍ତି ତାହାକୁ ତୁରନ୍ତ ବ୍ୟବହାର ନ କରି ରୋଷେଇଘରେ କିମ୍ବା ବାଥରୁମରେ ପ୍ରବହମାନ ପାଣିରେ ଏହାକୁ କିଛି ସମୟ ଭଲ ଭାବରେ ଧୋଇ ଦିଅନ୍ତୁ ।

ଯଦି ଆପଣଙ୍କୁ ଠିକ୍ ଲାଗେ ତେବେ ଏହାକୁ ସାବୁନରେ ମଧ୍ୟ ଧୋଇ ପାରିବେ ଏବଂ ପ୍ୟାକେଟକୁ ଭଲ ଭାବରେ ଧୋଇବା ପରେ ସାବୁନରେ ନିଜ ହାତକୁ ମଧ୍ୟ ଭଲ ଭାବରେ ଧୋଇବା ଆବଶ୍ୟକ ।

ପ୍ୟାକେଟ୍ ଧୋଇବା ପରେ ନିଜ ହାତ ଧୋଇ ସଫା କଇଁଚି ବା ଆବଶ୍ୟକ ସାମଗ୍ରୀରେ କ୍ଷୀର ପ୍ୟାକେଟ୍ କାଟି ସେଥିରୁ କ୍ଷୀର ବାହାର କରନ୍ତୁ ଏବଂ କ୍ଷୀର ଗରମ କରିବା ସମୟରେ ଯେପରି ଧୂଆ ହୋଇଥିବା ପାଣି କ୍ଷୀର ହାଣ୍ଡିରେ ନ ପଡ଼େ ସେଥିପାଇଁ ଧ୍ୟାନ ଦିଅନ୍ତୁ । ପ୍ୟାକେଟରେ ଆସୁଥିବା କ୍ଷୀରକୁ ଫୁଟାଇ ବ୍ୟବହାର କରିବା ଆବଶ୍ୟକ ବୋଲି ଫାସାଇ ପରାମର୍ଶ ଦେଇଛି ।