ନୂଆଦିଲ୍ଲୀ: ଦେଶରେ ଭିଡ ହିଂସା ଦିନକୁ ଦିନ ବଢ଼ିବାରେ ଲାଗିଛି। ଗୁଣି ଗାରେଡ଼ି ଅଥବା ଚୋରି ସନ୍ଦେହରେ ନିରୀହ ଲୋକଙ୍କୁ ପିଟି ପିଟି ମାରି ଦିଆଯାଉଛି। ଏହାକୁ ନେଇ ସୁପ୍ରିମକୋର୍ଟ କେନ୍ଦ୍ର ସରକାର ଏବଂ ୧୦ଟି ରାଜ୍ୟକୁ ନୋଟିସ ଜାରି କରି ଜବାବ ମାଗିଛନ୍ତି। ଭିଡ଼ ହିଂସା ରୋକିବା ଲାଗି କ’ଣ ପଦକ୍ଷେପ ନିଆଯାଇଛି ତାହା ଜଣାଇବାକୁ ସୁପ୍ରିମକୋର୍ଟ ନିର୍ଦେଶ ଦେଇଛନ୍ତି।
ସୂଚନା ମୁତାବକ, ଗତବର୍ଷ ଶୁଣାଣି ସମୟରେ ସୁପ୍ରିମକୋର୍ଟ ଭିଡ ହିଂସା ରୋକିବା ଲାଗି ୧୧ଟି ପ୍ରସ୍ତାବ ପାଳନ କରିବାକୁ ସୁପାରିସ୍ କରିଥିଲେ। କିନ୍ତୁ ସେସବୁ କାର୍ଯ୍ୟକାରୀ କରାଯାଉ ନ ଥିବା ଅଭିଯୋଗ କରି ସୁପ୍ରିମକୋର୍ଟରେ ସାନି ପିଟିଶନ ଦାଖଲ ହୋଇଛି। ଏହା ଉପରେ ଶୁକ୍ରବାର ଶୁଣାଣି କରି ସୁପ୍ରିମକୋର୍ଟ କେନ୍ଦ୍ର ଏବଂ ୧୦ ରାଜ୍ୟକୁ ରିପୋର୍ଟ ତଲବ କରିଛନ୍ତି। ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗୋଇଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କେନ୍ଦ୍ର ସରକାର, ଜାତୀୟ ମାନବାଧିକାର କମିଶନ ଏବଂ ଉତ୍ତର ପ୍ରଦେଶ, ଆନ୍ଧ୍ରପ୍ରଦେଶ, ଦିଲ୍ଲୀ, ରାଜସ୍ଥାନ ସମେତ ୧୦ ରାଜ୍ୟକୁ ନୋଟିସ ଜାରି କରିଛନ୍ତି। ସୂଚନାଯୋଗ୍ୟ, ସୁପ୍ରିମକୋର୍ଟ ତାଙ୍କ ୧୧ଟି ପ୍ରସ୍ତାବ ମଧ୍ୟରେ ଗୋଟିଏ ପ୍ରସ୍ତାବରେ ଭିଡ଼ ହିଂସା ରୋକିବା ଲାଗି ଆଇନ ଲାଗୁ କରିବାକୁ ପରାମର୍ଶ ଦେଇଥିଲେ।
