ମୁମ୍ବଇ : ୨୬ ଜୁଲାଇ ଶୁକ୍ରବାର ମୁକ୍ତିଲାଭ କରିଛି ୨ଟି ବଲିଉଡ଼ ଚଳଚ୍ଚିତ୍ର। ଗୋଟିଏ ହେଉଛି କଙ୍ଗନା ରାଣାୱତ୍-ରାଜକୁମାର ରାଓଙ୍କ ଅଭିନୀତ ‘ଜଜ୍ମେଣ୍ଟଲ ହୈ କ୍ୟା’ ଏବଂ ଅନ୍ୟଟି କୃତି ସେନନ-ଦିଲଜିତ୍ ଦୋସାଂଝଙ୍କ ଅଭିନୀତ ‘ଅର୍ଜୁନ ପଟିଆଲା’।
‘ଜଜ୍ମେଣ୍ଟଲ ହୈ କ୍ୟା’ ଦର୍ଶକଙ୍କ ମନକୁ ଛୁଇଁବାରେ ସଫଳ ହୋଇଥିବା ଜଣାପଡ଼ିଛି। ସାମାଜିକ ଗଣମାଧ୍ୟମରେ ଚଳଚ୍ଚିତ୍ରକୁ ବହୁତ ଭଲ ପ୍ରତିକ୍ରିୟା ମିଳୁଛି। ପୂର୍ବରୁ ଏହାର ଟ୍ରେଲରକୁ ମଧ୍ୟ ଲୋକେ ଖୁବ୍ ପସନ୍ଦ କରିଥିଲେ ଏବଂ ଚଳଚ୍ଚିତ୍ରର ମୁକ୍ତିଲାଭକୁ ନେଇ ଉତ୍ସାହିତ ଥିଲେ। ଦର୍ଶକ କଙ୍ଗନା ଓ ରାଜକୁମାରଙ୍କ ଅଭିନୟକୁ ଖୁବ୍ ପ୍ରଶଂସା କରିଛନ୍ତି। ଏକତା କପୁର, ଶୋଭା କପୁର ଏବଂ ଶୈଳେଶ ଆର୍ ସିଂହଙ୍କ ମିଳିତ ପ୍ରଯୋଜନାରେ ନିର୍ମିତ ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ପ୍ରକାଶ କୋୱେଲାମୁଦୀ।
ଅନ୍ୟପକ୍ଷରେ ରୋମାଣ୍ଟିକ୍-କମେଡ଼ି ଚଳଚ୍ଚିତ୍ର ‘ଅର୍ଜୁନ ପଟିଆଲା’କୁ ଦର୍ଶକ ଓ ସମୀକ୍ଷକଙ୍କ ମିଶ୍ର ପ୍ରତିକ୍ରିୟା ମିଳିଛି। ଏହାକୁ ‘ଜଜ୍ମେଣ୍ଟଲ ହୈ କ୍ୟା’ଠାରୁ କଡ଼ା ଟକ୍କର ମିଳିବାର ସମ୍ଭାବନା ରହିଛି। ମାତ୍ର ଦୁଇ ଚଳଚ୍ଚିତ୍ର ଭିନ୍ନ ଧରଣର କାହାଣୀ ଉପରେ ଆଧାରିତ ହୋଇଥିବାରୁ କେହି କାହା ଉପରେ ଏତେଟା ପ୍ରଭାବ ପକାଇବେ ନାହିଁ ବୋଲି ଚଳଚ୍ଚିତ୍ର ସମୀକ୍ଷକମାନେ ମତପୋଷଣ କରିଛନ୍ତି। ଏପରିକି ଚଳଚ୍ଚିତ୍ର ୧୦୦ କୋଟି କ୍ଲବରେ ସାମିଲ ହୋଇପାରେ ବୋଲି ପ୍ରଶଂସକମାନେ ଆଶା ପ୍ରକାଶ କରିଛନ୍ତି। ଚଳଚ୍ଚିତ୍ରରେ ଲୋକେ କୃତି ଓ ଦିଲଜିତ୍ଙ୍କ ଯୋଡ଼ିକୁ ଖୁବ୍ ପସନ୍ଦ କରିଛନ୍ତି। ଏଥିରେ ଦିଲଜିତ୍ ଜଣେ ପୁଲିସ ଭୂମିକାରେ ଅଭିନୟ କରିଥିବା ବେଳେ କୃତି ଜଣେ ସାମ୍ବାଦିକା ଭୂମିକାରେ ଅଭିନୟ କରିଛନ୍ତି। ଏ ଦୁହିଁଙ୍କ ବ୍ୟତୀତ ଚଳଚ୍ଚିତ୍ରରେ ବରୁଣ ଶର୍ମା, ରୋନିତ ରୟଙ୍କୁ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଦେଖିବାକୁ ମିଳିଛି। ଏହାସହିତ ସନୀ ଲିଓନୀ ମଧ୍ୟ ଅତିଥି କଳାକାର ଭାବେ ନଜର ଆସିଛନ୍ତି। ରୋହିତ ଜଗରାତ ଚୌହାନ ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି।
