ଫୁଲବାଣୀ- ଗାଁରେ ନାହିଁ ମୋବାଇଲ ନେଟୱର୍କ । ତେଣୁ ଅନଲାଇନ କାମ ପାଇଁ ଯିବାକୁ ପଡୁଛି ନିକଟସ୍ଥ ପାହାଡ ଉପରକୁ । ଏଭଳି ଭାବେ ପାହାଡ ଉପରକୁ ଯାଇ ନେଟୱାର୍କ ଖୋଜୁଥିବା ବେଳେ ବଜ୍ରପାତ ହେବାରୁ ୩ ଜଣ ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଏଭଳି ଅଭାବନୀୟ ଘଟଣା ଘଟିଛି କନ୍ଧମାଳ ଜିଲ୍ଲା ଚକାପାଦ ଅଞ୍ଚଳରେ। ସୂଚନା ଅନୁଯାୟୀ, ଚକାପାଦ ଥାନା ମୁଣ୍ଡାଗାଁର ତିନି ଜଣ ନିକଟସ୍ଥ ପାହାଡ଼ ଉପରକୁ ଯାଇ ମୋବାଇଲରେ ଇଣ୍ଟରନେଟ କାମ କରୁଥିଲେ। ଏହି ସମୟରେ ବଜ୍ରପାତ ହେବାରୁ ସେମାନେ ଗୁରୁତର ଆହତ ହୋଇଥିଲେ। ଆହତ ମାନେ ହେଲେ ଧୀରେନ ଦିଗାଲ(୨୦), ପିଙ୍କୁ ମଲ୍ଲିକ(୧୫) ଓ ପଞାନନ ବେହେରା(୧୨)।
ଧିରେନ ଯୁକ୍ତ ତିନିର ଛାତ୍ର ହୋଇଥିବା ବେଳେ ପଞାନନ ଅଷ୍ଟମ ଶ୍ରେଣୀରେ ପଢୁଛନ୍ତି। ଗ୍ରାମବାସୀ ଖବର ପାଇ ସେମାନଙ୍କୁ ଉଦ୍ଧାର କରି ବ୍ରାହ୍ମଣପାଦ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଧୀରେନ ଓ ପିଙ୍କୁଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ଫୁଲବାଣୀ ଜିଲ୍ଲା ମୂଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ସୂଚନାଯୋଗ୍ୟ, ମୁଣ୍ଡାଗାଁରେ କିଛି ଦିନ ହେଲା ଏକ ମୋବାଇଲ ଟାଓ୍ବ।ର ବସିଛି।କିନ୍ତୁ ବର୍ତ୍ତମାନ ସୁଦ୍ଧା ଏହା କାର୍ଯ୍ୟକ୍ଷମ ହୋଇ ନାହିଁ। ଫଳରେ ଗ୍ରାମବାସୀଙ୍କୁ ପାହାଡ ଉପରକୁ ଚଢ଼ି ଅନଲାଇନ କାମ କରିବାକୁ ପଡୁଛି।
